तेस्रो प्रयासमा सान्दार जित निकालेका विश्वप्रकाश

राजनीति

नेपाल लाइभ बुधबार, मंसिर ७, २०७९ १८:१८

काठमाडौं– नेपाली कांग्रेसका महामन्त्री विश्वप्रकाश शर्मा झापा क्षेत्र नम्बर १ बाट निर्वाचित भएका छन्।

उनले संसदीय राजनीतिमा तेस्रो प्रयासमा सफलता प्राप्त गरेका हुन्। तर, तेस्रो प्रयासमा शर्माले फराकिलो अन्तरले सान्दार जित हात पारेका छन्।

उनले एमाले उम्मेदवार अग्निप्रसाद खरेललाई पराजित गर्दै जित निकालेका हुन्। शर्माले ३९ हजार ६२४ मत ल्याउँदा प्रतिद्वन्द्वी खरेलले २५ हजार ३४९ मत मात्र प्राप्त गरेका छन्। उनीहरुबीचको मतान्तर करिब १४ हजार बढीको छ।

शर्माले पूर्वमन्त्रीसमेत रहेका एमालेका स्थायी कमिटी सदस्य खरेललाई पराजित गर्दै संसदीय राजनीतिमा प्रवेश गरेका छन्। खरेल र शर्मा बीचको प्रतिद्वन्द्वीतालाई रोचकताका साथ हेरिएको थियो।

संसदीय राजनीतिमा ‘टेस्टेड’ खरेल र विद्यार्थी राजनीतिबाटै चर्चा बटुल्दै पार्टी राजनीतिमा उदाएका शर्माको संसद् यात्राको बाजी कसले मार्छ भन्ने विषयलाई रोचकताका साथ हेरिएको थियो। जसलाई शर्माले आफ्नो पक्षमा पारेका छन्।

शर्माको राजनीतिक जीवन
५२ वर्षीय शर्मा नेपाली कांग्रेसका महामन्त्री हुन्। नेपाल विद्यार्थी संघबाट विद्यार्थी राजनीति सुरु गरेका शर्मा २०५७ मा नेविसंघको केन्द्रीय सभापति भएका थिए। त्यसलगत्तै पार्टी राजनीति गर्न झापा झरेका शर्मा जिल्ला सभापतिको प्रतिस्पर्धामा पराजय व्यहोरेका थिए।

करिब २ दशकदेखि यही क्षेत्रमा केन्द्रित शर्माले जनताबाट यो निर्वाचनबाट अनुमोदित भएर संसद् प्रवेश गर्न चाहना पूरा गरेका छन्। यसअघि शर्माले झापा १ छोडेर अन्यत्रैबाट उम्मेदवार बस्ने चर्चा रहेको थियो।

तर शर्मा आफू मेची किनारको मान्छे भएको भन्दै यहि क्षेत्रबाट उम्मेदवार बन्ने निचोडका साथ झापा पुगेका थिए। त्यसो त शर्मा यसअघिको २०७० र २०७४ को निर्वाचनमा पनि यही क्षेत्रबाट उम्मेदवार बन्दै पराजित भएका हुन्।

२०७४ को निर्वाचनमा वाम गठबन्धन गरेर माओवादी केन्द्रका उम्मेदवार राम कार्कीले शर्मालाई पराजित गरेका थिए। शर्माले ३३ हजार ३१० मत प्राप्त गर्दा कार्की ३६ हजार १७३ मत ल्याएर विजयी भएका थिए। त्यसअघि २०७० को निर्वाचनमा शर्माले एमाले नेता रविन कोइरालासँग पराजय व्यहोरेका थिए।

कांग्रेसको पछिल्लो महाधिवेशनबाट महामन्त्रीमा निर्वाचित भएका शर्मा त्यसअघिको कमिटीमा नेपाली कांग्रेसको प्रवक्ताको जिम्मेवारीमा थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

जनताका समस्यालाई केन्द्रमा राखेर काम गर्न मन्त्री खड्काको निर्देशन

खो खो विश्वकप : महिलातर्फ नेपाल समूह विजेता बन्दै क्वाटरफाइनलमा

दिदीको अश्लील भिडियो बहिनीको मेसेन्जरमा पठाउने पूर्वप्रेमी पक्राउ