काठमाडौं– नेपाली कांग्रेस अछामका जिल्ला सभापति पुष्पबहादुर शाह अछाम २ बाट प्रतिनिधि सभाको निर्वाचनमा होमिएका छन्। शाह यसअघि २०७४ सालमा एमालेका यज्ञबहादुर बोगटीसँग पराजित भएका थिए।
शाह यसपटक जसरी पनि जित्ने उद्देश्यसहित घरदैलो अभियानमा छन्। शाहका चुनावी अजेण्डा के छन्? निर्वाचनमा जित्ने आधार कस्ता छन्? लगायतका विषयमा नेपाल लाइभका भूपेन्द्र शाह ठकुरीले गरेको कुराकानीः
तपाईंको चुनावी क्षेत्रमा राजनीतिक यात्रा, मान्यता र उद्देश्यलाई कसरी प्रस्तुत गर्नुहुन्छ?
म लामो समयदेखि राजनीतिमार्फत् अछामी जनताको सेवामै लागेको छु। राजनीतिमार्फत् समाजसेवालाई नै प्राथमिकताका साथ राखेर अघि बढिरहेको छु। जनताको सेवाप्रति जीवनलाई समर्पित गर्दै अझै त्यसलाई नै अगाडि बडाउने लक्ष्य हो।
विगतको राजनीतिक यात्रा र योगदानका आधारमा चुनावका मुखमा देखा परेका चुनौती चिर्दै अघि बढिरहेको छु। राजनीतिमा लागेदेखि जनताको सेवा नै प्रधान हो भन्ने मान्यता राखेको छु। सोही अनुसार निर्वाचनमा होमिएको छु।
यति बेला तपाईं घरदैलो अभियानमा हुनुहुन्छ? मतदातासँग पार्टीगत र व्यक्तिगत रुपमा कस्ता प्रतिबद्धता(अजेण्डा) लिएर प्रस्तुत गर्दै हुनुहुन्छ?
हाम्रो पार्टीको घोषणापत्र सार्वजनिक भइसकेको अवस्था छ। त्यसका साथसाथै स्थानीय स्तरको आवश्यकता अनुसार के–के गर्न सकिन्छ? त्यसलाई पनि परिमार्जन गरेर आफ्नो प्रतिबद्धता सार्वजनिक गरेको छु।
विशेष गरेर जनतासँग सरोकार राख्ने विषयवस्तुहरुलाई प्राथमिकतासाथ उठान गरेको छु। परिवर्तन त धेरै भयो। जनताको जीवनशैलीमा अझै परिवर्तन आउन सकेन। अब त्यो परिवर्तन ल्याउनका निम्ति, सुशासनको अनुभूति दिलाउनका लागि पनि मेरो अभियान जारी छ।
जनताको घरदैलो गर्दा, मतदाताहरुसँग भेट्दा अछामी जनता र विशेष गरी दुई नम्बर क्षेत्रका जनताको प्रत्यक्ष जीवनशैलीसँग जोडिएका विषयवस्तुलाई बोकेर म निर्वाचनमा मात्र नभई अन्य बेला पनि जाने गरेको छु।
तपाईले घरदैलो अभियान गर्दैगर्दा जनताको अपेक्षा के पाउनु भयो?
जनताको प्रतिक्रिया त के हो? त भन्दा राजनीति दलप्रति जनताको आक्रोशित भाव देखिन्छ। नेताप्रति जनताको जुन गुनासो छ, त्यसलाई सम्बोधन गर्दै हामीले राजनीतिलाई पेसाभन्दा पनि सेवाको रुपमा हो बुझाउन सक्नुपर्छ।
यदि उनीहरुलाई प्रष्ट पार्न सकेनौं भने जनतामा निरासा छाउन सक्छ। मेरो विशेष अभियान जनताको जीवन कसरी सुधार गर्न सकिन्छ भन्ने नै हो। हरेक परिवर्तनमा जनताले साथ दिने गरेका छन्। जनतालाई कुनै हालतमा पछि पार्न हुँदैन। पछाडी परेका, अल्पसंख्यक, दलित, उत्पीडित वर्गहरुलाई पनि विशेष सम्बोधन गर्नुपर्छ। अहिलेको मुख्य उद्देश्य यही नै हो।
तपाईं यसअघि २०७४ को निर्वाचनमा पराजित हुनुभयो। विपक्षीप्रति तपाईंको मूल्यांकन के छ? कत्तिको चुनौती महसुस गर्नु भएको छ?
विपक्षीसँग हाम्रो त्यस्तो खासै चुनौती केही छैन। जनता नै सर्वोपरी हुन्। जनताले नेता र दलको कामको मूल्यांकनका आधारमा मत दिने हुन्। विपक्षीसँग दलीय हिसाबमा त मूल्यांकन हुनैपर्छ।
उनीहरुले आफ्नो कार्यकालमा के गरे? जनताको सेवादेखि सदनसम्म प्रष्ट नै छ। अहिले विपक्षी पनि चुनावमा होमिएका छन्। तर, कुरा के हो भने विपक्षीसँग पनि हामीले सौहार्द किसिमको वातावरण अपनाउने हो। जनताको मन जितेर अगाडि बढ्ने हो। कसैसँग तुष राखेर जानु हुँदैन भन्ने मेरो मान्यता हो।
तपाईं निर्वाचनमा होमिँदै गर्दा तपाईंको जित्ने आधार के हो?
निर्वाचन जित्ने आधार भनेको मेरो व्यक्तिगत कारण पनि छ। २०७४ सालको निर्वाचनमा म लड्दै गर्दा त्यतिबेला एमाले गठबन्धनमा थियो। त्यतिबेला उम्मेदवारसँग म झिनो मतले पराजित हुन पुगेँ। अहिले त के हो भने गठबन्धनको ध्यान यता तिर छ। मैले आफ्नो बलबुताले भ्याएसम्म म जहिले पनि जनताकैबीचमा रहने मान्छे हो।
म जनतासँग रमाउने, जिल्लामै बस्ने, जनताका हरेक समस्याहरु, चाहे प्रशासनिक होस् या न्यायिक वा अन्य सामाजिक क्षेत्रका समस्यामा साथ उभिने गरेको छु। त्यसका साथै अहिले हाम्रो संगठन त्यति कमजोर पनि छैन। गठबन्धनको ऊर्जासहित हाम्रो संगठन पनि शक्तिशाली छ। त्यसकारण म क्षेत्र नम्बर दुईमा निर्वाचित हुने पूर्ण विश्वासमा छु।
तपाईंले निर्वाचन जित्नुभयो भने सदनमा कस्ता विषयहरु उठान गर्नुहुन्छ?
हामीले ठूलो त्याग, तपस्या र बलिदानले लोकतान्त्रिक गणतन्त्र स्थापना गरेका हौं। एकातर्फ लोकतन्त्र र गणतन्त्रलाई बलियो पार्ने, राष्ट्रियताका सवालका विषयहरु छन्। अर्काेतर्फ दुई तिहाईको सरकारले सदन विघटन गर्यो। संवैधानिक मूल्य मान्यताहरुलाई स्थापित गर्ने विषयका साथै अछामी जनताका दैनिकीसँग जोडिएका विषयहरु छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749277953.jpg)
-1764146706.png)
