कुर्दाकुर्दै प्रतीक्षाको घडी पनि समाप्त भएको छ। तपाईंहरुले असाध्यै प्रतीक्षा गरेको चलचित्र ‘प्रेम गीत ३’ भोलिदेखि नेपाली र हिन्दी भाषामा विश्वका धेरै देशमा प्रदर्शन हुँदैछ। मलाई लाग्छ, यो खबरले म र मेरो टिमभित्रका सदस्यहरुका लागि भन्दा पनि नेपाली चलचित्रको सफलता चाहने हरेक नेपालीहरुको दिल हर्षित बनाएको छ।
त्यसबेला मनमा अन्तरकुन्तरमा के होला? कता पुगिएला जस्तो लागेको थियो। तर, हाम्रो प्रयासका लागि समग्र नेपाली दर्शक, नेपाली फिल्म मेकर्स, कलाकारहरु तथा शुभचिन्तकहरुको निरन्तर साथ, हौसलाले हाम्रा लागि नेपालका १–२ सय हलमा मात्रै होइन, नेपालीहरु रहेका हरेक देश र अन्य भाषाकै माध्यमबाट भएपनि नेपाली प्रोडक्ट अन्य समुदायका नागरिकहरुमा पनि पुग्नुपर्छ भन्ने फिल भएको हो। सोही अनुसार हामीले ठूलो जोखिम मोलेका हौं।
विश्व चलचित्र बजारको मुलधारमा नेपाली फिल्मले लय समात्छ भन्ने हामी कसैलाई लागेको थिएन। मलाई, मेरा कलाकार तथा प्राविधिक र सायद धेरै हाम्रा शुभचिन्तकहरुका लागि पनि सम्भव होला त? भन्ने अनावश्यक भावनाले हाम्रो दिमागमा राज गरेको थियो।
अन्य भाषामा निर्माण भएका चलचित्र बलिउड बजार छिर्न थोरै पसिना बगाएर पुग्दैन। अझ नेपालमा पनि फिल्म बन्छन् र? भन्ने बलिउडको धारणा चिर्दै हामीलाई बलिउड मेकर्सले एउटा ढोका खोल्नुभयो। म यसका लागि मेरो भारतीय टिमप्रति असाध्यै कृतज्ञ छु।
हामीले गरेको काम एक हिसाबले व्यवसाय होला। तर, व्यवसायभन्दा पनि चलचित्र उद्योगको विकास र स्तरोन्नतिका लागि एक नेपाली मेकर्सको जिम्मेवारी र कर्तव्य पनि हो। आफ्नै लागि अथवा पैसा कमाउनका लागि वर्षौंसम्मको यो दुःख आवश्यक थिएन। म चलचित्र उद्योगकै लागि यतिका वर्ष निरन्तर लागेको हुँ। नेपाली फिल्म पनि स्तरीय र नेक्स्ट लेभलको बन्छ भन्ने देखाउनुछ। हाम्रा फिल्महरु पनि निरन्तर बलिउड र हलिउड फिल्म लाग्ने हलहरुमा लाग्नुपर्छ। मेरो टिमले त्यही अनुसार काम गरेको हो।
ठूला लगानी र ठूला ब्यानरबाट निर्माण हुने बलिउड र हलिउडका लागि हाम्रो चलचित्रको आकार सानो देखिएला। सायद हाम्रो क्षमताको पहिलो मापन पनि हो। तर, बलिउडका हलहरुमा तथा नेपाली हलहरुमा उत्साहजनक अग्रिम बुकिङले असाध्यै खुशी छौं।
मेरा स्वाभिमानी तथा मिहेनति टिम मेम्बर, सम्पूर्ण नेपाली दर्शक, समग्र नेपाली चलचित्र उद्योगमा रहनुभएका फिल्मकर्मीहरुप्रति हार्दिक आभार तथा धेरै धेरै धन्यवाद व्यक्त गर्न चाहन्छु।
हुन त हरेक मानिसका आफ्नै किसिमका गुनासा हुन्छन्। गुनासा धेरै हुन सक्छन्। तर, मेरा लागि त्यस्तो धेरै कुनै गुनासो छैन। हामीलाई चलचित्रकर्मीका पीडा, चलचित्र मेकर्सका पीडा थाहा छ। तर, एकले अर्काको पीडा फिल गर्न सक्दैनौं। चलचित्र उद्योग व्यवसायिकरण हुन सकेन भन्दै गुनासो पोख्छौं। साउथ र अन्य भाषाका फिल्मले एकाएक छलाङ मार्दा लोभिन्छौं। तर, हामी स्वयं घरभित्रका किन अनावश्यक झै–झगडा, अनावश्यक खुट्टा तान्ने, असहयोग किन गर्छौं? यो परिपाटीले पक्कैपनि हामी उद्योगमा निरन्तर काम गर्नेहरुका लागि राम्रो गर्दैन।
अर्को कुरा, एउटा नेपाली चलचित्र संसारभरका १ हजार भन्दा धेरै हलमा लाग्दैछ। हिन्दी भाषामार्फत् नेपाली चलचित्रले विश्व चलचित्र उद्योगमा प्रवेश गरेको छ। तर, अनावश्यक एकले अर्कालाई गाली गर्ने, सधै सत्ताको लागि लडाइँ गर्ने राजनीतिक दलका नेताहरु यसबारे बेखबर किन हुनुभएको होला? चलचित्र उद्योगको स्तरोन्नतिका लागि उहाँहरुको कुनैपनि दायित्व छैन र? चलचित्र उद्योग पनि उद्योग हो, यो उद्योगमा पनि धेरै नेपालीहरु आश्रित छन् भन्ने किन उहाँहरुलाई अहिलेसम्म मनन् भएन होला?
