काठमाडौं– नेकपा माओवादी केन्द्रका उपमहासचिव तथा अर्थमन्त्री जनार्दन शर्माले अहिले कुनै पनि सहमति नभएको बताएका छन्।
सामाजिक सञ्जालमा गठबन्धनभित्र सिटका लागि सहमति भएको भन्दै विवरण सार्वजनिक भइरहेका बेला नेता शर्माले आधिकारिक रुपमा अहिले कुनै सहमति नभएको बताएका हुन्।
उनले अहिलेको राजनीतिक विषयमा माओवादीका नेता कार्यकर्ताले देखाएको चासो र चिन्तालाई धन्यवाद दिँदै उनले सबैको भावनालाई आफूले राम्रोसँग बुझेको बताएका छन्।
अहिले कुनै सहमति भइसकेको जानकारी नपाइएको स्पष्ट पार्दै नेता शर्माले धैर्य रहन र पार्टीको आधिकारिक सहमतिको प्रतिक्षा गर्न अनुरोध गरेका छन्।
उनले भनेका छन्, ‘देशभरिका हाम्रो पार्टीका कमरेडहरुलाई अहिलेको मुख्य राजनीतिक विषयमा देखाउनु भएको चासो , चिन्ता र सरोकार प्रति हार्दिक धन्यबाद छ। सम्पूर्ण साथीहरुको भावना र स्प्रीटलाई मैले राम्रोसँग बुझेको छु। सबैको भावना र स्प्रीटलाई उच्च सम्मान गर्दै अहिलेसम्म कुनै पनि सहमति भैसकेको जानकारी नपाइएको स्पष्ट गर्दै सबैलाई धैर्य रहन र पार्टीको आधिकारिक सहमतिको प्रतिक्षा गर्न हार्दिक अनुरोध गर्दछु।’
माओवादीको आधार क्षेत्रमा पनि कांग्रेसको भाग पारिएको भन्दै सामाजिक सञ्जालमा माओवादी नेता कार्यकर्ताले चर्को असन्तुष्टि पोखिरहेका बेला नेता शर्माले कार्यकर्तालाई धैर्य गर्न अनुरोध गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
