काठमाडौं – युइएफ च्याम्पियन्स लिग फुटबलमा आजबाट समूह चरणका पाँचौं चरणका खेल सुरु हुँदैछन्। समूह चरणका चार खेल सकिँदासम्म अन्तिम १६ (नकआउट चरण)मा पुग्ने पाँच टोलीको टुंगो लागिसकेको छ। बाँकी ११ टोलीको भन्ने टुंगो लाग्न बाँकी नै छ।
इ्रंग्लिस क्बल म्यानचेस्टर सिटी २ खेल खेल्न बाँकी छँदै नकआउट चरणमा प्रवेश गर्दा उसका लिग प्रतिद्वद्वी लिभरपुल, चेल्सी, टोटनहम हटस्पर भने नकआउट चरण प्रवेशका लागि संघर्षरत छन्।
समूह चरणका ४ खेल सकिँदासम्मको अवस्था यस्तो:
समूह ‘ए’
समूह ‘ए’मा मा १२ अंकसहित इटालियन सिरी ए क्लब नापोली नकआउट चरणमा प्रवेश गरिसकेको छ। अंक खाता खोल्न नसकेको स्कटिस क्लब रेन्जर्स आउट भइसकेको छ। यही समूहमा रहेको इंग्लिस क्लब लिभरपुल र डच क्लब आयाक्सको दुवैको नकआउट चरण प्रवेशको सम्भावना बाँकी नै छ।
नकआउट चरण प्रवेशका लागि लिभरपुललाई केही सहज छ। खेल्न बाँकी २ खेलमध्ये कुनै एकमा बराबरी गरेमात्रै पनि लिभरपुल नकआउट चरणमा प्रवेश गर्छ। आयाक्सले भने आफ्ना दुवै खेल जितेरमा मात्रै पुग्दैन लिभरपुलको नतिजासमेत कुर्नुपर्ने हुन्छ।
समूह ‘बी’
यो समूहबाट १० अंकसहित शीर्ष स्थानमा रहेको बेल्जियन च्याम्पियन क्लब ब्रागा नकआउट चरणमा प्रवेश गरिसकेको छ। ६ अंकसहित पोर्चुगिज क्लब पोर्टो दोस्रो र ४ अंकसहित स्पेनिस क्लब एट्लेटिको मड्रिड तेस्रो स्थानमा छन्। यी दुवैको नकआउट चरण प्रवेश गर्ने सम्भावना छ। पोर्टोले एट्लेटिकोलाई हराएमा उ सिधै नकआउट चरणमा प्रवेश गर्नेछ।
एट्लेटिकोले पोर्टोलाई हराएमा अन्तिम खेलबाट मात्रै नकआउट चरणमा पुग्ने टोलीको टुंगो लाग्नेछ। यो समूहबाट ३ अंकसहित पुछारमा रहेको जर्मन क्लब बायर्न लेभरकुसनको पनि नकआउट चरणमा पुग्ने झिनो आशा बाँकी नै छ। यसका लागि उसले मात्रैै जितेर पुग्दैन अन्यको नतिजामा समेत भर पर्नुपर्ने हुन्छ।
समूह ‘सी’
१२ अंकसहित शीर्ष स्थानमा रहेको अर्को जर्मन क्लब बायर्न म्युनिख नकआउट चरणमा प्रवेश गरिसकेको छ। खाता नै खोल्न नसकेको चेक क्लब भिक्टोरिया प्लाजान भने आउट भइसकेको छ।
यो समूहबाट अब इटालियन क्लब इन्टर मिलान र स्पेनिस क्लब बार्सिलोनामध्ये एक टोली नकआउट चरणमा प्रवेश गर्नेछन् । आगामी खेलमा इन्टरले भिक्टोरियालाई हराएमा बार्सिलोना सिधै आउट हुनेछ। इन्टरले भिक्टोरियासँग हारेमा वा बराबरी खेलमा भने बार्सिलोनाको नकआउट चरण प्रवेशको सम्भावना जिवितै रहन्छ।
त्यसका लागि बार्सिलोनाले बाँकी रहेका दुबै खेल जित्नुपर्ने हुन्छ। बार्सिलोनाले बायर्न र भिक्टोरियासँग खेल्न बाँकी नै छ।
समूह ‘डी’
