निर्वाचन विशेष

६ वर्ष जेल र ८ वर्ष निर्वासनमा बिताएका ९९ वर्षीय उम्मेदवार भन्छन्- अन्य दलले जनतालाई दुःख दिए

धनु विश्वकर्मा शनिबार, असोज २९, २०७९ १३:२९

काठमाडौं- गोरखा–२ बाट उम्मेदवारी दिएका नेपाली कांग्रेस बीपीका टीकादत्त पोखरेल यही कात्तिक १० गते शताब्दी पुरुष बन्दै छन्। मंसिर ४ मा हुन लागेको प्रतिनिधिसभाको निर्वाचनमा प्रतिस्पर्धाको लागि मैदानमा उत्रिएका पोखरेल सबैभन्दा जेठा उम्मेदवार हुन्।

बुढ्यौलीले कान कम सुन्छन्, पोखरेल। तर, बोली भने प्रष्ट छ। यस क्षेत्रमा नेकपा माओवादी केन्द्रका अध्यक्ष पुष्पकमल दाहाल प्रचण्ड, भर्खरै एमालेमा प्रवेश गरेका २९ वर्षका अब्दुस सलाम मिया लगायत १२ जनाले प्रतिनिधिसभाका लागि उम्मेदवारी दर्ता गराएका छन्।

यसरी आफूभन्दा कान्छा अन्य ११ जनालाई निर्वाचनमार्फत उछिन्ने प्रयत्नमा छन्, पोखरेल। त्यसका लागि उनले आफ्नो उमेरलाई बाधक ठानेका छैनन्। भन्छन्, 'उमेरले फरक पार्दैन। कठोर दृढता चाहिन्छ।'

गोरखाको सिरानचोकमा विसं १९८० मा जन्मेका पोखरेल भने आफ्नो उम्मेदवारी प्रचण्ड विरुद्ध भएको बताउँछन्। त्यसको कारण पनि उनीसँग मौजुदा छ। ‘नेपालमा बीपीको प्रजातान्त्रिक मूल्य र मान्यतालाई प्रचण्डले लात हानेका छन्’, उनी भन्छन्।

नेपाली जनताले दिन प्रतिदिन भोगेको अन्याय सहन नसकेर आफू यो उमेरमा पनि विद्रोह गर्न निर्वाचनमा उठेको उनी बताउँछन्। ‘माओवादीले गोरखामा गरेको एकल शासनको विद्रोह पनि हो’, उनी भन्छन्।

जब सत्ता गठबन्धन बन्यो। त्यसपछि भने उनलाई प्रचण्डप्रति झनै आक्रोश बढ्यो। कांग्रेसले पार्टीको चाबी नै प्रचण्डलाई दिएको भन्दै बीपी कांग्रेसतिर लागे। तिनै प्रचण्ड घुमिफेरी गोरखा पुगे। प्रचण्डलाई सत्ता गठबन्धनको समर्थन छ।गोरखाबाटै निरन्तर उम्मेदवार बन्दै आएका डा बाबुराम भट्टराई यसपटक निर्वाचनमा उठेनन्। उनकी छोरी काठमाडौं- ७ बाट प्रतिस्पर्धामा छिन्। यो सबै आफूलाई मन नपरेकाले पनि चुनावी प्रतिस्पर्धामा सामेल भएको उनको भनाइ छ।

देउवाप्रति तीव्र आक्रोश
नेताहरुमा नीति सिद्धान्त भन्ने कुराको लोप हुँदै गएको पोखरेलको ठम्याइ छ। प्रधानमन्त्री शेरबहादुर देउवाले पार्टीलाई प्रचण्डको मातहत पुर्याएको आरोप उनको छ। भन्छन्, ‘बीपी कोइरालाले नेतृत्व गरेको कांग्रेस आज प्रचण्डको हातमा सुम्पे।’

आफू जस्ता पुराना नेताहरुले बीपीको विचारको जगेर्ना गर्न पनि यस्ता खालका विद्रोह आवश्यक रहेको उनको भनाइ छ।

प्रधानमन्त्री केपी शर्मा ओलीले दुईदुई पटक प्रतिनिधि सभा विघटन गरे। सर्वोच्च अदालतले पुनःस्थापित पनि गरिदियो। त्यसपछि कांग्रेस, माओवादी केन्द्र, एकीकृत समाजवादी, जसपा र राजमोबीच गठबन्धन भयो। यो गठबन्धन पोखरेललाई मन नपरेपछि उनी बीपी कांग्रेसतिर लागेका हुन्। ‘पार्टी, सिद्धान्त र विचार नमिल्ने प्रचण्डसँग कसरी देउवाले साँठगाँठ मिलाए?’, उनले भने,'त्यसैले म यो गलत कदमका विरुद्ध चुनावी मैदानमा छु।'

