काठमाडौं– आगामी मंसिर ४ गते हुने प्रतिनिधि सभा निर्वाचनमा अछाम क्षेत्र नम्बर २ बाट नेकपा एमालेका तर्फबाट पूर्व सांसद यज्ञबहादुर बोगटी उम्मेदवार बनेका छन्।
२०७४ को निर्वाचनमा माओवादीसहितको गठबन्धनबाट जितेका बोगटी यसपटक उही माओवादी र एमालेबाट टुक्रिएर बनेको एकीकृत समाजवादीको साथ पाएका कांग्रेसका उम्मेदवारसँग भिड्दैछन्।
मतान्तर हेर्दा गठबन्धन बलियो देखिएको यस क्षेत्रमा आफ्नो राजनीतिक र व्यक्तिगत प्रभावका कारण चुनाव जित्ने दाबी बोगटीले गरेका छन्। चुनावका लागि मतदातासँग जाँदा तय गरिएका अजेण्डा, जितको आधार र लक्ष्यलगायतका विषयमा भोगटीसँग नेपाल लाइभका भूपेन्द्र शाह ठकुरीले गरेको कुराकानीः
तपाईंले आफ्नो क्षेत्रका मतदातामाझ आफूलाई कसरी प्रस्तुत गरिरहनुभएको छ?
मेरो राजनीतिक यात्राका विषयमा भन्नुपर्दा म एक सामान्य किसानको छोरा हुँ। हलि गोठालोको छोरा हुँ। सामान्य अवस्थादेखि संघर्ष गर्दै आफ्नो पहिचान बनाएको हुँ। यहाँका जनताका समस्या पनि बुझेको छु।
अहिले पनि हाम्रो क्षेत्र गरिबीको रेखामुनि छ। यहाँको विकासको अवस्था पनि उस्तै छ। त्यसैले यहाँका जनताको दैनिकी सुधार र विकासका लागि मतदाताले एमाले रोज्नेछन्। शिक्षा, स्वास्थ्य लगायत जनतालाई सुखी र समृद्ध बनाउन एमाले नै अहिलेको आवश्यकता हो।
एमालेको विचार, नीति र सिद्धान्तबाटै मुलुकको समृद्धि सम्भव छ भन्ने कुरा जनताले बुझेका छन्। पार्टीका नीति, सिद्धान्तसहित मैले स्थानीय स्तरमा गर्नसक्ने कामबारे अजेण्डा लिएर मतदातासामू आफूलाई प्रस्तुत गरेको छ।
तपाईंले कस्ता अजेण्डा र प्रतिबद्धता मतदाताबीच लिएर जानुभएको छ?
गत निर्वाचनमा एमालेको घोषणपत्रअनुसार जसरी मलाई क्षेत्र नम्बर २ का मतदाताले निर्वाचित गराएका थिए, यसपटक पनि तिनै प्रतिबद्धतालाई निरन्तरता दिएको छु। विकासका सन्दर्भमा तिनै प्रतिबद्धता छन्। त्यतिबेलाका प्रतिबद्धता अनुसार कामको थालनी पनि भएको छ। अब ती कामहरु सफल बनाउनका लागि पुनः मौका दिन मैले मतदातासँग अपिल गरिरहेको छु।
दोस्रो पटक जितका लागि अपिल गर्न जाँदैगर्दा तपाईंप्रति जनताको अपेक्षा कस्तो पाउनुभयो?
अहिलेसम्म जनताका बीचमा गइरहँदा उनीहरुले मलाई आफ्नो क्षेत्रको आवाज सदनमा पुर्याउने नेताका रुपमा चिनेको पाएको छु। पञ्चायत र बहुदलमा सदनमा छिरेका नेताभन्दा जनतालाई मलाई भिन्न तरिकाले बुझेका छन्। यस क्षेत्रको विकासका लागि मैले सदनमा उठाएका आवाजलाई मतदाताले सकारात्मक रुपमा लिएका छन्।
अघिल्लो कार्यकालमा सुरु गरेका विकास निर्माणका काम पूरा गर्नका लागि पुनः सदनमा पुग्नुपर्ने मतदाताको चाहना छ। अब जाँदा रोजगारी, स्वास्थ्य, शिक्षामा गुणस्तरीयता, विद्युतिकरण लगायतका विषयवस्तुमा पहल गर्नुपर्ने अपेक्षा मतदाताले राखेका छन्।
तपाईंले जित्ने आधार के हो? स्थानीय तहको अंकगणित के छ?
