काठमाडौं– निर्वाचन आयोगले चुनावी प्रचारका क्रममा आमसभा, र्याली र घरदैलो गर्दा आचारसंहिता भित्र रहेर कार्यक्रम गर्न राजनीतिक दल र उम्मेदवारहरुको ध्यानाकर्षण गराएको छ।
मंसिर ४ गते हुने प्रतिनिधि सभा र प्रदेश सभा निर्वाचनका लागि कार्तिक १७ गते (भोलि) देखि राजनीतिक दलहरुले गर्ने आमसभा, कोणसभा तथा अन्य प्रचारप्रसारका गतिविधि गर्दा पालना गर्नुपर्ने आचरणको विषयमा आयोगले पुनः ध्यानाकर्षण गराएको हो। निर्वाचन आचारसंहिता केन्द्रीय अनुगमन समितिका संयोजकसमेत रहेका आयुक्त रामप्रसाद भण्डारीले प्रचलित कानुन, निर्वाचन ऐन, नियम र निर्वाचन आचारसंहिता प्रतिकूल हुनेगरी सभा, समारोहहरु नगर्न आग्रह गरे। उनले उम्मेदबार घरदैलोमा गएसँगै आयोग पनि सुक्ष्म निगरानीमा हुने र आचारसंहिताको उल्लघन गरेमा उम्मेदबारसम्म खारेजीको कारबाही मंसिर ४ गतेसम्म हुने बताए।
राजनीतिक दलहरु तथा उम्मेदवारले अर्काको कार्यक्रम विथोल्न लागेमा र अर्कालाई आरोप–प्रत्यारोप गरेमा कारबाहीको भागिदार हुने उनले बताए। दल तथा उम्मेदवारले चुनावी आमसभा गर्न लागेको कुरा २४ घण्टा अगावै स्थानीय प्रशासनलाई जानकारी दिनुपर्ने प्रावधानलाई कडाइका साथ पालना गर्न पनि भण्डारीले आग्रह गरे।
व्यक्ति विशेषलाई लाञ्छना लगाउने प्रयोजनले कुनैपनि शब्दहरु उच्चारण नगर्न, प्रचारप्रसार गर्ने क्रममा लोगो, स्टिकर लगाएको कपडा, टोपी, क्याप, ज्याकेट, कमिज, गम्छा, झोला लगायतका निर्वाचनसँग सम्बन्धित दलको चिह्न प्रयोग भएका सामग्रीहरु प्रयोग नगर्न आयोगले उम्मेदवार तथा दलको ध्यानाकर्षण गराएको छ। निर्वाचन आचारसंहिताले तोकेको ढाँचामा मात्रै पर्चा तथा पम्प्लेट बनाउन आयुक्त भण्डारीले आग्रह गरे।
‘कुन दलको कुन ठाउँमा कसरी आमसभा गर्ने भन्ने कुरा २४ घण्टा अगावै स्थानीय प्रशासनलाई जानकारी गराउनुपर्छ। स्थानीय प्रशासनलाई जानकारी दिइसकेपछि एउटा दलले कुनै कार्यक्रम गर्ने ठाउँ हो भने अर्को दलले त्यहाँ कार्यक्रम जुधाउन पाइने छैन,’ भण्डारीले भने, ‘अत्यन्त सभ्य, अनुशासित र भद्रसँग आफ्नो कार्यक्रम सञ्चालन गरिनु पर्नेछ। व्यक्ति विशेषको घर नजिकै र व्यक्ति विशेषलाई लाञ्छना लगाउने प्रयोजनले कुनै पनि शब्दहरु उच्चारण गर्न पाइने छैन।’
दल तथा उम्मेदवारले आमसभा, कोणसभा, र्याली गर्दा आफ्नो दलको प्रचारप्रसारको सन्दर्भमा लोगो, स्टिकर लगाएको कपडा, टोपी, क्याप, ज्याकेट, कमिज, गम्छा, ब्याग लगायतका सामग्रीमा निर्वाचनसँग सम्बन्धित दलको चिह्न अंकित गरेर प्रयोग गर्न नपाउने र गरेको पाइएमा कारबाही गरिने भण्डारीको भनाइ छ।
‘निर्वाचन आचारसंहिताले जुन ढाँचा तोकेको छ, त्यो ढाँचामा पर्चा, पम्प्लेट बनाउनुपर्छ। एउटा दलले कार्यक्रम गर्दा अर्को दलको कार्यक्रमलाई प्रतिकूल असर पार्न पाउँदैन,’ उनले भने, ‘कार्यक्रम बिथोल्ने लगायत अरुलाई आरोप, प्रत्यारोप लगाउने विषयले असर पर्यो भने त्यो कारबाहीको विषयवस्तु हुन्छ। प्रचलित कानुन प्रतिकूल, निर्वाचन ऐन, नियम प्रतिकूल, आचारसंहिता प्रतिकूल काम गर्नुहुन्न।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772089410.png)
-1772084459.png)
-1772084189.png)
-1764146706.png)
