काठमाडौं- ललितपुर- १ मा नेकपा एमालेका नवराज सिलवाल र नेपाली कांग्रेसका उदयशमशेर जबराबीच चुनावी प्रतिस्पर्धा हुँदैछ। अहिलेसम्म यो क्षेत्रबाट एक-एक पटक जित हासिल गरेका यी दुवै उम्मेदवार दोस्रो जितको खोजीमा छन्।
को हुन् सिलवाल?
सिलवाल नेपाल प्रहरीका पूर्व डिआइजी हुन्। उनी प्रहरी प्रमुख बन्ने दौडमा अन्तिम समयमा असफल भएपछि राजनीतितिर मोडिएका थिए।
प्रहरी सेवावाट अलग भएपछि उनलाई २०७४ सालको निर्वाचनमा नेकपा एमालेले ललितपुर– १ बाट उम्मेदवार बनायो। एमाले र माओवादीको वाम गठबन्धनका साझा उम्मेदवार सिलवालले पहिलो प्रयासमै सफलता हासिल गरे। उनी उदयलाई पराजित गर्दै संसद् भवन प्रवेश गरे।
आसन्न निर्वाचनमा सिलवाल दोस्रो जित निकाल्ने प्रयासमा छन् भने राणा पाँच वर्षअघिको हारको बदला लिने पक्षमा छन्।
२०७४ को प्रतिनिधि सभा निर्वाचनमा रहेको राजनीतिक समीकरण र अहिलेको राजनीतिक समीकरण भने फरक छ।
के छन् सिलवालका अजेण्डा?
सिलवाल १० वटा संकल्प लिएर मतदातामाझ घरदैलोमा व्यस्त छन्। ललितपुरको विकासलाई नयाँ उचाइबाट अगाडि बढाउन विज्ञहरुसँगको सहकार्यमा ललितपुर इन्जिनियरिङ टास्कको बृहत परियोजनाको विकास गरिएको उनले उल्लेख गरेका छन्। आफ्नो माटोका लागि केही ऐतिहासिक काम गरेर देखाउने तयारीमा भएको समेत उनको घोषणापत्रमा उल्लेख छ।
१० संकल्पमध्ये प्रविधि सहजीकरण अभियान एउटा विशेष संकल्प भएको उनी बताउँछन्। जनताको सेवा प्रवाह र उन्नतिलाई प्रविधिसँग जोड्ने यो अभियानमार्फत आफ्ना मतदाताको सेवामा लाग्ने उनले बताएका छन्। प्रविधिमा सहजीकरण गर्ने अभियान सशक्त रुपमा अगाडि बढाउने सिलवालले उल्लेख गरेका छन्।
स्वास्थ्य सेवा जनताको मौलिक अधिकार भएको तर थुप्रै प्राविधिक कारण आम जनताले संविधानले सुनिश्चित गरेको मौलिक अधिकारको उपयोग गर्न नपाएको उनी बताउँछन्। उनले आफ्नो घोषणापत्रमा आधारभूत स्वास्थ्य सुविधा राज्यको तर्फबाट प्रदान गर्न प्राविधिक रुपमा रहेका बाधाहरुलाई हटाएर, ललितपुरलाई स्वाथ्य सेवामा नमुना क्षेत्र बनाउने तयारीमा आफू रहेको उल्लेख गरेका छन्।
‘जनताको सेवाका लागि इमान्दार प्रयत्न गरेर अबका दिनमा अझ बढी योजनाबद्ध, गुणस्तरीय, स्पष्ट र भिजनरी काम गरेर देखाउने तयारी गरेको छु,’ उनी भन्छन्, ‘हाम्रो इमान्दार प्रयासमा हजुरहरुको सहकार्य र हातेमालो देखेर मनदेखिको सेवाभाव र दृढ आत्मविश्वासको उचाइ चुलिएको छ। ललितपुरवासीको जित सुनिश्चित छ।’
को हुन् राणा?
राणा यो क्षेत्रका लागि पुरानै अनुहार हुन्। उनी २०६४ सालदेखि निरन्तर उक्त क्षेत्रमा उम्मेदवार हुँदै आएका छन्। नेपाली कांग्रेसका पुराना नेता सागरशमशेर राणाका छोरा उदय बाबुको विरासत कायम गर्ने भन्दै चुनावी मैदानमा छन्।
के छन् राणाका अजेण्डा?
ललितपुर- १ बाट सत्ता गठबन्धनको साझा उम्मेदवारका रुपमा नेपाली कांग्रेसका नेता राणा चुनावी प्रतिस्पर्धमा छन्। ५२ वर्षीय राणा यस पटक समेत गरेर चौथो पटक ललितपुर–१ बाट चुनावी प्रतिस्पर्धामा उत्रिएका हुन्। अन्तर्राष्ट्रिय सम्बन्धमा अमेरिकाबाट स्नातकोत्तर (एमए) सम्मको अध्ययन गरेका राणाले २०४६ सालमा नेविसंघको सदस्यता लिएर आफ्नो राजनीतिक यात्रा सुरु गरेका थिए।
नेपाल तरुण दल ललितपुरको अध्यक्ष हुँदै आफ्नो राजनीतिक यात्रालाई अगाडि बढाउन सफल राणा नेपाल तरुण दलको केन्द्रीय अध्यक्ष समेत भइसकेका छन्। उनी अहिले नेपाली कांग्रेसका केन्द्रीय सदस्य हुन्। उनी राष्ट्रिय योजना आयोगमार्फत जारी नेपालको भिजन २०३० का अभियन्ता पनि हुन्।
२०७० सालको संविधान सभा निर्वाचनमा विजयी भएका राणा अर्थ राज्यमन्त्रीसम्म बनेका थिए। उनी २०७४ को निर्वाचनमा वाम गठबन्धनका उम्मेदावर नवराज सिलवालसँग पराजित भएका थिए।
राणाले पूर्वाधारको विकास, शिक्षा र स्वास्थ्यलाई मुख्य प्राथमिकतामा राख्दै चुनावी प्रतिवद्धतापत्र सार्वजनिक गरेका छन्।
उनको प्रतिवद्धतापत्रमा संघीय लोकतान्त्रिक गणतन्त्रात्मक संविधानको रक्षाका लागि एकतावद्ध अभियान, स्थिर सरकार र आर्थिक समृद्धिका लागि लोकतान्त्रिक वाम गठबन्धनलाई मतदान गर्न आग्रह गरिएको छ।
राणाले समावेशी विकास, सडक तथा पूर्वाधार विकास, शिक्षा, सञ्चार तथा सूचना, स्वास्थ्य तथा स्वस्थ मानव जीवन, खानेपानी सरसफाइ तथा सिंचाइ, धार्मिक तथा पर्यटकीय विकास, कला संस्कृति र खेलकुद, आवास व्यवस्थापन र कृषि पशुपालनमार्फत जीविकोपार्जनका लागि आफ्ना एजेण्डाहरु मतदाता समक्ष राखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
