अघिल्लो हारको बदला लिने दाउमा शाह, दोहोरिन खोज्दै बोगटी

राजनीति

अछाम २ निर्वाचन:अघिल्लो हारको बदला लिने दाउमा शाह, दोहोरिन खोज्दै बोगटी

भूपेन्द्र शाह ठकुरी बिहीबार, कात्तिक २४, २०७९ २०:३०

काठमाडौं– आगामी मंसिर ४ गते हुने प्रतिनिधि सभा निर्वाचनमा अछाम क्षेत्र नम्बर २ बाट नेकपा एमालेका यज्ञबहादुर बोगटी र नेपाली कांग्रेसका पुष्पबहादुर शाह चुनावी प्रतिस्पर्धामा छन्।

यसका साथै यस क्षेत्रबाट राष्ट्रिय प्रजातन्त्र पार्टीका मिनबहादुर शाही, नेपाल मनजदुर किसान पार्टीका झंकरबहादुर शाही र स्वतन्त्रबाट चन्द्रप्रसाद ढुंगाना पनि प्रतिस्पर्धामा छन्।

अछाम क्षेत्र नम्बर २ अन्तर्गत तुर्माखाँद गाउँपालिका, ढकारी गाउँपालिका, कमल बजार नगरपालिका, मंगलसैन नगरपालिका र पञ्चदेवल नगरपालिका गरी पाँच वटा स्थानीय तह छन्।

अघिल्लो हारको बदला दिने दाउमा शाह

कांग्रेसका शाह यसपाली अघिल्लो निर्वाचनमा भोगेको पराजयको बदला लिने दाउमा छन्। भरत स्वारलाई पराजित गर्दै जिल्ला सभापति बनेका शाह पार्टी सभापति शेरबहादुर देउवा निकट मानिन्छन्।

उनी भन्छन्, ‘म जिल्ला नछाड्ने नेता हो। जस्तो सुकै अवस्थामा पनि यहाँका जनतासँगै छु। राजनीतिलाई पेशाका रुपमा नभई सेवाका रुपमा लिएको छु। त्यसैले पनि क्षेत्र नम्बर २ का जनताले मलाई विश्वास गर्नेछन्।’

दोहोरिने दाउमा बोगटी?

यसअघि २०७४ सालको निर्वाचनमा यस क्षेत्रबाट नेकपा एमालेबाट यज्ञबहादुर बोगटीले जितेका थिए। बोगटी २०४७ सालमा अनेरास्ववियु प्रारम्भिक कमिटीको सदस्य, २०५० मा अनेरास्ववियु जिल्ला कमिटी सचिव, २०५२ मा जिल्ला संयोजक, २०५४ मा नेकपा माले जिल्ला कमिटी सदस्य भएका थिए। उनी २०६५ मा एमाले जिल्ला कमिटीको सचिवसमेत भए।

बोगटी २०७४ को निर्वाचनमा वाम गठबन्धनबाट उम्मेदवार बनेका थिए। यसपटक पनि क्षेत्र नम्बर २ बाट प्रतिनिधि सभाका उम्मेदवार बनेका बोगटी जित दोहोर्‍याउने प्रयासमा छन्।

अघिल्लो निर्वाचनमा उनै बोगटीसँग पराजित भएका कांग्रेसका पुष्पबहादुर शाह यसपटक सत्ता गठबन्धनका साझा उम्मेदवार हुन्।

बोगटीले गठबन्धन आफ्नो जितको मार्गमा ठूलो चुनौती नभएको बताएका छन्। उनी भन्छन्, ‘मलाई लाग्छ अछामी जनता गठबन्धनको पक्षमा छैनन्। केन्द्रमा होला, एक दुई नेताहरु होलान। तर, जनता छैनन्। म एउटा हलि गोठालोको छोरा हुँ। यहाँका जनताको हरेक समस्यामा साथ उभिएको छु। त्यसैले पनि जनताले मलाई साथ दिनेछन्।’

स्थानीय तह निर्वाचनको अंकगणित कस्तो छ?
अछाम क्षेत्र नम्बर २ अन्तर्गत पर्ने स्थानीय तहमा गत बैशाखको स्थानीय तह निर्वाचनमा वडाध्यक्षले पाएको मत हेर्दा गठबन्धनमा आवद्ध दलको मत एमालेभन्दा निकै अघि देखिन्छ।

स्थानीय निर्वाचनमा पाएको मत सबै गठबन्धनका उम्मेदवारलाई जाने हो शाहको जित निश्चित देखिन्छ। यद्यपि प्रतिनिधि सभाको निर्वाचन भएकाले व्यक्तिगत प्रभावले पनि फरक पार्नसक्छ।

तुर्माखाँद गाउँपालिकामा कांग्रेसले ३ हजार ९९१, एमालेले ३ हजार १०५, माओवादी केन्द्रले ३ हजार १७५ मत पाएका थिए। त्यसैगरी ढकारी गाउँपालिकामा कांग्रेसका वडाध्यक्षले ३ हजार १६०, एमाले २ हजार ५९६, नेकपा एकीकृत समाजवादीले एक हजार ६०५ मत प्राप्त गरेका छन्।

कमल बजार नगरपालिकामा कांग्रेसका वडाध्यक्षले ३ हजार ६२८, एमाले ४ हजार ४२, माओवादी केन्द्र २ सय ५४, नेकपा एसले १८ मत पाएका छन्।

त्यस्तै पञ्चदेवल नगरपालिकामा कांग्रेसले ३ हजार ८५८, एमाले २ हजार ३३२, माओवादी केन्द्र २ हजार ६५ र नेकपा एसले ५०४ मत प्राप्त गरेका छन्।

मंगलसैन नगरपालिकामा कांग्रेसले ४ हजार १५३, एमालेले ५ हजार ८७६, माओवादी केन्द्रले ४४६ र समाजवादीले ४८ मत पाएका थिए। कमल बजारमा कांग्रेसले ३ हजार ६२८, एमालेले ४ हजार ४२, माओवादीले २५४ र समाजवादीले १८ मत पाएका थिए।

जसलाई गठबन्धन दल कांग्रेस, माओवादी र नेकपा एसको कूल मत हेर्दा ३० हजार २२० रहेको छ भने नेकपा एमालेका वडाध्यक्षले पाएको कूल मत १७ हजार ९४२ देखिन्छ। यो अवस्थालाई हेर्ने हो भने गठबन्धनमा आवद्ध दल १२ हजार २ सय २७८ मतले अगाडि छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।