काठमाडौं– सत्तारुढ दल नेपाली कांग्रेसले प्रधानमन्त्री र मन्त्रीहरुले निर्वाचनको प्रचार–प्रसार कार्यक्रममा जान पाउनुपर्ने बताएको छ।
निर्वाचन आयोगले प्रधानमन्त्री र मन्त्रीहरु पार्टीको कुनै पनि प्रचार–प्रसारमा जान नपाइने आचारसंहिता ल्याइरहेको अवस्थामा कांग्रेसले आयोगको आचारसंहिता अव्यवहारिक भएको बताएको हो।
मंगलबार कांग्रेसले पत्रकार सम्मेलनको आयोजना गर्दै निर्वाचन आयोगको आचारसंहिता अव्यवहारिक भएको टिप्पणी गरेको छ।
कांग्रेस प्रवक्ता डा प्रकाशशरण महतले भने, ‘निर्वाचन आयोगले यसपटक जारी गरेको आचारसंहिता अव्यवहारिक भएको गुनासो सर्वत्र व्याप्त छ। गठबन्धनका दलहरुसहित प्रतिपक्षी दललेसमेत प्रधानमन्त्री र मन्त्रीहरुले प्रचारमा जान नपाउने प्रावधान व्यवहारिक भएन भनिरहेका छन्। प्रधानमन्त्री देशको कार्यकारी प्रमुख भएकोले उहाँको सुरक्षा संवेदनशीलतालाई ध्यानमा राखेर उहाँका दैनिक भ्रमण हुने गर्दछन्।’
प्रवक्ता महतले प्रधानमन्त्री कांग्रेसको समापति पनि भएकाले जनमत बनाउन प्रचार–प्रसारमा हिँड्न पाउनुपर्ने तर्क गरे।
उनले भने,‘प्रधानमन्त्री हाम्रो पार्टीको पनि सभापति हुनुहुन्छ, मन्त्रीहरु पनि पार्टीको महत्वपूर्ण जिम्मेवारीमा हुनुएकाले आफ्नो पार्टीका पक्षमा जनमत बनाउन हिँड्न नपाउने भन्ने कुरा व्यवहारिक छैन। निर्वाचन आयोगले अन्तर्राष्ट्रिय अभ्यासहरुलाईसमेत हेरेर यसलाई लचिलो बनाउँछ भन्ने हामीले विश्वास लिएका छौं।’
त्यसैगरी कांग्रेसले गठबन्धनको भागबण्डाको कुरा एक/दुई दिनमा टुंगिने जनाएको छ। सिट बाँडफाँट सकिएलगत्तै कांग्रेसले लिएका क्षेत्रहरुमा प्रत्यक्ष तर्फको उम्मेदवार टुंगो लाग्ने प्रवक्ता महतले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
