काठमाडौं- नेकपा एमालेकी निर्वतमान सांसद गंगा चौधरीले एक महिनाअघि भदौ २५ गते एउटा तस्बिरसहित पोष्ट गरिन्। जहाँ उनी अर्की सांसद शान्ता चौधरीसँग अंगालो मारेर बसिरहेकी थिइन्।
उक्त पोष्टमा क्याप्सन लेखिन्, ‘हामी दुई दिदीबहिनीमध्ये पार्टीले जसलाई टिकट दिएपनि एक भएर जानेछौं।’
दाङ- १ बाट प्रतिनिधि सभाका लागि प्रत्यक्षमा सिफारिस भएपछि उनले उक्त पोष्ट गरेकी थिइन्। आफूले प्रत्यक्षमा टिकट पाउने सम्भावना देखेका बेला उक्त पोष्ट गरेकी चौधरीको बोली भने एकक महिना पुग्नु ५ दिनअघि नै बदलिएको छ।
उक्त क्षेत्रबाट प्रत्यक्षमा शान्ता चौधरीले टिकट पाउने लगभग तय भएपछि उनी स्वतन्त्र उम्मेदवार बन्नेतिर लागेकी छिन्। सत्गौवाले सामाजिक सञ्जाल फेसबुकमार्फत् नै शुक्रबार स्वतन्त्र उम्मेदवारी घोषणा गरेकी छिन्।
शान्ता, गंगासँगै उक्त क्षेत्रमा एमालेले रेवतीरमण शर्मालाई सिफारिस गरेको छ। शान्ताले टिकट पाउने लगभग तय भएपछि दाङमै घरदैलो गरिरहेकी छिन्।
गंगाले टिकटका लागि गरेको लबिइङ असफल भएपछि बिद्रोह गरेको दाङका एमाले नेताहरु बताउँछन्। ‘आफूले टिकट पाउने सम्भावना देख्दा उहाँले जसलाई परेपनि एक भएर जाने भन्नुभयो। टिकट नपाउने भएपछि उहाँ फेरिनुभयो’, ती नेताले भने।
गंगाले सामाजिक सञ्जालमा लेखेकी छिन्, ‘आज मैले ठीक निणर्य गरेँ वा बेठिक मलाई थाहा छैन। राष्ट्र र राष्ट्रियताको लागि म सधैं लागि रहनेछु। जनता भगवान हुन्, जनता नै सर्वपरी हुन्। देशलाई शिरमाथि राखेर आज स्वतन्त्र उम्मेदवार भएर जनताको बिचमा आउँदैछु, हजुरहरुको साथ चाहिएको छ।’
अस्थिर गंगा
चौधरीको विगत हेर्दा उनी अस्थिर देखिन्छन्। दाङमा जन्मेकी उनले आफ्नो राजनीतिक यात्रा एमालेबाट २०४९ मै सुरु गरेकी थिइन्। तर, थरुहट मधेस आन्दोलनपछि भने एमाले परित्याग गरिन्। २०६४ मा संयुक्त थारु मोर्चाको उपाध्यक्ष बनिन्।
२०६८ मा थरुहट तराई पार्टीमा नेपालको उपाध्यक्ष तथा महिला विभाग प्रमुख भइन्। सोही पार्टीबाट २०७० सालदेखि चौधरीको सदन यात्रा सुरु भयो।
२०७० मा सम्पन्न संविधान सभा निर्वाचनमा थरुहट तराई पार्टी नेपालबाट दुई जना समानुपातिक सांसद् भएका थिए। त्यसमध्ये एक थिइन् चौधरी। सो पार्टीबाट सभासद् रहेकै अवस्थामा उनी डा बाबुराम भट्टराई नेतृत्वको तत्कालीन नयाँ शक्ति पार्टीसँग जोडिइन्।
२०७२ सालमा नयाँ संविधान जारी भयो। ‘थ्रेस होल्ड’को व्यवस्थासँगै साना पार्टीहरुको सदन यात्रा कठिन हुने निश्चित भयो। चौधरी भने नयाँ शक्ति र एमालेको समानुपातिक सूचीमा अटाइन्। एउटै व्यक्ति दुई वा सोभन्दा बढी पार्टीको समानुपातिक सूचीमा राख्न नमिल्ने भएपछि उनी एमालेको सूचीमा मात्रै रहिन्। औपचारिक रुपमा पार्टी प्रवेश नगर्दै उनी एमाले समानुपातिक उम्मेदवार भइसकेकी थिइन्। निर्वाचनपछि त सांसद् नै भइन्।
