काठमाडौं– सभामुख अग्नि प्रसाद सापकोटाको निमन्त्रणमा नेपाल भ्रमणमा रहेका चिनियाँ जनकांग्रेसका अध्यक्ष ली चान्सुले मंगलबार दिउँसो नेकपा एमालेका अध्यक्ष केपी शर्मा ओलीलाई भेटेका छन्।
उक्त भेटमा अध्यक्ष लीले राष्ट्रपति सी चिनफिङले ओलीलाई पठाएको व्यक्तिगत सु–स्वास्थको शुभकाना सन्देश सुनाएको भेटमा सहभागी एमाले नेता विष्णु रिजालले नेपाल लाइभलाई बताए।
जवाफमा ओलीले पनि राष्ट्रपति सीको सु–स्वास्थ्य तथा सफलताको शुभकामना व्यक्त गरेको रिजालले बताए। ‘उहाँहरूले अध्यक्ष केपी शर्मा ओलीलाई राष्ट्रपति सीले पठाउनु भएको व्यक्तिगत सु–स्वास्थ्यको शुभकामना सुनाउनु भयो,’ रिजालले भने, ‘त्यसका लागि अध्यक्षज्यूले सीलाई धन्यवाद दिँदै उहँको सु–स्वास्थ्य र सफलताको शुभकामना दिनु भएको छ।’
दुई नेताको भेटमा ओली प्रधानमन्त्री हुँदा चीनसँग भएका सम्झौताको कार्यान्वयनका विषयमा पनि छलफल भएको रिजालले जानकारी दिए।
‘एमालेले चीनसँग नेपाल र चीनबीच भएका बीआरआई लगायतका समझदारीहरू, तत्कालीन प्रधानमन्त्री ओलीको चीन भ्रमण र राष्ट्रपति सीको नेपाल भ्रमणमा भएका सम्झौताको कार्यान्वयनको अपेक्षा गरेको छ,’ रिजालले भने ‘नेपाल–चीन सम्बन्ध रणनीतिक साझेदारमा विकास गर्ने भन्ने जुन सहमति गरेका थियौं, त्यो अनुकूलताका विकास तथा आयोजनाहरु कार्यान्वयन हुने अपेक्षा गरेका छौं। नेपाल त्यो पक्षमा प्रतिबद्ध रहेको जानकारी गराएका छौं।’
छलफल भएको विषयलाई उदृत गर्दै रिजालले भने,‘चिनियाँ पक्षले पनि त्यो कार्यान्वयन गर्नेमा प्रतिबद्धता व्यक्त गर्यो।’ त्यस्तै, अध्यक्ष ओलीले नेपाल एक चीन नीतिमा प्रतिबद्ध रहेको विश्वास दिलाए।
चार दिने भ्रमणका लागि सोमबार काठमाडौं अएका ली मंगलबार राजनीतिक भेटवार्तामा व्यस्त छन्। बुधबार राष्ट्रपति विद्यादेवी भण्डारीलाई भेटेर उनी बिहीबार यतैबाट दक्षिण कोरिया जाने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