हामीहरुको यो सफलतामा उहाँहरुले हौसलास्वरुप केही धारणा राख्ने, समाजिक सञ्जालहरुमार्फत् हामीहरुका लागि थप प्रेरणा दिने किसिमका कुनै पोस्टहरु राख्नुपर्ने होइन ?
भारतमा मुख्यमन्त्री, मन्त्रीहरु तथा विभिन्न राजनीतिक दलका नेताहरुले निरन्तर चासो दिनुभएको छ। यहाँका व्यापारी, उद्योगपतिहरुले चासो दिइरहनुभएको छ। तर, स्वयं मेरो देशका नेता तथा मन्त्रीहरु कता हुनुहुन्छ खै!
म नेपाली हुँ, नेपालबाट पनि राम्रा फिल्म बन्नुपर्छ भन्ने सोच अनुसार निरन्तर पैसा खन्याइरहेको छु। फिल्मको स्तरोन्नतिका लागि यति गर्दै गर्दा राज्य चलाउने, सिस्टम बसाल्ने हाम्रा अभिभावकबाट यति आशा, अपेक्षा त गर्न पाइन्छ होला नि !
साउथ फिल्म हिन्दी भाषामा डबिङ भएर हेर्ने दर्शकले साउथ फिल्म नै भन्नुहुन्छ। हामीले अन्तर्राष्ट्रिय बजारमा जानका लागि हिन्दी भाषाको सहयोग लिँदा यसलाई भारतीय फिल्म नभनिदिएको भए हुन्थ्यो, यो सानो गुनासो थियो। तर, भर्खरै मैले नेपालबाट सुनेको खबरअनुसार सञ्चार तथा सूचना प्रविधि मन्त्रालयले प्रेम गीत ३ को हिन्दी संस्करणलाई नेपाली फिल्म नै भएको ठहर गरेको छ। मन्त्रालयको यस्तो निर्णयपछि ‘प्रेम गीत ३’को हिन्दी संस्करणले पनि नेपाली फिल्मको सेवा सुविधा सरह प्रदर्शनको मौका पाएको छ। साथै, १५ प्रतिशत विकास शुल्क पनि तिर्नुपर्ने छैन। तर, चलचित्र विकास बोर्डले यो कुरा पहिल्यै बुझ्नुपर्ने थियो होइन र?
चलचित्रकर्मीहरुको दुःख र पीडा बुझ्ने हाम्रो अभिभावक संस्था चलचित्र विकास बोर्डले दर्शकहरुको माग अनुसार फिल्म हललाई सौहार्दपूर्ण वातावरणमा फिल्म लगाउने वातावरण बनाइदिन फेरि पनि विनम्र अनुरोध गर्दछु।
चलचित्र प्रेम गीत ३ भोलिदेखि तपाईंहरुका लागि पस्कँदैछौं। सम्पूर्ण नेपाली दर्शक तथा हाम्रा शुभचिन्तकहरुका लागि फेरि पनि धेरै धेरै आभार तथा धन्यवाद प्रकट गर्न चाहन्छु।
(सेन चलचित्र ‘प्रेम गीत ३’ का निर्देशक तथा निर्माता हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
