निर्वाचन विशेष

प्रचण्डले सुरक्षित देखेको गोरखा- २ मा कस्तो छ दलीय स्थिति?

राजनीतिक ब्यूरो शनिबार, असोज २२, २०७९ १३:२९

काठमाडौं- चितवन- ३ लाई आफ्नो निर्वाचन क्षेत्रको रुपमा प्रस्तुत गर्दै आएका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ अन्ततः गोरखा- २ बाट उम्मेदवार बन्ने भएका छन्। शुक्रबार बसेको पार्टीको पदाधिकारी बैठकबाट उनले आफ्नो नयाँ क्षेत्र तय गरेका हुन्।

निर्वाचन क्षेत्र फेरिरहने प्रचण्डको आदत छ। २०६४ को निर्वाचनमा प्रचण्ड काठमाडौं- १० र रोल्पा- २ बाट निर्वाचित भएका थिए। २०७० मा भने उनी काठमाडौं- १० र सिरहा- ५ बाट उम्मेदवार बनेका थिए। तर, काठमाडौं- १० मा भने पराजित भएका थिए। २०७४ को निर्वाचनमा उनी चितवन-३ मा वामगठबन्धनको साझा उम्मेदवार बनेका थिए।

यसपटक उनी चितवनबाटै उम्मेदवार बन्ने तयारीमा थिए। त्यसैले उनको गोरखा यात्रालाई चितवनका माओवादी कार्यकर्ताले दुःखद् भन्दै सामाजिक सञ्जालमा प्रतिक्रिया व्यक्त गरेका छन्।

प्रचण्डले गोरखाबाट उम्मेदवार बन्ने निर्णय लिनुअघिका दुई पक्ष विचारणीय छन्, चितवन छाड्नुको कारण र गोरखा जानुको कारण।

चितवनमा उनी निर्वाचन जितिन्छ भनेर ढुक्क हुन सकेनन्। गत वैशाखमा सम्पन्न स्थानीय तह निर्वाचनमा चितवन- ३ अन्तर्गतका क्षेत्रमा माओवादीले उल्लेखनीय मत पाउन सकेको थिएन।

चितवन-३ अन्तर्गत भरतपुर महानगरपालिकाका वडाहरू ६, ८, ९, १३, १४, १५, १६, १७, १८, १९, २०, २१, २२, २३, २४, २५, २६, २७ र २८ तथा माडी नगरपालिकाका ९ वटै वडाहरू पर्छन्। यसरी सो क्षेत्रमा २८ वटा वडाहरू रहेका छन्।

स्थानीय तह निर्वाचनमा चितवन ३ अन्तर्गत पर्ने २८ वडामध्ये नेपाली कांग्रेसले १० वटा, एमालेले ४ वटा, माओवादी केन्द्रले ७ वटा, एकीकृत समाजवादीले ४ वटा, राप्रपाले २ वटा र स्वतन्त्रले एउटा वडाको अध्यक्ष जितेका थिए।

वडाअध्यक्षहरुले पाएको एकीकृत मतमा एमाले अगाडि छ। त्यहाँ एमालेले २९ हजार ७७१, नेपाली कांग्रेसले २९ हजार ३४३, माओवादी केन्द्रले १० हजार ९४०, राप्रपाले ६ हजार १९८, एकीकृत समाजवादीले ५, ०३७ र स्वतन्त्र तथा अन्य पार्टीले ३ हजार ५५९ मत पाएका छन्।

सत्ता गठबन्धनका दलहरुले कैयौँ वडाहरुमै पनि तालमेल गरेका थिए। त्यसैले थप केही मत तलमाथि हुनसक्छ। तर, माओवादी केन्द्र कमजोर रहेको बुझ्न भने कठिन छैन। चितवन-३ बाटै उम्मेदवार बन्दा प्रचण्डले अन्य दलको मतदाताको भर पर्नुपर्ने हुन्थ्यो।

फेरि, यस क्षेत्रमा गठबन्धनलाई लिएर असन्तुष्टि पनि सार्वजनिक हुने गरेकै छ। वैशाखको स्थानीय तहको निर्वाचनमा कांग्रेसबाट बागी उम्मेदवारी पनि परेको थियो। माओवादीकै कतिपय नेताहरु एमाले प्रवेश गरेको स्थिति पनि छ। अर्कोतिर, २०७४ को निर्वाचनताका प्रचण्डले गरेका कतिपय वाचा पनि पूरा नभएको भनेर उनको आलोचना हुने गरेको थियो।

अब लागौँ गोरखा- २ तिर। गोरखा- २ अन्तर्गत पालुङटार नगरपालिका, सिरानचोक गाउँपालिका, सुलिकोट गाउँपालिका, अजिरकोट गाउँपालिका पर्छन्। त्यस्तै, गोरखा नगरपालिकाका वडाहरु ८, ९, १०, ११, १२, १३ र १४ पर्छन्।

स्थानीय तहको निर्वाचनमा गोरखामा माओवादी केन्द्रले उत्कृष्ट नतिजा निकालेको थियो। एमाले कमजोर देखिएको गोरखामा उसले कांग्रेससँग मुख्य प्रतिस्पर्धा गरेको थियो।

गोरखा- २ अन्तर्गत पर्ने वडाहरुमा उम्मेदवार बनेका अध्यक्षको मत गणना गर्दा माओवादी केन्द्रले २२ हजार २५०, कांग्रेसले २१ हजार ५७८, एमालेले ८ हजार ४८४, जसपाले ७ हजार ५०४ र अन्य पार्टी तथा स्वतन्त्र उम्मेदवारले २ हजार ५२० मत पाएका थिए।

त्यस क्षेत्रमा जसपाले पाएको मत मूलतः डा बाबुराम भट्टराई नेतृत्वको नेपाल समाजवादी पार्टीसँग निकट मत रहेको बुझ्न सकिन्छ। भट्टराईले माओवादीसँगै तालमेल गरेका छन्। आफू उम्मेदवार नबन्ने निर्णय गरेका भट्टराईले गोरखा- २ मा प्रचण्डलाई स्वागत पनि गरिसकेका छन्। अर्कोतिर, गठबन्धनकै अर्को दल कांग्रेसको पनि मत थपिँदा प्रचण्ड बलिया उम्मेदवार बन्नेछन्।

गोरखा- २ प्रचण्डका लागि नयाँ क्षेत्र भएकाले चितवनमा जस्तो विगतको दायित्व उनीसँग हुनेछैन। त्यसको लाभ पनि उनले पाउन सक्छन्। प्रचण्डको व्यक्तिगत प्रभाव, निर्वाचनपछि पनि सो क्षेत्रमा आउने बजेट, चर्चामा आइरहने अन्य विषयलाई मतदाताले परीक्षण गर्नेछन्। त्यसैले पनि गोरखामा उनलाई थप सहज हुनसक्छ।