एकीकृत समाजवादी छाडेर नेताहरू फर्किदै ‘पुरानो घर’, देखिएको हो टिकट नपाउने डर?

राजनीति

नेपाल लाइभ मंगलबार, भदौ २८, २०७९ १२:०२

काठमाडौं- नेकपा एमालेबाट फुटेर बनेको एकीकृत समाजवादी पहिलोपटक प्रदेश र प्रतिनिधि सभा निर्वाचनमा भाग लिँदैछ। सत्ता गठबन्धनका दलहरूसँग मिलेर निर्वाचन लड्ने तयारी गरेको उक्त पार्टीमा सोही कारण अवसर नदेखेर भाग्नेहरू बढिरहेका छन्। पार्टी छाड्नेहरू अधिकांश ‘पुरानो घर’ अर्थात् नेकपा एमालेमै फर्किएका छन्।

पछिल्लो दुई हप्तामा दर्जनभन्दा बढी प्रभावशाली नेताहरूले पार्टी छाडेका छन्। पार्टी छाड्नेहरू भाग नपाउने डर भएका मात्रै नभएर प्रदेश सांसदमा सिफारिस भइसकेकाहरू समेत रहेका छन्।

सोमबार मात्रै एकीकृत समाजवादीका तर्फबाट प्रदेश सभा निर्वाचनमा मकवानपुर–१ बाट प्रत्यक्ष उम्मेदवारा सिफारिस भएका विशभ अधिकारीले पार्टी परित्याग गरेका छन्। उनले प्रेस विज्ञप्ति जारी गर्दै नागरिकता विधेयकको पक्षमा लागेको र देशमा वैदेशिक हस्तक्षेप बढेको तर, पार्टीले कुनै प्रयत्न नगरेको विज्ञप्तिमा उल्लेख गरेका छन्।

आइतबार एकीकृत समाजवादीका केन्द्रीय सदस्य बालकृष्ण चापागाईं एमालेमा फर्केका थिए। उनी पनि लुम्बिनी प्रदेश सभा सदस्यका लागि एकीकृत समाजवादीबाट सिफारिस भएका थिए। चापागाईं उक्त पार्टीको अर्थ तथा योजना विभागको उपप्रमुख र रुपन्देही जिल्लाको निवर्तमान सहइन्चार्ज थिए।

केही दिनअघि एकीकृत समाजवादीका कर्णाली प्रदेश कमिटीका सदस्य गणेशबहादुर शाही एमालेमा प्रवेश गरे। डोल्पाका शाहीलाई ओलीले निजी निवास बालकोटमा स्वागत गरे।

सुदूरपश्चिममा फिर्ताको लहर
एकीकृत समाजवादी सवैभन्दा बलियो रहेको सुदूरपश्चिम प्रदेशमा हो। एमालेबाट प्रदेश सभाका बहुसंख्यक सांसद लिएर सबैभन्दा ठूलो दल बनेको थियो। तर, निर्वाचनको संघारमा भने पार्टी छाड्नेको लहर चलेको छ।

सुदूरपश्चिम प्रदेश अध्यक्ष विक्रम शाहीले भदौ ९ गते फेसबुकमा स्टेटस लेख्दै पार्टी छाडेका थिए। भदौ १५ गते एमालेमा फर्किए। पार्टी छाड्दै गर्दा उनले लेखे, ‘२०५४ सालमा वामदेवले फुटबाट पनि शक्ति प्राप्त हुन्छ भन्दै पार्टी विभाजन गराए र थुप्रै मान्छेहरू हौसिदै उनका पछि लागे,’ शाहीले लेखेका छन्, ‘गत वर्ष पनि पुनर्गठनका नाममा माधव नेपालको नेतृत्वमा पार्टी विभाजन भयो। त्यसको पछि लाग्नेमा म पनि थिएँ। पार्टी विभाजनले कांग्रेसलगायत पश्चिमा पुँजीवादीहरूलाई नै फाइदा पुर्‍यायो। त्यसवापत पछुतो र आत्मग्लानी भएको छ।’

भदौ १५ गते दुईजना सांसद नेकपा एमालेमा फिर्ता भएका छन्। फिर्ता हुनेमा कुलवीर चौधरी र तारा लामा तामाङ रहेका छन्। कञ्चनपुर पुगेर एमाले अध्यक्ष केपी शर्मा ओलीले उनीहरूलाई पार्टीमा स्वागत गरेका थिए।

तामाङ समाजवादीको प्रदेश कमिटीका उपसचिव तथा मन्त्री र चौधरी सुदूरपश्चिम सरकारमा राज्यमन्त्री भइसकेका नेता हुन्। बहालवाला राज्यमन्त्री एमालेमा जान लागेको सुइँको पाएपछि राज्यमन्त्री पदबाट उनलाई बर्खास्त गरिएको थियो।

