निर्वाचन विशेष

श्रीमान्-श्रीमती, दाजुबहिनी र बाबुछोरी नै सांसद बन्ने लाइनमा

धनु विश्वकर्मा मंगलबार, असोज २५, २०७९ १३:१६

काठमाडौं– अगामी मंसिर ४ मा हुने प्रतिनिधि सभाको निर्वाचनका लागि कतिपय नेताका परिवारका सदस्यहरू नै चुनावी मैदानमा छन्। कतिपयका श्रीमान्–श्रीमती नै उम्मेदवार छन् भने कतिपयका बाबुछोरी र दाजुबहिनी उम्मेदवार बनेका छन्।

दम्पती नै प्रतिनिधि सभामा पुग्ने लयमा प्रधानमन्त्री शेरबहादुर देउवा दम्पत्ति अग्रपंतिमा छन्। डडेलधुराबाट प्रधानमन्त्री देउवा प्रत्यक्ष निर्वाचन लड्दैछन्।

देउवापत्नी आरजु राणाले समानुपातिक सूचीको तेस्रो नम्बरमा आफ्नो नाम राखेर प्रतिनिधि सभाको यात्रा पक्का गरेकी छिन्। यसअघि प्रत्यक्ष चुनावमा होमिएकी उनले जित्न नसकेपछि यसपल्ट वैकल्पिक बाटो रोजेकी हुन्।

वर्षमान पुन र ओनसरी घर्ती
नेकपा माओवादी केन्द्रका उपमहासचिव वर्षमान पुन र केन्द्रीय सदस्य ओनसरी घर्ती चुनावी मैदानमा हुनेछन्। दुवै सत्ता गठबन्धनका तर्फबाट माओवादी केन्द्रका प्रत्यक्ष उम्मेदवार हुन्।

वर्षमानले रोल्पाबाट र ओनसरीले काठमाडौं-२ बाट उम्मेदवारी दर्ता गरेका छन्। ओनसरी पहिलोपटक काठमाडौंबाट प्रत्यक्ष उम्मेदवार बनेकी छन्।

वर्षमान २०४२ मा राजनीतिमा आवद्ध भएका हुन्। उनी माओवादी युद्धको सुरुवातसँगै तत्कालीन नेकपा माओवादीमा सक्रिय थिए। संविधानसभा सदस्य निर्वाचन २०६४ मा ललितपुर–१ बाट निर्वाचित भए। उनले २०७४ मा पनि रोल्पाबाटै चुनाव जितेका थिए।

ओनसरी २०६४ सालको पहिलो संविधानसभामा समानुपातिक तर्फबाट संविधानसभा सदस्य बनेकी थिइन्। २०७० सालको दोस्रो संविधानसभा निर्वाचनमा रोल्पा–२ बाट प्रत्यक्षतर्फ संविधानसभा सदस्य निर्वाचित भएकी हुन्। त्यस्तै, २०७४ सालको प्रतिनिधि सभाको निर्वाचनमा रोल्पाबाट समानुपातिक निर्वाचन प्रणालीबाट निर्वाचित भएकी थिइन्।

उनी पहिलो महिला सभामुख हुन्। उनले २०६८ मा युवा तथा खेलकुद मन्त्रीको जिम्मेवारी सम्हालेकी थिइन्। वर्षमान र ओनसरी भने २०७४ देखी निरन्तर दम्पती नै प्रत्यक्ष उम्मेदवार बनेका छन्।

रघुविर महासेठ र जुली महतो
एमालेका सचिव रघुवीर महासेठ र पोलिटब्यूरो सदस्य जुली महतो एमालेबाट प्रत्यक्षमा उम्मेवार बनेका छन्। रघुवीर धनुषा–४ र जुली धनुषा- ३ बाट निर्वाचन लड्दैछन्। रघुवीर सत्ता गठबन्धनमा कांग्रेसका तर्फबाट महेन्द्र यादवसँग चुनावी प्रतिस्पर्धा गर्नेछन् भने जुलीले लोसपाका अनिलकुमार झासँग चुनावी प्रतिस्पर्धा गर्नेछन्।

जुली एनआरएनको संस्थापक अध्यक्ष उपेन्द्र यादवकी बहिनी हुन्। २०७४ सालको निर्वाचनमा पनि जुली र रघुवीर श्रीमान्, श्रीमती नै सांसद बनेका थिए।

रघुविर संविधानसभाको उपनिर्वाचन २०६५ मा धनुषा- ५ बाट निर्वाचित भएका थिए। २०७४ मा पुन: प्रतिनिसभामा धनुषा- ४ बाटै निर्वाचित भएका थिए। त्यही क्षेत्रबाट उनले फेरि उम्मेदवारी दिएका छन्।

