काठमाडौं- प्रधानमन्त्री तथा लगानी बोर्डका अध्यक्ष शेरबहादुर देउवाले देउवाले ‘परियोजना बैंक’ सार्वजनिक गरेका छन्।
सार्वजनिक-निजी साझेदारीमा कार्यान्वयन गरिने प्राविधिक र आर्थिक दृष्टिले सम्भाव्य लगानीयोग्य परियोजनाहरूको संग्रहको सूची तयार गर्ने उद्देश्यले लगानी बोर्डले तयार पारेको परियोजना बैंक सार्वजनिक गरिएको उनले जनाएका छन्।
लगानी बोर्डले बुधबार आयोजित दिगो पूर्वाधार लगानी फोरम उद्घाटनका क्रममा लगानीकर्ता सहजीकरणका लागि तयार पारिएको ‘वान स्टेप सर्भिस’ प्राविधिक प्रणालीको पनि देउवाले शुभारम्भ गरे।
उक्त डिजिटल प्लेटफर्ममार्फत लगानीकर्ताले लगानीका विषयमा जानकारी तथा जिज्ञासा राख्न सक्ने र लगानी सहजीकरणसँग सम्बन्धित सबै निकायहरू आवद्ध भई शीघ्र र प्रभावकारी सेवा प्रदान गर्नेछन्।
प्रधानमन्त्री देउवाले नेपालमा रासायनिक मल कारखाना स्थापनाका लागि लगानी बोर्डद्वारा तयार पारिएको ‘नेपालमा मल प्लान्ट स्थापना गर्ने’ अध्ययन प्रतिवेदन पनि सार्वजनिक सार्वजनिक गरे। उक्त अध्ययन प्रतिवेदनमा इलेक्ट्रोलाइसिस र प्राकृतिक ग्यासबाट मल कारखाना सञ्चालनको तुलनात्मक अध्ययन प्रस्तुत गरिएको छ।
उनले नेपालले सन् २०४५ सम्म शून्य कार्बन उत्सर्जनको लक्ष्य प्राप्तिका लागि साध्य र साधन तयार हुनुपर्ने बताउँदै यस उद्देश्य प्राप्तिका लागि सहयोग बढाउन विकास साझेदारहरूलाई आह्वान समेत गरेका थिए।
लगानी बोर्डले लगानी प्रवर्द्धनको मुख्य उद्देश्य सहित स्वदेश र विदेशमा यस्ता प्रवर्द्धनात्मक कार्यक्रमहरू, रोड सो, परियोजना ‘सोकेसिङ’, लगानी सम्मेलन आयोजना गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