उनले नेपाल लाइभसँग केही समयअघि आफू प्रत्यक्षका लागि योग्य रहेको बताएकी थिइन्। उनले भनेकी थिइन्, ‘म अब प्रत्यक्षका लागि योग्य उम्मेदवार हो। मेरो दाबी अब प्रत्यक्ष उम्मेदवारका लागि हो।’
विवादित अभिव्यक्ति
सत्गौवा प्रतिनिधि सभामा नेकपा एमालेका केही सक्रिय सांसदहरुमध्ये अग्रपंक्तिमा थिइन्। सार्वजनिक चर्चामा आएका र नआएका अनेक विषयमा उनी आफ्नो धारणा राखिरहन्थिन्। संसद्बाहिर पनि सार्वजनिक सञ्चार माध्यममा उनी अभिव्यक्ति दिइरहन्छिन्। उनी विवादमा आइरहने व्यक्ति पनि हुन्।
चौधरीले प्रतिनिधि सभाको रोस्ट्रमबाटै तत्कालीन सहरी विकासमन्त्री रामकुमारी झाँक्रीलाई ‘ओठमा लिपिस्टिक लगाएर जति सुन्दरी बन्न चाहनुहुन्छ’ भन्दै ‘पाठ पढाएको’ प्रसंग होस् वा ‘मन मिल्दा लभको संज्ञा दिने, मन नमिल्दा बलात्कार’ भन्दै बलात्कारप्रति व्यक्त गरेको असंवेदनशील अभिव्यक्ति होस्; सदनमा उनको सक्रियताको छनक पाउन सकिन्छ।
बलात्कार जस्तो जघन्य विषयमा सत्गौवाले रोस्ट्रममा उभिएर भनेकी थिइन्, ‘अस्ति भर्खरकै 'केस' हो, पल शाह र (...) को कुरा। जबसम्म मन मिल्यो, तबसम्म लभको संज्ञा दिने। त्यसपछि आफ्नो स्वार्थ पूरा भएन भनेपछि बलात्कारको संज्ञा दिने। यसभन्दा पहिले पनि सम्मानित सदनमा बसेका पूर्वसभामुखको घटना पनि हामीले हेरेका छौँ। जबसम्म स्वार्थ मिल्यो, केही कसैलाई पत्तो थिएन। जब स्वार्थ मिलेन, त्यो ठाउँमा बलात्कारको संज्ञा दिएर उहाँलाई ६/६ महिना जेलमा कोचियो।’
यसैगरी, नेपाल मेडिकल काउन्सिलको नाम दर्ता (लाइसेन्स) परीक्षामा आफ्ना छोरा फेल भएपछि चौधरीले मेडिकल काउन्सिलमा कमिसनको खेल भएको आरोप लगाएकी थिइन्। प्रतिनिधि सभाको बैठकमा विनियोजन विधेयकमाथिको छलफलमा बोल्दै उनले मेडिकल काउन्सिलको कमिसनको खेलले डाक्टरहरु लाइसेन्स परीक्षामा फेल भइरहेको आरोप लगाएकी थिइन्।
उनले त्यतिबेला भनेकी थिइन्, ‘एउटै तहको परीक्षामा बिहान एउटा, दिउँसो अर्को र बेलुकै अर्कै खालको पेपर आउँछ। दु:ख गरेर डाक्टर बनेकाहरु फेल हुन्छन्। ती पीडितको दु:खमा मेडिकल काउन्सिल रमाइरहेको छ।’
काउन्सिल स्रोतका अनुसार चौधरीका छोरा लाइसेन्स परीक्षामा तीनपटक फेल भए। बंगलादेशमा पढेर आएका चौधरीका छोराले लाइसेन्स परीक्षामा पटक-पटक नाम निकाल्न नसकेपछि उनले नाम निकालिदिन भन्दै दबाब दिँदै आएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
