रुपन्देही– गृहमन्त्री बालकृष्ण खाणले उपयुक्त विकल्प र व्यवस्थापनबिना सुकुम्बासी नागरिकहरूका घर–टहरा भत्काउन नहुने बताएका छन्।
रुपन्देही–३ बाट पाँच दलीय गठबन्धनका प्रतिनिधि सभा सदस्यका उम्मेदवार रहेका गृहमन्त्री खाणले बुटवल उपमहानगरपालिका–१६ मा चुनाव प्रचार–प्रसार कार्यालयको उद्घाटन गर्दै भने, ‘सुकुम्बासीहरू अहिले जस्तो अवस्थामा बसेका छन्, उनीहरू त्यस्तै अवस्थामा बस्न पाउनुपर्छ।’
उनीहरूलाई बसोबास गरेको स्थानबाट सार्नैपर्ने अवस्था आएमा उपयुक्त विकल्प दिएर, त्यो विकल्पमा व्यवस्थापन गरेर मात्रै सार्नुपर्ने खाणको भनाइ छ।
अहिले मुलुकभरका केही नगरपालिकाले महत्त्वपूर्ण चाडपर्वको मुखैमा विकल्पबिना सुकुम्बासीका घर–टहरा भत्काउन थालेको भन्दै गृहमन्त्री खाणले आपत्ति जनाएका छन्।
उनले आफूले गृह प्रशासनलाई घर–टहरा भत्काउने अन्य सरकारी निकायको कार्यमा सहभागी नहुन निर्देशन दिइसकेको बताए। गृहमन्त्री खाणले इतिहास र भूमिका नभएका राजनीतिक दल र ती दलमा आबद्ध नेताबारे टिकाटिप्पणी गर्नुको औचित्य नभएको बताए।
बुटवलको सेमलारमा कृषि थोक बजार केन्द्र आयोजना अहिले सरकारको नीति तथा कार्यक्रम र बजेटमा परेको भन्दै उनले त्यो आयोजना पूरा गरेर भरपूर फाइदा लिनुपर्ने बताए। आयोजना पूरा भएमा रुपन्देहीमा उत्पादित कृषि उपज गौतमबुद्ध अन्तर्राष्ट्रिय विमानस्थलमार्फत् हवाईजहाजबाट राजधानी र विदेशमा पठाउन सकिने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771347882.jpg)
-1764146706.png)
