काठमाडौं– रेखा शर्मा चुनावी अभियानमा दाङ-२ मा घरदैलोमा छिन्। गठबन्धनकी साझा उम्मेदवार रेखा जनअपेक्षा अनुसार काम गर्ने वाचा जनतामाझ कस्छिन्। तर जनतामा निकै निराशा छ। भन्छिन्, ‘जनताको अपेक्षाभन्दा गुनासा पो धेरै रैछन्।’
अधिकांशको एउटै गुनासो सुन्छिन्, ‘चुनावको बेलामा भोट माग्न आउने, प्रलोभनमा पार्ने, जितेर गए नफर्किने।’ यस्तो प्रवृत्तिको अन्त्य होस् भन्ने जनअपेक्षा रहेको उनी बताउँछिन्।
‘हिजो व्यवस्था बदलियो आज अवस्था बदल्ने आन्दोलनको नेतृत्व गर्न चाहन्छु,' रेखाको अठोट छ।
उनी क्रान्ति, आन्दोलन र विकासको नेता मात्र हैन अब समृद्धिको नेता बन्ने बताउँछिन्। ‘म जहाँ जहाँ मतदाताकोमा गएँ। जनताले निष्ठाको राजनीति गर्ने मान्छे खोजेका छन्। मेरो संकल्प त्यही छ,’ उनी भन्छिन्।
२०४२ सालदेखि अनेरास्ववियुको स्कुल इकाइ कमिटीबाट रेखाले राजनीतिक यात्रा तय गरिन्। विसं २०५१ मा योङ्ग कम्युनिस्ट लिगको केन्द्रीय सदस्य, माओवादीको केन्द्रीय सदस्य हुँदै अनेमसंघ क्रान्तिकारीको अध्यक्षसमेत भइसकेकी छन् रेखा।
यस क्षेत्रमा गठबन्धनका मुख्य दल कांग्रेस, माओवादी, एकीकृत समाजवादी र जनमोर्चा छन्। उनका प्रतिस्पर्धी भने नेकपा एमालेका महासचिव शंकर पोखरेल हुन्। यो त्यही क्षेत्र हो, जहाँबाट २०७४ मा तत्कालीन वाम गठबन्धनका उम्मेदवार कृष्ण बहादुर महरा निर्वाचित भएका थिए।
यस क्षेत्रमा स्थानीय तहको मतअनुसार भने माओवादी पछि छ। ‘भर्खरै भएको स्थानीय तहको निर्वाचनको मत गनेर अहिले विश्लेषण गर्न मिल्दैन। बरु २०७४ को मतलाई आधार मान्न सकिन्छ,' उनी भन्छिन्। उनी गठबन्धनको सबै मत आफूतिर तानिने भएकाले जित सुनिश्चित रहेकाे दाबी गर्छिन्। एमालेको भन्दा गठबन्धनको मत करिब ५ हजारले अगाडि रहेकोले जित निकाल्न सकिने अनुमान रेखाको छ।
रेखा पहिलो संसदीय यात्राका लागि प्रतिस्पर्धा भने गरिरहेकी होइनन्। यसअघि २०७० मा भएको संविधान सभाको निर्वाचनमा उनी समानुपातिकबाट निर्वाचित भएकी थिइन्। दोस्रोपटक २०७४ मा पनि समानुपातिकबाटै प्रतिनिधि सभा सदस्यमा निर्वाचित भएकी थिइन्।
यसपटक माओवादी नेता कृष्ण बहादुर महराले चुनाव नलड्ने भएपछि टिकट रेखाको हातमा पर्यो।
उनी चुनाव अंकगणित मात्र नभएको बताउँछिन्। ‘यो अजेण्डाको प्रतिस्पर्धा पनि हो’, उनी भन्छिन्।
माओवादीको मूल अजेण्डा संविधान र लोकतन्त्रको रक्षा, निरंकुशताको विरुद्ध, समावेशीताको रक्षा रहने उनकाे बुझाइ छ। ‘जे बोल्छु त्यसलाई पूरा गर्ने प्रयत्न गर्नेछु’, उनी भन्छिन्।
प्रतिनिधिसभा स्थानीय तह जस्तो नभएको रेखा बताउँछिन्। 'स्थानीय सरकारले विकासमा केही फरक ल्याउँछ। तर, संघ भनेको नियम कानुन बदल्ने ठाउँ हो। संसदले कानुन बदल्ने हैसियत राख्छ। यसमा संविधान र लोकतन्त्रको रक्षा गर्नका लागि यहाँका जनता विमुख नहुनेमा म विश्वस्त छु,' उनी भन्छिन्।
उनी आफ्ना जित्ने आधार पनि प्रस्तुत गर्छिन्, ‘व्यक्तिगत रुपमा मैले राम्रो काम गर्न सकिन हुँला तर गलत गरेको छवि छैन । मेरा जित्ने आधार यिनै हुन्।’
०७२ मा माओवादीको प्रमुख सचेतक, ०७० मा माओवादी केन्द्रको संविधानसभा संसदीय दलको सचेतक र ०७२ मा सामान्य प्रशासन मन्त्रीको जिम्मेवारी संहालेको अनुभव रेखासँग छ। उनी सांसद हुँदा राज्य व्यवस्था समितिमा पनि निर्णायक भूमिका खेलेकी छन्।
उनी महिलाका मुद्दामा आफू संवेदनशील भएको दाबी गर्छिन्। ‘म लामो समय महिला आन्दोलनमा क्रियाशील भएर वा महिला उत्पीडन भोगेर आएर पनि हुनसक्छ। महिलाका मुद्दामा मेरो भावनात्मक सम्बन्ध छ,’ उनी भन्छिन्।
उत्पीडीत समुदायको पक्षमा कानुन निर्माण गर्ने कुरामा संसदमा आफ्नो अडान रहने उनी बताउँछिन्।
उनका प्रतिद्वन्द्वी शंकर पोखरेललाई 'हेभिवेट' भनेर गरिएको सम्बोधनमा रेखाको आपत्ति छ।
‘चुनाव अजेण्डामा लड्ने हो 'वेट' मा होइन। उहाँ अग्र हुनुहोला तर वर्तमान आन्दोलनको प्राप्ति, संविधान निर्माणमा खेलेको भूमिका, कानुन निर्माणमा संसदमा निभाएको मेराे भूमिका पनि कुनै हेभिवेट भन्दा कम छ र ?’ उनको प्रश्न छ, ‘यो व्यवस्था भुइँ मान्छेलाई माथि ल्याउने व्यवस्था हो। त्यसैका लागि समानुपातिक व्यवस्था ल्याएका हौँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
