ग्राफिक्स: footballwhispers
काठमाडौं– जमर्नीका मिडफिल्डर जोशुआ किमिच सन् २०१८ को विश्वकपमा भएको गल्ती सच्याउन अहिले आतुर छन्। सन् २०१४ को विश्वविजेता जमर्न उच्च मनोबलका साथ आयोजक राष्ट्र रुस पुगेको थियो। एसियन टिम दक्षिण कोरिया र मेक्सिकोसँग अप्रत्याशित हार बेहोरेपछि समूहको पुछारमा रहँदै जर्मन घर फर्कियो।
चार पटकको विश्वविजेता त्यही जमर्न आज (बुधबार) एसियन पावरहाउस जापानसँग प्रतिस्पर्धामा उत्रिँदैछ। ‘हामीसँग अहिले उच्च मनोभावना छ। चार वर्षसम्म हामी ठूलो पीडामा गुज्रियौं। ४ वर्ष सम्मको पखाईमा अब हामी राम्रो गनेछौं,’ किमिचले भनेका छन्, ‘पहिलो खेल ज्यादै नै महत्त्वपूर्ण हुनेछ। गएको युरो कपमा पनि हामीले खेल हार्दाको परिणाम हामीलाई थाहा छ। अब भने हामी जित्ने छौं।’
जर्मनी फिफा वरियतामा ११ औं स्थानमा छ। ‘हामी जापानभन्दा १३ स्थान माथि छौं। यो भन्दैमा ढुक्क हुने अवस्था छैन,’ किमिच भन्छन्।
मंगलबारको साउदी अरेबिया र अर्जेन्टिनाको खेलबाट जर्मन कोच हान्सी फ्लिकले धेरै कुरा बुझेको हुनुपर्छ।
‘हामीलाई थाहा छ, सबैकुरा सम्भव छ। आफ्नो प्रतिद्धन्दीलाई कहिल्यै कम आँक्नु हुँदैन’ प्रशिक्षक फ्लिकले भनेका छन्।
२६ सदस्यीय जापानी टोलीमध्ये ८ जना त जर्मन क्लबबाटै व्यवसायिक फुटबल खेल्छन्। उनीहरुसँग साउथ ह्याम्टनका पूर्व डिफेन्डर तथा जर्मन क्लब साल्केका खेलाडी माया योसिदाजस्ता खेलाडी छन्।
योसिदा भन्छन्, ‘पहिलो म्याच निकै चुनौतीपूर्ण हुनेछ। एक समूहबाट २ वटा जित निकाल्नु निकै महत्त्वपूर्ण र कठिन छ। जर्मनी बलियो टिम हो। तर हामी दुबै एकअर्काका लागि कठिन छौं। हामीसँग पनि राम्रो क्षमता छ। हामी अहिले संगठित छौं। यो हाम्रो बलियो पक्ष हो।’
यता जापानका प्रशिक्षक हाजिमी मोरियासु थप्छन्, ‘खेलाडी र स्टाफहरुले अहिले एउटै चिज महसुस गरिरहेका छौं, हामी अन्तिम १६ मा जान्छौं।’
लगातार सातौं विश्वकपमा प्रतिस्पर्धा गर्दै आएको जापान ३ पटक अन्तिम १६ मा पुगेको छ। अहिलेसम्म त्यो भन्दा अघि बढ्न सकेको छैन।
जमर्नी म्यानचेस्टर सिटीका पूर्व विंगर लोरि साने बिना नै मैदानमा उत्रदैछ। प्रशक्षिणका क्रममा घुँडामा चोट लागेका सानेले आजको खेल गुमाउनेछन्। उता जापानका प्रशिक्षकले आफ्नो टिममा चोटको कुनै चिन्ता नरहेको बताएका छन्।
हेड टु हेड
एसियन ‘पावरहाउस’ र विश्वकपको सदाबहार दाबेदार राष्ट्र जमर्नीको खेल पनि निकै प्रतिस्पर्धात्मक हुने देखिन्छ। यी दुई देश विश्वकपमा पहिलोपटक आमनेसामने हुँदैछन्। विश्वकप बाहेक अहिलेसम्म जापान र जर्मनी दुईपटक आमनेसामने भएका छन्।
सन् २००४ मा भएको मैत्रीपूर्ण खेलमा जर्मनी ३–० ले विजयी भएको थियो। सन् २००६ मा भएको अर्को मैत्रीपूर्ण खेलमा भने २–२ को बराबरी भएको थियो। दुई पटकको मैत्रीपूर्ण खेलमा भएका सातै गोल दोस्रो हाफमा भएका थिए।
जमर्न ४ पटकको विश्वविजेता हो। युरोपियन राष्ट्रबाट धेरै विश्वकप जित्नेको नाममा जर्मनीसँगै इटाली पनि छ। जर्मनीभन्दा बढी विश्वकप जित्ने एकमात्र राष्ट्र ब्राजिल हो। ब्राजिलले ५ पटक जितेको छ।
जर्मनी अहिले २०औं विश्वकप खेल्दैछ। ब्राजिलपछि धेरैपटक विश्वकप खेल्ने देश पनि जर्मनी नै हो। जर्मनीले सन् १९५० को विश्वकप गुमाएको थियो। त्यसयता भने निरन्तर सहभागी हुँदै आएको छ। सन् २०१८ मा बाहेक जर्मनीले हरेक पटक समूह चरण पार गरेको छ।
यता जापानको भने विश्वकपमा लगातार सातौं सहभागिता हो। एसियाली राष्ट्रहरुमा दक्षिण कोरियापछि विश्वकपमा लगातार धेरैपटक भाग लिने राष्ट्र जापान नै हो। दक्षिण कोरियाले लगातार १०औं पटक सहभागिता जनाउँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