समूह ‘डी’मा रहेका चारै टोली (टोटनहम, मार्सेई, स्पोर्टिङ लिस्बन र फ्रान्कफर्ट)को नकआउट चरण प्रवेश गर्ने सम्भावना छ। समान चार खेल खेल्दा इंग्लिस क्लब टोटनहमको ७, फ्रेन्च क्लब मार्सेई र पोर्चुगिज लिस्बनको समान ६ र जर्मन क्लब फ्रान्कफर्टको ४ अंक छ।
टोटनहमले अबको खेलमा लिस्बनलाई हराएमा सिधै नकआउट चरणमा प्रवेश गर्नेछ। टोटनहामले लिस्बनलाई हराएको अवस्थामा मार्सेईले पनि फ्रान्कफर्टलाई हरायो भने उ पनि नकआउट चरण प्रवेश गर्नेछ।
समूह ‘ई’
यो समूहका पनि चारै टोलीको नकआउट चरणको प्रवेश सम्भावना जिवितै छ। ७ अंकसहित इंग्लिस क्लब चेल्सी शीर्ष स्थानमा, ६ अंकसहित अष्ट्रियन क्लब साल्जबर्ग दोस्रो, समान ४ अंकसहित इटालियन च्याम्पियन एसी मिलान तेस्रो तथा क्रोएसियन क्लब डाइनामो जाग्रेब चौथो स्थानमा छन्।
साल्जबर्गलाई हराएमा चेल्सी सिधै नकआउट चरण प्रवेश गर्ने सम्भावना छ। यदि, चेल्सीले साल्जबर्गसँग बराबरी खेल्यो र एसी मिलानले डाइनामो जाग्रेबलाई हरायो भने अन्तिम खेलबाट नकआउट पुग्ने टोलीको टुंगो लाग्नेछ ।
समूह ‘एफ’
यो समूहबाट १० अंकसहित स्पेनिस च्याम्पियन रियल मड्रिड नकआउट चरणमा प्रवेश गरिसकेको छ । जम्माजम्मी १ अंक जोडेको स्कटिस क्लब सेल्टिक आउट भइसकेको छ। जर्मन क्लब आरबी लाइपजिग र युक्रेनी क्लब साख्तर डोनेस्कको नकआउट चरण प्रवेश गर्ने सम्भावना बाँकी छ।
अबको खेलमा लाइपजिगले रियललाई हराएमा उ सिधै नकआउट चरणमा प्रवेश गर्नेछ। युरोपा लिगमा कायमै रहन सेल्टिकलाई पनि जित्नैपर्ने दबाब छ।
समूह ‘जी’
इंग्लिस च्याम्पियन म्यानचेस्टर सिटी दुई खेल बाँकी छँदै १० अंक जोडेर नकआउट चरणमा प्रवेश गरिसकेको छ। ७ अंक जोडेको जर्मन क्लब बोरुसिया डर्टमुण्ड, २ अंक जोडेको स्पेनिस क्लब सेभिल्ला र २ अंक नै जोडेको डेनिस क्लब कोपनहेगन नकआउट चरणका लागि संघर्षरत छन्।
डर्टमुण्डले अबको खेलमा सिटीलाई हराएमा उ सिधै नकआउट चरणमा प्रवेश गर्नेछ। यदि, सेभिल्ला र कोपनहेगनले बराबरी खेलेमा पनि डर्टमुण्डको अन्तिम १६ मा प्रवेश गर्नेछ।
समूह ‘एच’
यो समूहबाट पनि चारै टोलीको नकआउट चरण प्रवेश गर्ने सम्भावना जिवितै छ। ८ अंकसहित फ्रेन्च च्याम्पियन पिएसजी पहिलो, ८ अंकसहित नै पोर्चुगिज क्लब बेन्फिका दोस्रो र समान ३–३ अंकसहित इटालियन क्लब युभेन्ट्स तेस्रो तथा इजरायली क्लब मक्काबी हाइफा चौथो स्थानमा छन् ।
मंगलबार राति हुने खेलमा पिएसजी र बेन्फिका दुवै विजयी भएमा यी दुई टोली नकआउट चरणमा प्रवेश गर्नेछन्। यदि, यी दुवै खेल बराबरी भएमा अन्तिम खेलबाट नकआउट पुग्ने टोलीको टुंगो लाग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
