फाइल फोटो
काठमाडौं- नेपाली कांग्रेसमा समानुपातिक सूचीमा रहेको असहमति नेताहरुले शनिबार रातभर बसेर टुंग्याएका छन्। शनिबार दिउँसोदेखि आइतबार बिहानसम्म प्रधानमन्त्री निवास बालुवाटारमा छलफल गरेर अन्तिम सूची बनाएका हुन्।
आइतबार निर्वाचन आयोगमा गएर सच्याइने सूचीमा संस्थापनइतर समूहले ३५ प्रतिशत पाएको दाबी गरेका छन्। कम्तिमा ४० प्रतिशत दाबीसहित संस्थापन पक्षले बुझाएको सूचीमा फरक मत राखिरहेको उक्त पक्षले ३५ प्रतिशतमै चित्त बुझाएको हो। कांग्रेसले पाउने जम्मा समानुपातिक सिटमा एक तिहाइ आफ्नो नघट्ने ग्यारेन्टी गरेको उक्त पक्षका नेताहरु बताउँछन्।
शनिबार दिन र रातभर चलेको बैठकमा प्रधानमन्त्री तथा कांग्रेस सभापति शेरबहादुर देउवा, नेताहरु रामचन्द्र पौडेल, शेखर कोइराला, महामन्त्रीद्वय गगन थापा र विश्वप्रकाश शर्माहरु सहभागी थिए। बैठकमा सहभागी एक नेताका अनुसार सुरुमा निकै चर्काचर्की परेको थियो।
विशेषगरी प्रधानमन्त्री देउवापत्नी आरजु राणा र गृहमन्त्री बालकृष्ण खाँण पत्नी मञ्जु खाँणको नाममा संस्थापनइतर समूहले विरोध जनाएको थियो। कांग्रेसमा योगदाखन दिएका तर अवसर नै नपाएका कार्यकर्ता छुटेको तर उनीहरुको नाम प्राथमिकताका साथ परेको भन्दै संस्थापनइतरका नेताहरु कडा रुपमा प्रस्तुत भएका थिए।
तर, संस्थापन पक्षका नेताहरु ती नाममा सम्झौता गर्न तयार भएनन्। अन्तिममा ती नामहरु समावेश गरेर तर पहिलेको भन्दाा सूचीमा पछाडि राखेर पठाउने सहमति भएको एक नेता बताउँछन्। आइतबार बिहान आइपुग्दा मात्रै सवैले 'अपनत्व लिने' सूची तयार गर्न सकिएको एक नेता बताउँछन्। अपनत्व लिए पनि खुशी भने दुवै पक्ष नरहेको देखिन्छ।
संस्थापन पक्ष, संस्थापनइतर पक्ष, रामचन्द्र पौडेल र कृष्ण सिटौलागरी कांग्रेसका ४ समूहको भागबन्डा समानुपातिक सूचीमा देखिने बैठकमा सहभागी एक नेता बताउँछन्। ‘केही समेट्नैपर्ने नाम समेटिएकोमा खुशी भएर सूचीमा सहमत हुने अवस्था आयो। अझै भनेजस्तै गरी पूर्ण बनाउन सकिएन,’ संस्थापनइतरका एक नेताले भने।
कांग्रेसले यसअघि बुझाएको १०९ जनाको बन्दसूचीमा कोइराला पक्षका जम्मा १३ जनामात्र परेका थिए। यसरी सूचीमा समावेश भएका १३ जना पनि क्लष्टरको पुछारमा राखिएको भन्दै शेखर पक्षले आपत्ति जनाएको थियो। उक्त समूहले सम्मानजनक उपस्थिति नभए बिद्रोह गर्ने समेत चेतावनी दिएको थियो।
निर्वाचन आयोगले आइतबार बेलुका ५ बजेसम्म संशोधित सूची बुझाइसक्न भनेको छ। उक्त समयपछि आयोगले समानुपातिकतर्फ सूचीमा रहेका व्यक्तिहरुको नाम सार्वजनिक गर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
