दोहा– सायद यो उनको उमेरको प्रभावले होला वा पेरिस सेन्ट जर्मेनमा उत्कृष्ट लयका कारण। सम्भवत: गत वर्ष खडेरी अन्त्य भएको कोपा अमेरिकाको उपाधिले गर्दा हुनसक्छ।
यो विश्वकपलाई लिएर लिओनल मेस्सीको आफ्नो भिन्नै योजना छ। जसलाई उनी आफैंले स्विकार गरिसकेका छन्।
सोमबार पत्रकार सम्मेलनमा मन्द मुस्कानसहित प्रस्तुत भएका उनी शान्त र खुसी देखिन्थे। पत्रकार सम्मेलनमा सर्वकालीन महान खेलाडीको काँधमा रहेको दबाब हटेको देखिन्थ्यो।
मंगलबार साउदी अरेबियाविरूद्ध सुरु हुने कतार विश्वकपको बाँकी टोलीलाई मनन् गर्दै मेस्सीले भने, ‘मलाई थाहा छैन, यो मेरो करिअरको सबैभन्दा राम्रो समय हो कि होइन। तर, म सहज महसुस गरिरहेको छु। सायद अलि परिपक्व पनि भएको छु। सधैं झैं उत्कृष्ट प्रदर्शन गर्ने र सबै कुरामा आनन्द लिने प्रयास गरिरहेको छु।’
उनले कतार विश्वकप आफ्नो फुटबल करिअरको अन्तिम विश्वकप हुने भन्दै सबैलाई भावुक पारे। र, भने, ‘जुन बेला मैले केही सोचेको थिइनँ, म मात्र खेल्न चाहन्थें। त्यसपछि अघिल्लो खेलको बारेमा सोच्न थालें। (विगतमा) धेरै चिज छुटाएँ, अहिले धेरै कुरा जान्ने मौका पाइसकेको छुँ।’
अर्जेन्टिनाको २६ मध्ये २२ खेलाडी पहिलो पल्ट विश्वकप खेल्न गइरहेका छन्, जसमध्ये २१ वर्षीय थियागो अल्माडा र एञ्जो फर्नान्डेज पनि समावेश छन्। यी सबैका बीच परिपक्व ३५ वर्षीय मेस्सीको काँधमा फेरि अर्जेन्टिनी राष्ट्रिय टोली उभिएको छ।
कोपा अमेरिकाको उपाधि अर्जेन्टिनालाई यसपालिको विश्वकप दिलाउने मुख्य आधार बनेको छ। अर्जेन्टिनाले २८ वर्षको अन्तरालमा प्रतिष्ठित उपाधि जितेको थियो र अहिले ३६ अपराजित खेलको यात्रा तय गर्दै ‘अल्बिसेलेस्ट’ कतार आइपुगेको छ।
के यस्तो अवस्थामा अर्जेन्टिनालाई उपाधि दिलाउँदै मेस्सीले आफ्ना समर्थकहरूको मुहारमा खुसी दिलाउन सक्लान्?
उनी भन्छन्, ‘हामीले भर्खरै एउटा प्रतियोगिता जितेका छौं। यो आश्वस्त पार्ने कुरा हो। यसले फरक तरिकाले काम गर्न सहयोग गर्छ।’
उनले अहिलेको टोलीले आफूलाई सन् २०१४ विश्वकपको सम्झना गराउने गरेको बताए। ‘हामी कसरी खेल्न चाहन्थ्यौं भन्नेमा स्पष्ट छौं। एकताबद्ध पनि। यति राम्रो फर्ममा यहाँ आइपुग्नु ठूलो कुरा हो। किनभने यसले तपाईंलाई आत्मविश्वास दिन्छ,’ उनले पत्रकार सम्मेलनमा भने।
एपी/एजेन्सी
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।