लमजुङ– सहरी विकासमन्त्री मेटमणि चौधरीले काम समयमा हुन्छ वा हुँदैन भन्ने कुराको निगरानी गर्न स्थानीय जनतालाई आग्रह गरेका छन्।
सत्रसय–दुराडाँडा–अर्चल्यानी सडक स्तरोन्नती कार्यक्रमको शिलान्यासपछि आयोजित सभामा बोल्दै मन्त्री चौधरीले भने, ‘झलनाथ खनाल प्रधानमन्त्री हुँदा प्रादेशिक सडकका रुपमा विकास गरिएको यो सडक आज हाम्रो काँधमा आएको छ। हामीले यो सडकलाई थप स्तरीय बनाउने छौं। कालोपत्रे गर्ने छौं। यो सडक निर्माण सम्पन्न भएपछि यहाँका जनतालाई ठूलो राहत हुनेछ। काम समयमा हुन्छ कि हुँदैन भनेर निगरानी गर्नुस्।’
‘हिजो एउटा परिस्थिति थियो। मैले बाटो ल्याएँ। मैले विकास गरेँ भन्ने स्थिति थियो। तर, अहिले समय बदलिएको छ। हिजो झगडा गर्ने संस्कार थियो। अब मिलेर विकास गर्ने समय आएको छ। अब तपाईंहरुले विकास सरकारले गर्यो भन्नुपर्छ। नेपाल सरकारले सहरी मन्त्रालयले कामको सुरुआत गर्छ। सहजीकरण नगरपालिकाले गर्छ। सम्बन्धित वडाले गर्छ। काम समयमा भएको छ कि छैन यो कुरा तपाईंहरुले हेर्ने हो। हाम्रो गाउँ आफैं बनाउने हो। आफ्नो ठाउँ आफैं बनाउने हो।’
सहरी मन्त्रालयका सचिव डा. रमेश प्रसाद सिंहले सडक विकासका लागि नियमित बजेटको व्यवस्था गरिने प्रतिबद्धता जनाए। त्यसैगरी सहरी विभागका उपमहानिर्देशक नारायण भण्डारीले सडक विस्तारसँगै जनताको आय आर्जन बढ्ने धारणा राखे।
संघीय आयोजना कार्यान्वयन इकाइ कास्कीका आयोजना प्रमुख सुरोज पौडेलले सडकको विकासले माछापुच्छ्रे, अन्नपूर्ण, मनास्लु जस्ता थुप्रै हिम श्रृंखला हेर्ने पर्यटकको ओइरो लाग्ने बताए। त्यसका साथै उनले ग्रामिण भेगमा होम स्टेदेखि लिएर आर्थिक तथा सामाजिक रुपान्तरण हुने धारणा राखे।
५१ करोड ९५ लाख ९३ हजार ९९ लागत अनुमान गरिएको उक्त सडकको कूल लम्बाई १५.०२ किलोमिटर हुने छ भने सडकको चौडाई ७.० मिटर (डे«न बाहेक) र कालोपत्रेको चौडाई ५.५ हुने जनाइएको छ।
त्यसैगरी सहरीमन्त्री चौधरीले तनहुँको व्यास नपा मानुङ्गमा निर्मित पर्यटकीय मार्गको उद्घाटनसमेत गरेका छन्। उक्त सडकको कूल लागत ७ करोड ३ लाख १३ हजार ३८९ रहेको छ भने सडकको लम्बाई ४.६ किलोमिटर रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
