काठमाडौं– प्रधानमन्त्री शेरबहादुर देउवाले मंसिर ४ गते हुने प्रदेश तथा प्रतिनिधि सभा निर्वाचन शान्तिपूर्ण तथा निष्पक्ष रुपमा सम्पन्न गर्न सरकारले प्रबन्ध मिलाएको बताएका छन्। निर्वाचनलाई सफल बनाउन सबै राजनीतिक दल तथा सरोकारवाला निकायको सहयोग आवश्यक रहेको देउवाको भनाइ छ।
आज (बुधबार) मध्यपुरथिमिमा नेपाल संवत्का प्रवर्तक राष्ट्रिय विभूति शङ्खधर साख्वाःको प्रतिमामा माल्यार्पण गर्दै देउवाले आगामी निर्वाचनले लोकतन्त्रलाई मजबुत बनाउने बताए। देशमा लोकतान्त्रिक सरकारले मात्रै रचनात्मक कार्य सम्पन्न गर्न सक्ने उनको भनाइ छ।
नेपाल संवत् नेपालको आफ्नै मौलिक संवत् भएको चर्चा गर्दै प्रधानमन्त्री देउवाले साख्वाःको योगदानको उच्च सम्मान गर्दै सरकारले यसअघि नै राष्ट्रिय विभूति घोषणा गरेको, उनको नाममा हुलाक टिकट प्रकाशित गरेको, विद्यालय तहको पाठ्यक्रममा समावेश गर्ने व्यवस्था गरेको बताए।
कार्यक्रममा संस्कृति, पर्यटन तथा नागरिक उड्डयनमन्त्री जीवनराम श्रेष्ठले शङ्खधर साख्वाःको योगदानलाई चीरस्थायी बनाउन नेपाल सरकारले साख्वाःको नाममा राष्ट्रिय पुरस्कारको घोषणा गर्ने तयारी गरेको बताए। सरकारले साख्वाःको नाममा हरेक वर्ष ३ जना व्यक्तिलाई १ लाख रुपैयाँका दरले राष्ट्रिय पुरस्कार प्रदान गर्ने बताउँदै मन्त्री श्रेष्ठले त्यसको प्रक्रिया सरकारले अगाडि बढाइसकेको जानकारी दिए।
संस्कृति, सम्पदा र मौलिक परम्परा जोगाउँदै उपत्यकाको पर्यटन विकासलाई अगाडि बढाउने बताउँदै मन्त्री श्रेष्ठले नेपाल संवत्लाई सरल र सहज ढङ्गले व्यवहारिक बनाएर कामकाजीमा ल्याउन सरकार लागिरहेको उल्लेख गरे।
कार्यक्रममा काठमाडौं महानगरपालिकाकी उपप्रमुख सुनिता डङ्गोलले शङ्खधर साख्वाःले पुर्याएको योगदानको चर्चा गर्दै महानगरले मध्यपुरथिमिमा रहेको शङ्खधर पार्कको निर्माणमा यसअघि १ करोड सहयोग गरेको र आगामी दिनमा पनि सहयोग गर्ने बताइन्।
मध्यपुरथिमि नगरपालिकाका प्रमुख सुरेन्द्र श्रेष्ठले शङ्खधर साख्वाःको योगदानको चर्चा गर्दै नगरपालिकाले शङ्खधरको विविध योजना सञ्चालन गर्न १ करोड २० लाखको बजेट विनियोजन गरेको बताए। नगरपालिकाले सुरु गरेको शङ्खधर पार्क निर्माण कार्यको बाँकी कामलाई नगरपालिकाले पूर्णता दिने प्रमुख श्रेष्ठको भनाइ छ।
कार्यक्रमका सभापति एवं प्रतिष्ठानका अध्यक्ष ज्ञानराम श्रेष्ठले शङ्खधर साख्वाःको नाममा सरकारले राष्ट्रिय परस्कारको घोषणा गर्नुपर्ने बताए। प्रतिष्ठानले साख्वाःको नाममा मिनी सङ्ग्रहालयको रुपमा विकास गर्ने बताउँदै अध्यक्ष श्रेष्ठले अहिले देखा परेको तिथिमितिको विवाद र फरकलाई एकरुपता दिन विज्ञ टोली लाग्नुपर्ने बताए।
प्रतिष्ठानले यसवर्ष विराट नेपाल भाषा साहित्य सम्मेलन गुठीलाई शङ्खधर सम्मान प्रदान गरेको छ। प्रधानमन्त्री देउवाले गुठीका महेन्द्रगोपाल कर्माचार्यलाई उक्त सम्मान प्रदान गरे। यस्तै, प्रतिष्ठानका पूर्वअध्यक्ष श्यामकृष्ण मानन्धरलाई पनि ‘शङ्खधर सम्मान’ प्रदान गरियो।
प्रधानमन्त्री देउवाले काठमाडौं महानगरपालिकाका पूर्वप्रमुख विद्यासुन्दर शाक्य, ललितपुर महानगरपालिकाका प्रमुख चिरीबाबु महर्जन, साहित्यकार तिलकप्रकाश कायस्थ, गीतकार पवित्र कसाः र पत्रकार सुगतरत्न सिन्दुराकारलाई शङ्खधर पदक प्रदान गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
