जाजरकोट निर्वाचन: ह्याट्रिक गर्ने दाउमा शक्ति बस्नेत, कमजोर छैन आचार्यको चुनौती

भूपेन्द्र शाह ठकुरी बुधबार, कात्तिक ३०, २०७९ १८:०२

काठमाडौं- ४ मंसिरमा हुने प्रतिनिधि सभा तथा प्रदेश सभाको निर्वाचनको चर्चा देशभर छ। कर्णाली प्रदेशको जाजरकोट जिल्लामा पनि चुनावी माहोल रोचक बनिरहेको छ।

एउटा मात्र निर्वाचन क्षेत्र रहेको जाजरकोटबाट सत्ता गठबन्धनका तर्फबाट शक्ति बस्नेत र नेकपा एमालेका तर्फबाट निरज प्रसाद आचार्य प्रतिस्पर्धामा उत्रिएका छन्। यसका साथै राष्ट्रिय प्रजातन्त्र पार्टी (राप्रपा)का तर्फबाट दीपक खनाल, कांग्रेस विपीबाट झलनाथ वाग्ले, राष्ट्रिय स्वतन्त्र पार्टीका तर्फबाट राजबहादुर शाही र स्वतन्त्र उम्मेदवार नर बहादुर कार्की उम्मेदवार रहेका छन्। २०७४ सालमा जाजरकोटबाटै वाम गठबन्धन (एमाले)को सहयोगमा निर्वाचन जितेका शक्ति बस्नेतको यसपालि एमालकै उम्मेदवार निरज आचार्यसँग कडा प्रतिस्पर्धा हुने देखिएको छ।

को हुन बस्नेत ?
०४१ सालमा अनेस्ववियुको विद्यालय इकाइ समिति र जिल्ला समिति सदस्यबाट राजनीतिक यात्रा प्रारम्भ गरेका शक्ति बस्नेतले ०४७ सालमा नेकपा (मसाल)को सदस्यता लिएका थिए। उनी नेकपा मसालको जिल्ला समन्वय समिति क्षेत्रीय ब्यूरो सदस्य समेत बनेका थिए।

उनी ०५१ सालमा नेकपा (एकता) केन्द्रमा आवद्ध थिए। बस्नेत २०५५ सालमा नेकपा माओवादी केन्द्रका केन्द्रीय सदस्य हुँदै ०५९ सालमा नेकपा माओवादी केन्द्रका पोलिटव्यूरो सदस्य भए।

शक्तिले भेरी कर्णाली, थारुवान जस्ता क्षेत्रीय व्यूरो इन्चार्जको भूमिका निर्वाह समेत गरेका थिए। बस्नेत ०७० सालमा एकीकृत नेकपा माओवादी स्थायी समिति सदस्य हुँदै ०७५मा तत्कालीन नेपाल कम्युनिष्ट पार्टी (नेकपा)का स्थायी समिति सदस्य भए।

माओवादी सशस्त्र संघर्षको समय १२ वर्षसम्म भूमिगत जीवन निर्वाह गरेका बस्नेत दुई पटक प्रहरी हिरासतमा समेत परे। माओवादी सशस्त्र संघर्षमा पूर्ण रुपमा होमिएका उनले पार्टीको भेरी कर्णाली ब्यूरो इन्चार्जको जिम्मेवारी निर्वाह गरे। थारुवान राज्य समिति इन्चार्ज,गण्डक क्षेत्रीय ब्यूरो इन्चार्ज ,केन्द्रीय कार्यालयको मुख्य सचिव, पश्चिम कमाण्ड इन्चार्ज, कर्णाली प्रदेश इन्चार्ज समेत भए।