जुली पहिलोपटक २०६४ मा समानुपातिक सांसद बनेकी थिइन्। दोस्रो संविधानसभाको निर्वाचन २०७० मा नेपाली कांग्रेसका पूर्वउपसभापति विमलेन्द्र निधिसँग धनुषा-३ मा हार ब्यहोरिन्। त्यसपछि पुन: २०७४ मा एमालेबाट समानुपातिक सदस्यमा निर्वाचित भइन्। यो उनको चौंथो पटकको उम्मेदवारी हो।

शेरबहादुर देउवा र आरजु राणा देउवा
प्रधानमन्त्री शेरबहादुर देउवा प्रत्यक्ष र देउवापत्नी तथा कांग्रेस केन्द्रीय सदस्य आरजु राणा देउवा समानुपातिक उम्मेदवार बनेका छन्। आइतबार प्रधानमन्त्री देउवाको वारेस बस्दै आरजुले डडेलधुराबाट उम्मेदवारी मनोनयन दर्ता गराएकी छन्। आरजुको नाम भने समानुपातिक सूचीमा छ। उनको नाम खस आर्य महिलातर्फ तेस्रो नम्बरमा छ।

प्रधानमन्त्री देउवाको यो सातौँ पटकको प्रत्यक्ष उम्मेदवारी रहेको छ। यसअघि २०४८ को संसदीय निर्वाचनमा पनि उनी निर्वाचित भएका थिए। २०५१ को मध्यावधि निर्वाचन र २०५६ मा पनि डडेलधुारबाट निर्वाचित भएका थिए, देउवा।

पहिलो संविधान सभाको चुनाव २०६४ मा डडेलधुरा र कञ्चनपुर तथा २०७० मा डडेलधुरा र कैलालीमा दुवै क्षेत्रबाट जित हाँसिल गरेका थिए। २०७४ मा प्रतिनिधिसभा सदस्यमा प्रत्यक्ष डडेल्धुराबाट निर्वाचित भएका हुन्। उनी पाँचौपटक प्रधानमन्त्री भएका छन्।

आरजु २०६४ र २०७० मा समानुपातिक सांसद भएकी थिइन्। २०७४ मा कैलाली–५ बाट प्रतिनिधि सभा सदस्य उम्मेदवार रहेकी उनलाई वाम गठबन्धनका एमाले उम्मेदवार नारदमुनि रानाले पराजित गरेका थिए। एमालेका राना २७ हजार २०२ मत पाएर विजयी हुँदा आरजुले २२ हजार ३२२ मत पाइन्।

बालकृष्ण खाण र मञ्जु खाण
गृहमन्त्री बालकृष्ण खाण प्रत्यक्ष र उनकी पत्नी नेपाली कांग्रेसकी केन्द्रीय सदस्य मञ्जु खाण समानुपातिक उम्मेदवार बनेका छन्। गृहमन्त्री खाण रुपन्देही- ३ बाट उम्मेदवार बनेका छन्। मञ्जु समानुपातिकमा सिरहाबाट महिला खसआर्य तर्फबाट ६ नम्बरमा नाम छ।

बालकृष्ण एमालेसँग तालमेल गरेको राप्रपाका दीपक बोहरासँग चुनावी प्रतिस्पर्धा गर्दैछन्।

खाण दम्पत्ति यसअघि २०७४ को समानुपातिक निर्वाचन प्रणालीतर्फको बन्दसूचीमा थिए। खसआर्यतर्फ बालकृष्णको नाम एक नम्बरमा थियो भने मञ्जुको नाम खसआर्य महिलातर्फको पाँचौं नम्बरमा थियो। तर, मञ्जु सांसद बन्न सकिनन्।

गृहमन्त्री खाण २०४८ सालमा प्रतिनिधि सभा सदस्यमा निर्वाचित भएका थिए। उनी संविधान सभाको पहिलो र दोस्रो निर्वाचन २०६४ र २०७० मा रुपन्देही- ३ बाट निर्वाचित भएका थिए। २०७४ मा भने समानुपातिक सांसदमा निर्वाचित भए। उनले यसअघि शिक्षा तथा खेलकुद राज्यमन्त्री, सिंचाइमन्त्री र रक्षामन्त्रीको जिम्मेवारी समालेका छन्।

अशोक राई र सुशीला श्रेष्ठ
जनता समाजवादी पार्टीका नेता अशोक राई सुनसरी– १ बाट प्रत्यक्षमा उम्मेदवार बनेका छन्। उनकी पत्नी सुशीला श्रेष्ठको नाम भने प्रतिनिधि सभाको समानुपातिकको बन्दसूचीमा छ।

