फाइल तस्बिर
काठमाडौं– नेकपा माओवादी केन्द्रका अध्यक्ष पुष्पकमल दाहालले २०६३ मंसिर ५ मा हस्ताक्षर भएको विस्तृत शान्ति सम्झौतालाई ‘जय नेपाल’ र ‘लालसलाम’ एकै ठाउँमा उभिएको दिनको रुपमा अर्थ्याएका छन्।
‘हामीले १२ बुँदे समझदारी गर्यौं। त्यतिबेला एक हदसम्म जय नेपाल र लालसलाम एक ठाउँमा आए, १२ बुँदे समझदारीमा। त्यसपछि विस्तृत शान्ति सम्झौता भयो’, गोरखाको अजिरकोट–३, भच्चेकमा आयोजित चुनावी सभालाई सम्बोधन गर्दै प्रचण्डले भने, ‘जुन दिन गिरिजाप्रसाद कोइराला र मैले एउटै कागजमा हस्ताक्षर गरेर देशमा युगान्तकारी परिवर्तनको प्रक्रिया सुरु भयो। त्यही दिन जय नेपाल र लालसलाम एकै ठाउँमा उभिएका हुन्।’
उनले विस्तृत शान्ति सम्झौतामा कोइराला र आफूले हस्ताक्षर गरेपछि नेपालमा शान्तिको नयाँ प्रक्रिया सुरु भएको, संविधान सभाको प्रक्रिया सुरु भएको र संघीय लोकतान्त्रिक गणतन्त्रतिर देश गएको बताए।
‘जय नेपाल र लालसलामद्वारा पनि अभिवादन गर्न चाहन्छु’ भन्दै उनले सम्बोधन सुरु गरेका थिए। ‘यो जय नेपाल र लालसलाम कहिलेदेखि यस्तो भयो भन्ने तपाईंहरुलाई लाग्न सक्छ’ भन्दै उनले युद्ध चर्कियोस् भनेर राजतन्त्रले चाहेको, तर आफूहरु शान्ति प्रक्रियामा आएको व्याख्या गरे।
‘यो देशमा ठूला राजनीतिक परिवर्तन जय नेपाल र लाल सलाम मिलेर मात्रै भएका छन्,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
