शेखर पक्षको कार्यक्रमप्रति कांग्रेस प्रवक्ताको टिप्पणी- जे भइरहेको छ, अनावश्यक भइरहेको छ

राजनीति

नेपाल लाइभ मंगलबार, असोज ११, २०७९ १५:५९

काठमाडौं- नेपाली कांग्रेसका प्रवक्ता प्रकाशशरण महतले पार्टीभित्र शेखर कोइराला पक्षले आयोजना गर्न लागेको कार्यक्रमलाई अनुपयुक्त भनेका छन्।

कांग्रेसले निर्वाचन आयोगमा बुझाएको बन्दसूचीप्रति असन्तुष्टि र प्रत्यक्षतर्फ टिकट वितरणमा आशंका गर्दै कोइराला पक्षले खबरदारीका लागि विभिन्न कार्यक्रमको तयारी गरेको सन्दर्भमा बुधबार उनले यस्तो टिप्पणी गरेका हुन्।

कोइराला पक्षबाट सार्वजनिक भइरहेका अभिव्यक्ति र कार्यक्रम पार्टीभित्रको अनुशासनको कुरा नभएको महतको भनाइ छ। ‘जे भइरहेको छ, अनावश्यक छ। साथीहरुलाई अन्योलमा पार्ने काम हुन्छ। पार्टी हितमा छैन’, मंगलबार पार्टी कार्यालय सानेपामा आयोजित पत्रकार सम्मेलनमा उनले भने।

महतले समानुपातिक सूची तयार गर्ने काम सर्वसम्मतिबाट भएको पनि दाबी गरे। उनले भने, ‘सम्पूर्ण निर्णय आम सहमतिबाट पदाधिकारी, पूर्वपदाधिकारी र संसदीय बोर्डका सदस्यहरु, आमन्त्रित नेतागण, प्रदेशका पनि सभापतिहरुलाई समावेश गरेर सहमतिबाट, प्रदेश प्रदेश गरी सातै प्रदेशमा छुट्याएर त्यहाँका अग्रणी नेताहरु सामेल भएर सूची पेस गरिएको छ। त्यहाँ त्रुटि छन्। तर, एउटा पक्षलाई पक्षपोषण गरियो या अर्को पक्षलाई कमजोर गर्ने हिसाबले केही पनि भएको छैन।'

महतले एकलौटी गरियो या छलफल नै भएन भन्ने कुरामा कुनै पनि सत्यता नरहेको बताए। ‘अहिले १० प्रतिशत पनि छैन, या हामी यस्तो वा उस्तो गर्छौं भन्ने अभिव्यक्तिहरु आइरहेका छन्। त्यो वाञ्छनीय होइन। र सम्पूर्ण निर्णय सहमतिबाट भएको छ’, उनले भने, ‘जहाँ त्रुटिहरु भएका छन्, त्यो स्वभाविक हो। कुनै पक्ष वा विपक्षमा गरिएको निर्णय होइन। पार्टीले र अहिले गठबन्धनको पनि नटुंगिसकेको अवस्थामा कतिपय साथीहरुलाई समावेश गर्नुपर्ने कारणले परिमार्जन हुनसक्दछ।’

गठबन्धनबाट सिट बाँडफाँट नटुंगिसकेको अवस्थामा कतिपय साथीहरुलाई समावेश गर्नुपर्ने कारणले सूची पठाइएको र त्यो परिमार्जन हुनसक्ने प्रवक्ता महतको भनाइ छ।

‘पक्ष विपक्षका आधारमा भेदभाव भएको छैन। यो कुरा सम्पूर्ण नेतागण, पदाधिकारी र पूर्वपदाधिकारीलाई थाहा छ। पार्टीको अधिवेशनमा सभापतिमा लड्नुभएका उम्मेदवारहरुलाई थाहा छ’, उनले भने।

उनले सबै भएर सर्वसम्मतिबाट गरेको निर्णयमा के–के न पो भयो कि भन्ने जसरी केही साथीहरु प्रस्तुत भएको भन्दै त्यो उपयुक्त नभएको टिप्पणी गरे। ‘फेरि पनि म दोहोर्‍याएर भन्छु, कुनै द्विविधामा नपर्नुहोला। शंका गर्नुपर्ने आवश्यकता छैन। जो साथीहरु संलग्न हुनुहुन्छ, उहाँहरुलाई अनुरोध गर्न चाहन्छु, सम्पूर्ण नेताहरु नै बसेर निर्णय भएको छ। त्यो उहाँहरु (असन्तुष्टि व्यक्त गरिरहेका नेताहरु)लाई पनि थाहा छ’, उनले भने।

सोमबार मात्रै शेखर पक्षका नेताहरुले १२ गते १२ बजे पार्टी कार्यालयमा शान्तिपूर्ण धर्ना र १३ गते विरोध स्वरुप चियापान कार्यक्रम गर्ने निर्णय लिएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

जेनेभामा स्वास्थ्य मन्त्री पाैडेलले भने- ‘वैदेशिक विकास सहायता कटौतीले नेपालको मातृशिशु स्वास्थ्यमा समस्या’

दुर्गा प्रसाईंलाई थप ४ दिन हिरासतमा राख्न अदालतको अनुमति

पशुपति क्षेत्र विकास कोषभित्र जुवा खेलिरहेका ७ जना पक्राउ