काठमाडौं- विश्वकप फुटबलको समूह ‘ए’ अन्तर्गत दोस्रो खेलमा सोमबार युरोपियन टिम नेदरल्याण्ड्स र अफ्रिकन च्याम्पियन सेनेगल आमनेसामने हुँदैछन्।
नेपाली समय अनुसार सोमबार राति ९ः४५ बजे अल थुमामा रंगाशालामा यी दुईको खेल हुनेछ। फिफा बरियताअनुसार नेदरल्याण्ड्स ८औं स्थानमा छ भने सेनेगल १८औं स्थानमा छ। यी दुईबीच पनि अहिलेसम्म प्रतिस्पर्धा भएको छैन।
सेनेगल अफ्रिकन कप अफ नेसन्स विजेता हो भने नेदरल्याण्ड्स पनि नेसन्स लिगमा उच्च प्रदर्शन गर्दै सेमिफाइनल प्रवेश गरेको टिम हो। जसका कारण यी दुवै टिम उच्च मनोबलका साथ विश्वकपको प्रतिस्पर्धामा उत्रिएका छन्।
सेनेगलका मुख्य फरवार्ड साडिओ मानेले चोटका कारण खेल गुमाएका छन्। तीन पटकसम्म विश्वकपको फाइनल पुगेर पनि उपविजेतामै सीमित रहेको नेदरल्याण्ड्स यो पटक प्रतिभावान खेलाडीले भरिभराउ छ। यी दुवैका लागि आजको खेल निकै कठिन हुने बताइएको छ।
यी दुई टिम आमनेसामने हुँदा धेरैको ध्यान भने मुख्यगरी दुई खेलाडीमा केन्द्रित हुनेछ।
प्लेयर्स टु वाच
कालिडो कौलिबाली
स्टार फरवार्ड साडिओ मानेको अनुपस्थितिमा सेनेगलको केन्द्रमा सेन्टर ब्याक (डिफेन्डर) कौलिबाली छन्। इंग्लिस क्लब चेल्सीबाट व्यावसायिक फुटबल खेल्दै आएका कौलिबली भरपर्दा डिफेन्डर हुन्।
रक्षापंक्तिको बलियो खम्बा मानिने कौलिबालीको सबैभन्दा राम्रो पक्ष उनी संकटमा पनि आत्मविश्वासी देखिन्छन्। विपक्षीसँग ट्याकल गर्न माहिर उनलाई छलाएर बल अगाडि बनाउन विपक्षीलाई हम्मे पर्ने देखिन्छ।
उनी शरीरको माथिल्लो भागले बढी ट्याकल गर्छन् र विपक्षीहरुको सन्तुलन बिगारिदिन्छन्। उनको उत्कृष्ट प्रदर्शनमा सेनेगलले अफ्रिकन कप अफ नेसन्स समेत जितेको छ।
स्टिवन बर्गविजन
डच क्लब आयाक्सबाट व्यावसायिक फुटबल खेल्ने स्टिवन आक्रमणमा निपुण मानिन्छन्। उनको ड्रिबलिङ क्षमताको निकै प्रशंसा हुने गर्छ। उनको गति र ड्रिबलिङ क्षमताले विपक्षी टोलीलाई निकै समस्या पार्ने गर्छ।
यसका साथै उनी राम्रो ‘प्ले मेकर’ समेत हुन् । तर स्ट्राइकर मेम्फिस डिपायएको अनुपस्थितिमा उनलाई फरवार्ड पोजिसनमा खेलाउने सम्भावना पनि उत्तिकै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751037173.png)
-1751036182.jpeg)
-1749826086.png)