बस्नेत ०७० सालको संविधानसभा निर्वाचनमा पनि जाजरकोट–१ बाट निर्वाचित भएका थिए। संविधानसभा र व्यवस्थापिका समितिमा रहेर जिम्मेवारी निर्वाह गरिसकेका बस्नेतले ०७४को प्रतिनिधि सभा सदस्य निर्वाचनमा ३२ हजार २ सय ८१ मतका साथ उनले जित हासिल गरे। उनका प्रतिद्धन्द्धी कांग्रेसका राजिवविक्रम शाहले २३ हजार २ सय ८९ मत ल्याएका थिए।

बस्नेत ०६८ सालमा स्वास्थ्य तथा जनसंख्यामन्त्री र ०७२ सालमा गृहमन्त्री भए। उनी ०७४ सालमा वन तथा वातावरण मन्त्री समेत भए।

०७४ मा बस्नेतलाई जिताउन लागिपरेका एमाले केन्द्रीय सदस्य निरज प्रसाद आचार्य यसपटक उनकै प्रतिस्पर्धी छन्। यी दुई पूर्व-सहकर्मीको प्रतिस्पर्धा यसपालि रोचक हुने देखिएको छ।

को हुन् आचार्य?
निरजप्रसाद आचार्य ०६४ देखि संघीय संसदको निर्वाचनमा निरन्तर सिफारिस भइरहे, तर टिकट कहिल्यै पाएनन्। यसपालि भने उनले निटक हात पारे। पहिलो पटक प्रतिनिधि सभा सदस्य निर्वाचनमा होमिएका आचार्यकोे राजनीतिक पृष्ठभूमि पनि रोचक नै छ।

०५४ सालमा १९ वर्षकै उमेरमा उनी जिल्ला विकास समितिको सदस्य भएका थिए। त्यतिबेला देशकै कान्छा जनप्रतिनिधिका रुपमा उनको चर्चा भएको थियो। त्यसअघि ०४७ सालमा प्रजातान्त्रिक राष्ट्रिय संघ (प्ररायु)का कान्छा केन्द्रीय सदस्यका रुपमा पनि उनले चर्चा कमाएका थिए।

०५४ चैतमा सम्पन्न तेस्रो राष्ट्रिय सम्मेलनबाट निरजले केन्द्रीयसँगै, तत्कालीन भेरी अञ्चल संयोजक तथा इन्चार्जको जिम्मेवारी प्राप्त गरे। केपी ओली संस्थापक रहेर ०४७मा गठन भएको प्ररायु संघको समेत सदस्य भएका आचार्य ०५८ मा केन्द्रीय कार्यालय सचिव बने । ०६३मा विराटनगरमा सम्पन्न छैटौँ राष्ट्रिय सम्मेलनबाट उनी संगठन विभाग प्रमुख र लहानमा सम्पन्न सातौँ महाधिवेशनबाट महासचिव बने। ०६२मा आचार्य युवा संघका महासचिव थिए।

स्थानीय निर्वाचनको अंकगणित
गत ३० वैशाखमा सम्पन्न भएको स्थानीय चुनावमा वडाध्यक्ष उम्मेदवारहरूले पाएको मत हेर्ने हो भने जाजरकोटमा एमाले पहिलो दलको रुपमा दर्ज भएको छ।

वडाध्यक्षहरूमा एमालेले २४ हजार ४, कांग्रेसले २२ हजार ३ सय ४२, माओवादी केन्द्रले १८ हजार ६ सय २२ र एकीकृत समाजवादीले २ हजार ३ सय ३४ मत प्राप्त गरेका थिए। हाल जाजरकोटमा लोकतान्त्रिक वाम गठबन्धनले चुनावी तालमेल गरेका छन्। माओवादी केन्द्र, कांग्रेस र एकीकृत समाजवादी पार्टीका वडाध्यक्षहरूको मतभार हर्ने हो भने कुल मत ४३ हजार २ सय ९८ रहेको छ।

स्थानीय तहमा प्राप्त गरेको मतका आधारमा विश्लेषण गर्ने हो भने शक्ति बस्नेतलाई तेस्रो पटक पनि निर्वाचन जित्न सहज देखिन्छ।