काठमाडौं– नेपालका लागि भारतीय राजदूत नविन श्रीवास्तवले महात्मा गान्धी दिवसलाई नेपालमा पनि स्वच्छता दिवसको रुपमा मनाउनुपर्ने बताएका छन्।
१५३ औं गान्धी जयन्ती तथा अन्तर्राष्ट्रिय अहिंसा दिवसको अवसर पारेर आइतबार काठमाडौंमा आयोजित एक कार्यक्रममा बोल्दै उनले यस्तो बताएका हुन्।
राजदूत श्रीवास्तवले महात्मा गान्धीको विचारधारालाई विश्वमा नै फैलाउन सक्नुपर्ने बताए। उनले भारतमा महात्मा गान्धीको स्मरणमा हरेक वर्ष स्वच्छता दिवस मनाउने गरिएको भन्दै नेपालमा पनि यो दिवस मनाउँदा राम्रो हुने बताए। उनले गान्धीका नैतिक र आध्यात्मिक विचारधारा अँगाल्ने हो अहिंसा र शान्तिको पथमा समाज रुपान्तरण हुने बताए।
उनले भने, ‘गान्धीजीको विचार, नैतिक मूल्य, मान्यताद्वारा भारतको स्वाधिनताको संग्राम नेतृत्व भयो। गान्धीजीको विचार कसरी व्यवहारमा लागू गर्ने भन्ने कुरा छ। गान्धीजी आज हामीसँग नभए पनि उहाँका नैतिक र आध्यात्मिक मूल्यका कारण, विचारधाराका कारण भारत र नेपाल मात्रै नभइ विश्वका नेताहरुले उहाँको विचारधारालाई अघि बढाएका छन्। नेल्सन मण्डेला पनि गान्धीजीको विचारधारलाई अँगालेर दक्षिण अफ्रिकाको भेदभावलाई अन्त्य गर्नसक्नुभयो। गान्धीजीले अर्को कुरा गर्नुभएको थियो। जुन भारतमा स्वच्छता दिवसको रुपमा हामी मनाउँछौँ। प्रधानमन्त्री मोदीले २०१४ मा महात्मा गान्धी दिवसलाई स्वच्छता दिवस, स्वच्छताको एक अभियान लागू गर्न भन्नुभएको थियो। यो दिवस भारतमा त हामी मनाउँछौँ नै नेपालमा पनि यसको अनुशरण भयो भने राम्रो नै हुन्छ।’
उनले महात्मा गान्धीको विचारधाराको एकांश पनि कसैले आफ्नो जीवनमा अनुशरण गर्ने हो भने समाज शान्त र सुव्यवस्थित बन्ने दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