यसैगरी, कञ्चनपुरकै वेदकोटगढी नगरपालिकाका पूर्वनगरप्रमुख अशोक चन्द पनि सोही दिन एकीकृत समाजवादी छाडेर एमालेमा फर्किए।

गुल्मीमा पनि पहिरो
गुल्मी–२ बाट एकीकृत समाजवादीकी प्रभावशाली नेता तथा पूर्वसहरी विकास मन्त्री रामकुमारी झाँक्री चुनाव लड्ने तयारी गरिरहेकी छिन्। हाल जिल्ला केन्द्रित उनी त्यहीँ रहेका बेला जिल्ला अध्यक्षसहित जिल्लाका अन्य नेता कार्यकर्ताहरू एमालेमा फर्किए।

एक हप्ताअघि एमाले गुल्मीले आयोजना गरेको कार्यक्रमा जिल्ला अध्यक्ष तथा केन्द्रीय सदस्य नरेश भण्डारी, जिल्ला ईन्चार्ज तथा केन्द्रीय सदस्य गणेश खनालसहित अधिकांश जिल्लास्तरका नेता कार्यकर्ताहरू एमालेमा फर्किएका हुन्।

एकीकृत समाजवादी प्रदेश कमिटी सदस्य हिमाल थापा, युवा संघ केन्द्रीय सदस्य तथा पार्टी जिल्ला सचिवालय सदस्य मदन विष्ट, जिल्ला सदस्य तथा मुसिकोट अध्यक्ष मदनदीउ घिमिरे, जिल्ला सदस्य हरि कुँवर, विष्णुप्रसाद भण्डारी, विद्यार्थीका जिल्ला अध्यक्ष निलकण्ठ पाण्डे, पार्टीका छत्रकोट अध्यक्ष यमबहादुर खत्रीसहितको टोली एमालेमै फर्किएका छन्।

एमाले प्रवेश गर्दै जिल्ला अध्यक्ष भण्डारीले कम्युनिस्ट आन्दोलनको नेतृत्व एमालेबाहेक अरुबाट सम्भव नभएकाले पुनः एमालेमै फर्किएको बताए। नेपाली कांग्रेसलाई शक्तिमा लैजाने एकीकृत समाजवादीको नेतृत्वले गरेको गम्भीर गल्तीलाई बोक्न नसकेका कारण पुनः एमालेमा आएको भण्डारीको भनाइ थियो।

फर्किदै पुरानो घर, कारण टिकट नपाउने डर
एकीकृत समाजवादी सत्ता गठबन्धनसँग मिलेर चुनावा लड्दैछ। गठबन्धनसँग मिलेर चुनाव लड्दा धेरै ठाउँमा उक्त पार्टीका उम्मेदवार हुने छैनन्। त्यस्तो अवस्थामा नेताहरूमा टिकट नपाउने डर बढेको छ। अहिले सिफारिस भएपनि उक्त ठाउँ अर्कैलाई छाड्नुपर्ने ‘हिसाब किताब’ देखिएपछि उनीहरूले पार्टी छाडेको देखिन्छ।

सुदूरपश्चिमका बहालवाला दुई सांसद लामा र चौधरीको कुरा गर्दा उनीहरू ककञ्चनपुर १ ‘क’ र ‘ख’ बाट प्रदेश सभा सांसद छन्। आगामी निर्वाचनमा उनीहरु त्यहीँ दोहोरिने सम्भावना गठबन्धनमा बस्दा कमजोर थियो र प्रतिनिधि सभामा माओवादी केन्द्रकी नेता तथा अध्यक्ष पुष्पकमल दाहाल ‘प्रचण्ड’की बुहारी बीना मगर छिन्।

गठबन्धनबाट उनी नै दोहोरिने सम्भावना बलियो छ। तर, कांग्रेसको बलियो क्षेत्र रहेकाले छाड्ने मनस्थितिमा स्थानीय नेता छैनन्। केन्द्रमा माओवादी केन्द्र जाँदा प्रदेश सभाका दुवै क्षेत्र कांग्रेसलाई छाड्नुपर्ने हुन्छ।

गुल्मी–१ मा कांग्रेसका प्रभावशाली नेता चन्द्र भण्डारी चुनाव लड्दै आएका छन्। एमालेका प्रदीप ज्ञवालीसँग उनी नै प्रतिस्पर्धा गर्नेछन्। गुल्मी- २ मा एकीकृत समाजवादीले पाउँदा पूर्वमन्त्री झाँक्री तयार भएकी छिन्। त्यसकारण स्थानीय नेता-कार्यकर्ताले भविष्य देखेनन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सुक्खा हिउँदले आफूहरूलाई मार परेको बिजुली उत्पादकहरूको गुनासो

जनस्वास्थ्य सुरक्षाका लागि कुष्ठरोगी र हात्तीपाइले प्रभावितलाई स्वास्थ्य बीमा

जङ्गली रातो बाँदर 'कृषि हानिकारक वन्यजन्तु' घोषणा, के के छन् सर्तहरु?