निर्वाचन विशेष

गुल्मी–२ मा गोकर्णलाई रामकुमारीको डर, रामकुमारीलाई गठबन्धनको भर

अजय खड्का मंगलबार, असोज २५, २०७९ १४:०१

गुल्मी– गुल्मी–२ बाट नेकपा एमालेका सचिव गोकर्ण विष्ट र नेकपा एकीकृत समाजवादीकी सचिव रामकुमारी झाँक्री मंसिर ४ को निर्वाचनमा प्रतिस्पर्धीका रुपमा आमने सामने हुँदै छन्। २०७४ सालको चुनावमा नेकपा एमालेबाट समानुपातिक सांसद भएकी झाँक्री अहिले गठबन्धनको तर्फबाट प्रत्यक्ष उम्मेदवार छन्।

२०७८ भदौ २ मा एमालेबाट फुटेर एकीकृत समाजवादी बनेपछि झाँक्री एकीकृत समाजवादीतिर लागे पनि गोकर्ण विष्ट भने एमालेमै बसे। जसले गर्दा गुल्मीमा एमालेको विभाजन ‘ठूलो’ भएन। अहिले एमालले पुन: विष्टलाई नै अगाडि सारेको छ।

कुनैबेला गोकर्ण विष्टका लागि मत माग्न हिडेकी झाँक्री अहिले उनैको प्रतिस्पर्धी बनेकी छन्। यसले गुल्मी–२ को निर्वाचन निकै रोचक बन्ने आकलन छ। निकै महत्त्वका साथ हेरिएको छ।

०४८ सालमा कांग्रेसका रुद्रमणि भण्डारीले जितेबाहेक साविकको गुल्मी–३ र हाल–२ मा वामपन्थीहरुले जित्दै आएका छन्। विष्ट स्वयम् ०५६ सालदेखि यो क्षेत्रमा चुनाव लड्दै आएका छन्। उनलाई २०६४ सालमा माओवादीका चन्द्रबहादुर थापा (सागर)ले हराएका थिए। अरु सबै चुनाव विष्टले जितेका छन्। २०७४ सालमा वाम गठबन्धनको बेलामा उनले १४ हजारभन्दा बढी मतान्तरले जितेका थिए।

यसपटक पनि विष्टको उम्मेदवारी विगतमा गरेका धेरै कामहरुको निरन्तरताको लागि भएको बताउँदै उनले भने, ‘जिल्लाको समृद्धिका लागि, जनताको जीवनस्तर उकास्नका निम्ति केही कामहरु हामीले पर्याप्त रुपमा गरेका छौं। र, बाँकी रहेका कामको निरन्तरताका लागि हाम्रो उम्मेदवारी छ। यो उम्मेदवारी गुल्मी–२ का जनताको साझा उम्मेदवारी हो।’

विभिन्न समयमा गरि करिब साढे ११ वर्ष गुल्मी–२ का जनप्रतिनिधि भएर आफूले धरै काम अगाडि बढाएको विष्टले बताए। अझै पनि शिक्षा, स्वास्थ, खानेपानी, सडक लगायत जनताको जीवनस्तर उकास्नका निम्ति विभिन्न क्षेत्रमा काम गर्ने दृढताकासाथ आफ्नो उम्मेदवारी रहेको विष्टले बताए।

झाँक्रीलाई गठबन्धनकै भर
गुल्मी–२ मा सत्तारुढ गठबन्धनमा आवद्ध दलहरुमध्ये सबभन्दा बलियो कांग्रेस छ। यस क्षेत्रमा गत वैशाखमा स्थानीय तहको निर्वाचनमा एकीकृत समाजवादीको जम्मा ६५८ मत मात्र रहेको छ। तर, केही दिन अगाडि जिल्ला अध्यक्ष र जिल्ला इन्चार्ज लगायतका नेताहरु एमालेमै फर्किएका छन्। यसले झनै एकीकृत समाजवादीलाई झड्का दिएको छ।

त्यसकारण एकीकृत समाजवादीको मत खासै धेरै नरहेकोले चुनाव जित्नका लागि कांग्रसकै भर पर्नुपर्ने कांग्रेसका एक नेताले बताए। आफ्नो निर्वाचन क्षेत्रको हरेक ठाउँमा जाँदा सद्‍भाव पाएकाले आफू उत्साहित देखिएको झाँक्री बताउँछिन्। त्यसमाथि आफू गठबन्धको तर्फबाट उम्मेदवार रहेका कारण निर्वाचित हुने उनको विश्वास छ।

‘हामी इमानका साथ काम गर्ने प्रतिवद्धताकासहति गठबन्धनको तर्फबाट आएका छौं। मूलत: जित्ने आधार भनेकै गठबन्धन हो’, झाँक्रीले बताइन्। निर्वाचनपश्चात पनि आफूहरु गठन्धनमै रहने उनले दाबी गरिन्।

रामकुमारीविरुद्ध कांग्रेसका भुसालको बागी उम्मेदवारी
गुल्मी–२ कांग्रेसका एक नेताले प्रतिनिधि सभाका लागि उम्मेदवारी दिएका छन्। गठबन्धनबाट झाँक्री उम्मेदवार बनेपनि कांग्रेसका डा दामोदर भुसालले स्वतन्त्र उम्मेदवारी दिएका छन्। कांग्रेस गुल्मीका पूर्वक्षेत्रीय सभापति समेत बनेका भुसाल हाल लुम्बिनी प्रदेश योजना आयोग सदस्य हुन्।

कांग्रेसबाट उम्मेदवारी दिने तयारी गरेका उनले उक्त क्षेत्र एकीकृत समाजवादीलाई दिइएपछि विद्रोह गरेका हुन्। उम्मेदवारी दर्ता गर्दै उनले पार्टीको संगठन जोगाउन आफूले विद्रोह गरेको बताएका छन्।

‘राजनितिक दलहरु जो यो व्यवस्थाका लागि लडे तर, उनीहरु प्रणाली बसाल्ने कुरामा रहर देखाएनन्’, भुसालले भने।