मेरो जित्ने आधार भनेको जनता नै हुन्। अंकगणित भनेको त परिणम आइसकेपछि मात्र भन्न सकिने कुरा हो। स्थानीय तहको परिणाम प्रतिनिधि सभामा लागू नहुन पनि सक्छ। जनताको पक्षमा काम गरेको छु। आफ्नो क्षेत्रमा गरिब, निमुखा, किसान र यहाँका युवाको पक्षमा आवाज उठाउँदै आएको छु।
तपाईंको क्षेत्रमा सत्तारुढ गठबन्धन नै मैदानमा छ। विपक्षी प्रति तपाईंको मूल्यांकन कस्तो छ, कत्तिको चुनौतीको महसुस गर्नुभएको छ?
मलाई के लाग्छ भने गठबन्धन विपक्षी केन्द्रका नेताहरुले गरेका छन्। जिल्लाका केही नेताहरुले गठबन्धन गरेका हुन सक्छन्। जनताले गठबन्धन गरेका छैनन् भन्ने मैले आभास गरेको छु। जनता चाहिँ स्वतन्त्र छन्।
जनताले आफ्नो मत अभिमत, मूल्या्रकन गरेका छन। उनीहरु यस क्षेत्रको विकासलाई हेर्न चाहान्छन्। यस क्षेत्रको विकासका लागि जनता स्थानीय तहको अंकगणितको पक्षमा जानेवाला छैनन्।
हिजो तिनै जनताले मलाई मत दिएर विजयी गराएका हुन्। अहिले पनि त्यसलाई निरन्तरता दिनेछन्।
यसअघि पनि तपाईं यही क्षेत्रबाट सदनमा पुग्नुभयो, फेरि किन दोहोरिन खोज्नुभएको हो?
यस क्षेत्रको आमुल परिवर्तन, समृद्धि, आर्थिक अवस्थालाई सुधार गर्नका लागि अघिल्लो कार्यकालमा केही कामको थालनी भएको छ। ती पूरा हुन सकेका छैनन्। पाँच वटा पालिका रहेको यस क्षेत्रमा जिल्ला सदरमुकाम पनि छ। एमालेको सरकार हुँदा ५० बेडको अस्पताल बनाएर मंगलसैन अस्पतालालाई स्तरोन्नति गर्ने निर्णय भएको थियो।
त्यो सुरु हुन सकेको छैन। जनताको प्रत्यक्ष सरोकारसँग जोडिएका योजनाहरु पूरा गर्नका लागि पनि मैले जित्नु आवश्यक छ।
मंगलसैन–जंगलघाटदेखि चिसापानीसम्मको बाटो छ। जंगलघाटमा पक्की पुलको टेन्टर हालेर अघि बढाएका छौं। यही बाटोलाई अघि बढाउनका लागि पनि यस क्षेत्रमा मेरो आवश्यकता छ।
त्यसका साथै साँफेदेखि हिल्सा जाने बाटो छ। त्यसलाई त्रिदेशीय नाकालाई जोड्ने सडकको रुपमा विकास गर्नका लागि पनि मेरो पनि आवश्यकता छ।
त्यसका साथै पर्यटन क्षेत्रको पूर्वाधार, धार्मिक क्षेत्रको विकास गर्नका साथै स्थानीय स्तरमा उद्योग स्थापनका लागि पनि एमालेले जित्नु आवश्यक हो।
एमालेले पाँच वर्षमा २० वटा ग्यारेन्टी दिएको छ। त्यो ग्यारेन्टी पूरा गर्ने क्षमता एमालेमा छ। जो जनताको जीवनसँग जोडिएका छन्, ती पूरा गर्नका लागि पनि मैले फेरि सदनमा जानु आवश्यक हो।
तपाईं फेरि निर्वाचित हुनुभयो भने कस्ता विषयलाई सदनमा प्रस्तुत गर्नुहुन्छ?
यस क्षेत्रको गरिबी, अभाव, जनताको दैनिकी नै मेरा पहिला प्राथमिकता हुनेछन्। विकासको सन्दर्भमा हिजो पनि आवाज उठाएकै हो। फेरि पनि त्यो क्रम निरन्तर हुनेछ।
यसका साथै राष्ट्रियताको सवालमा हाम्रो भूमि मिचिएको छ। सुदूरपश्चिमकै क्षेत्र बढी चर्चित भएकाले पनि त्यो विषयलाई सशक्तताका साथ उठान गर्नेछु। अहिले नेपाललाई सिक्किमीकरण गरिँदैछ, त्यसका विरुद्ध डटेर लड्नुछ। स्थानीय विकासका सवाल मात्र नभई राष्ट्रियताका विषयमा पनि मेरो आवाज उठ्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