रेशम चौधरी र रञ्जिता श्रेष्ठ
नागरिक उन्मुक्ति पार्टीका नेता रेशम चौधरीले बर्दिया– २ बाट उम्मेदवारी दिएका छन्। उनकी श्रीमती रञ्जिता श्रेष्ठ चौधरीले कैलाली– १ बाट प्रत्यक्ष उम्मेदवार बनेकी छन्।

रेशमले यसअघि तत्कालीन राष्ट्रिय जनता पार्टीबाट कैलाली- १ मा जितेका थिए। रञ्जिता अहिले पार्टीकी अध्यक्ष समेत हुन्।

रेशम टीकापुर प्रकरणमा दोषी ठहर भएर जेल जीवन बिताइरहेका छन्। उनले वारेसमार्फत् उम्मेदवारी दर्ता गराएका हुन्। उनको मनोनयविरुद्ध निर्वाचन अधिकृतको कार्यालयमा उजुरी समेत परेको छ।

देवेन्द्र पौडेल र बलावती शर्मा
नेकपा माओवादी केन्द्रका सचिव तथा शिक्षामन्त्री देवेन्द्र पौडेल बाग्लुङ- २ बाट प्रत्यक्षतर्फ उम्मेदवार छन् भने उनकी पत्नी बलावती शर्मा प्रतिनिधि सभाकै लागि समानुपातिक उम्मेदवार बनेकी छन्। बलावती माओवादीको पोलिटब्यूरो सदस्य हुन्। बलावतीको नाम खसखार्य महिलातर्फ ८ नम्बरमा छ।

०००
महन्थ ठाकुर र छोरी मिनाक्षी
लोकतान्त्रिक समाजवादी पार्टी नेपालका अध्यक्ष महन्थ ठाकुर र उनकी छोरी डा मिनाक्षी ठाकुर प्रतिनिधिसभा सदस्यका लागि उम्मेदवार छन्। महन्थ सत्ता गठबन्धनको सहयोगमा महोत्तरी- ३ बाट प्रत्यक्ष उम्मेदवार छन्। मिनाक्षी भने मधेशी महिला तर्फबाट समानुपातिकमा पहिलो नम्बरमा परेकी छिन्।

महन्थ २०४८ सालदेखि निरन्तर प्रत्यक्षको उम्मेदवारी दिँदै आएका छन्। २०४८ मा प्रत्यक्ष निर्वाचित भए भने २०६४ मा मनोनित सदस्य बनेका थिए। २०७० मा पराजित भए भने २०७४ मा महोत्तरी- ३ बाट निर्वाचित भए।

उनी यही क्षेत्रमा पुन: उम्मेदवार बनेका छन्। जसपाका हरिनारायण यादवसँग प्रतिस्पर्धा गर्दैछन्। जसपाले एमालेसँग चुनावी तालमेल रहेको छ।

०००
शंकर पोखरेल र बहिनी मेनका पोखरेल
एमाले महासचिव शंकर पोखरेल दाङ– २ बाट उम्मेदवार बनेका छन्। यसअघि सोही क्षेत्रको प्रदेश सभामा जितेका उनी लुम्बिनी प्रदेशको मुख्यमन्त्रीसमेत बने।

यसपल्ट प्रतिनिधि सभामा सांसद बन्ने प्रयत्नमा छन्। आफ्नै बहिनी मेनका पोखरेलका लागि पनि प्रतिनिधि सभाको बाटो फराकिलो बनाइसकेका छन्। समानुपातिक उम्मेदवार मेनका खसआर्य महिलातर्फ पहिलो नम्बरमै छिन्।

शक्ति बस्नेत र बहिनी ज्ञानु
नेकपा माओवादी केन्द्रका उपमहासचिव शक्ति बस्नेत जाजरकोटबाट उम्मेदवार बनेका छन् भने उनकी बहिनी ज्ञानु बस्नेत सुवेदीको प्रतिनिधि सभा समानुपातिक बन्दसूचीमा नाम छ। ज्ञानुको नाम खसआर्य महिलाको १ नम्बरमा छ।

जनार्दन शर्मा र बहिनी नारायणी
माओवादीका अर्का उपमहासचिव अर्थमन्त्री जनार्दन शर्मा रुकुम पश्चिमबाट प्रतिनिधि सभामा प्रत्यक्ष उम्मेदवार बनेका छन्। उनी २०६४ देखि लगातार सांसद् छन्।

२०४८ सालमा जनार्दन रुकुम- २ बाट उम्मेदवार थिए तर, जित्न सकेनन्। शर्माकी बहिनी नारायणी शर्मा प्रतिनिधि सभाकै समानुपातिक बन्दसूचीमा परेकी छन्। उनको नाम खसखार्य महिलातर्फ तीन नम्बरमा छ।