उनी बीपी कांग्रेसका केन्द्रीय सल्लाहकार सदस्य पनि हुन्।

‘२००५ सालमा घरमा खाना नपाएर खोले खाएर आन्दोलन गरेको हुँ’,उनी भन्छन्। २००७ सालमा प्रजातन्त्रको स्थापनाका लागि उनी लडे। उनी भन्छन्, ‘मैले २००७ सालमै गोली खाएको छु।’ त्यो आन्दोलन आफूहरुले नेपाली जनताको सुख र समृद्धिका लागि गरेको भए पनि त्यसो हुन नसकेको उनको तर्क छ।

बीपीले भनेको प्रजातन्त्र आउँदा सुकिला मुकिलाहरुको हालीमुहाली हुने भनाइ स्मरण गर्दै उनले आज पनि जनताको दैनिकीमा कुनै फरक नआएको बताए। प्रचण्डको अत्याचारलाई खप्न नसकेर आफू ९९ वर्षको उमेरमा पनि चुनाव लड्न अघि सरेको बताउने पोखरेल आफू निर्वाचित भए जनताको हक अधिकार सुनिश्चित गर्ने बताउँछन्। ‘प्रचण्डहरुले विभिन्न बहानामा जनतालाई दुःख मात्र दिएकोले मन थाम्नै नसकेर म चुनाव लड्न आएको हुँ’,उनी भन्छन्।

गोरखामा उम्मेदवारी दिएर चितवनमा पोखरेल
२०७४ को निर्वाचनमा प्रचण्डले चितवन- ३ बाटै जितेका थिए। अहिले प्रचण्ड गोरखामा पोखरेलसँगै चुनावी मैदानमा छन्।

गत आइतबार उम्मेदवारी दर्ता गराएर पोखरेल चितवन झरेका छन्। उनका छोराबुहारी चितवनमै बस्छन्। सबै जना चितवनमा बस्ने भएर यता आएको बताए। अबका केही दिनपछि चुनावको तयारी गर्न गोरखा जाने पोखरेलको योजना छ।

जितमा ढुक्कसुनिन्छन्, पोखरेल। गोरखाका जनताले न्याय र अन्याय छुट्याउने उनको विश्वास छ। जनता न्यायालय भएको र जनताको फैसलालाई आफूले ग्रहण गर्ने उनको भनाइ छ। ‘बाबुराम प्रचण्ड मेरा छोराका उमेरका हुन्', उनी भन्छन्, ‘बाबुराम र प्रचण्डले सहिदको रगतमाथि राजनीति गरेका हुन्। म जिउँदो सहिद हुँ।’

कृष्णप्रसाद भट्टराईले माननीय दिँदा ईन्कार, अहिले आफैं उम्मेदवार!
२००७ सालदेखि नै पोखरेल राजनीतिक आन्दोलनमा होमिएका हुन्। बीपीको विचारलाई आत्मसात गर्दै आएका छन्। भन्छन्, ‘बीपीले सबैलाई समान व्यवहार गर्नु भन्नुभयो। मेलमिलाप जस्ता विचारलाई नेपालमा भित्र्याउनुभयो। अहिले कहाँ गयो?अहिलेका दलका नेताहरु जसरी पनि सत्ता भागबण्डा लगाएर पालैपालो खानका लागि राजनीति गर्दै आएका छन्', उनको आक्रोश छ।

तत्कालीन प्रधानमन्त्री कृष्णप्रसाद भट्टराईले आफूलाई माननीय (सांसद) बन्नका लागि प्रस्ताव गरेको उनी बताउँछन्। तर उनले जबसम्म जनता समृद्ध हुन सक्दैनन्, माननीय नहुने भनेर भट्टराईको प्रस्ताव इन्कार गरेको बताउँछन्। त्यतिबेला इन्कार गरेका पोखरेललाई अहिले भने किन उम्मेदवार बन्न मन लाग्यो त? पञ्चायतकालमै ६ वर्ष जेल र ८ वर्ष निर्वासनमा बिताएका पोखरेल भन्छन्, 'अन्य दलले जनतालाई दुःख दिए।'