फाइल फोटो
काठमाडौं– आगामी मंसिर ४ गते हुने प्रतिनिधि सभा र प्रदेश सभा निर्वाचनका लागि समानुपातिकको सूची बुझाएसँगै गठबन्धनमा आबद्ध दलहरु प्रत्यक्षतर्फको सिट बाँडफाँटमा पुन: केन्द्रित भएका छन्।
समानुपातिक सूचीको तयारी स्वरुप पछिल्लो केही दिनयता गठबन्धनको बैठक बसेको थिएन। सोमबार समानुपातिकतर्फको बन्दसूची निर्वाचन आयोगमा दलहरुले बुझाएका छन्। मंगलबार बालुवाटारमा बैठक बस्नै गठबन्धनको तयारी छ।
गठबन्धनमा अबद्ध दलहरुकाबीचमा प्रत्यक्षतर्फको १ सय ६५ सिट बाँडफाँट गर्न सकस परेको छ। गठबन्धनले कार्यदल नै बनाएर प्रत्यक्षतर्फको सबै १ सय ६५ सिट माथि अध्ययन गरे पनि दलहरुको आ–आफनो दाबीका कारण अहिलेसम्म सहमति हुन सकेको छैन।
गठबन्धनको प्रमुख घटक कांग्रेसले ८० देखि ९० को बीचमा, माओवादीले ४० देखि ४५ सम्म प्रत्यक्षतर्फको सिट लिन सहमत बने जस्तो देखिए पनि एकीकृत समाजवादी र जसपाले कति सिट लिने भन्ने टुंगो लागिसकेको छैन।
एकीकृत समाजवादी र जसपा नेपाल दुवैले ३० सिटमा दाबी गरेपछि गठबन्धनमा सिट बाँडफाँट मिल्न नसकेको हो। यद्यपि कांग्रेस र माओवादीको पनि कति पय सिटमा दोहोरो दाबी अहिलेसम्म कायमै छ।
राष्ट्रिय जनमोर्चाकी उपाध्यक्ष दुर्गा पौडेलले अबको एक हप्ताभित्र सिट बाँडफाँटको टुंगो लगाउने गरी शीर्ष तहमा कामहरु भइरहेको छ। सोमबार मात्रै प्रधानमन्त्री शेरबहादुर देउवा र माओवादी अध्यक्ष पुष्पकमल दाहालबीच छलफल भएको छ। मंगलबार गठबन्धनका शीर्ष नेताहरुबीचमा बालुवाटारमा छलफल हुँदै छ।
जनमार्चाकी उपाध्यक्ष पौडेलले विगतमा गठबन्धनको कार्यदलले दिएको प्रतिवेदन र शीर्ष तहमा भएको छलफलको आधारमा अब चाँडै सिट बाँडफाँटको टुंगो लाग्ने दाबी गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
