काठमाडौं– पूर्वप्रधानन्यायाधीशहरू पनि महाभियोग सिफारिस समितिमा छलफलका लागि नजाने भएका छन्।
निलम्बित प्रधानन्यायाधीश चोलेन्द्र शमशेर राणाले समितिलाई दिएको बयानका क्रममा पूर्वन्यायाधीहरूले पनि सर्वोच्चलाई दबाब दिने गरेको, आफूलाई मुद्दाको सुनुवाइमा दबाब दिएको लगायतका आरोप लगाएका थिए।
त्यसपछि पूर्वप्रधानन्यायाधीहरू मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीलाई समितिले बिहीबार छलफलका लागि बोलाएको थियो। तर, उनीहरुले समितिमा उभिएर आफूहरुले बयान दिन उपयुक्त नहुने भएकाले समितिलाई सम्मान गर्दै नजाने निर्णय गरेको पूर्वप्रधानन्यायाधीश अनुपराज शर्माले बताए।
पूर्वप्रधानन्यायाधीशहरू उक्त छलफलमा जानु उपयुक्त नहुने सल्लाह भएको र आफूहरूले यसबारे आफ्नो धारणा लिखित रूपमै केही बेरमा सार्वजनिक गर्ने पूर्वप्रधानन्यायाधीश शर्माले बताए।
राणाले समितिसमक्ष बयानका क्रममा नाम लिएका ६ न्यायाधीश र ४ पूर्वप्रधानन्यायाधीशलाई समितिले सोधपुछका लागि बिहीबार बोलाएको थियो। पूर्वन्यायाधीश समाजले पनि बुधबार नै आफ्नो धारणा पत्रकार सम्मेलन गरेर सार्वजनिक गरिसकेको छ।
यस्तै, सर्वोच्चको फुलकोर्टले न्यायाधीशहरूलाई महाभियोग सिफारिस समितिमा उपस्थित गराएर सवालजवाफ गर्नु संवैधानिक मान्यताविपरीत हुने ठहर गरेको थियो। त्यसकारण कुनै पनि न्यायाधीश समितिमा नजाने फुलकोर्टको निर्णय थियो।
सर्वोच्च अदालतका कामु मुख्य रजिस्ट्रार नारायण पन्थीले फुलकोर्टको उक्त निर्णय बुधबार नै महाभियोग सिफारिस समितिलाई पठाइदिएपछि बिहीबार बिहान साढे ८ बजे बोलाइएको बैठक दिउँसो बजेका लागि सारिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
