काठमाडौं– पूर्व प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले नेपालमा छरिएर रहेका सम्पूर्ण कम्युनिष्ट शक्तिहरुलाई एउटै केन्द्रमा ल्याएर समाजवादी क्रान्ति गर्ने बताएका छन्।
शनिबार काठमाडौंको राष्ट्रिय सभागृहमा आयोजित केन्द्रीय प्रशिक्षण कार्यक्रममा बोल्दै अध्यक्ष प्रचण्डले विश्व कम्युनिष्ट आन्दोलन रक्षात्मक अवस्थामा भए पनि नेपालका कम्युनिष्टहरुलाई जनताको अपार समर्थन र विश्वास रहकाले त्यसलाई मर्न दिनु नहुने बताए।
‘विभिन्न धारामा रहेका कम्युनिष्टहरुलाई एउटै केन्द्रमा ल्याएर मात्र नेपालमा समाजवादी क्रान्ति गर्न सकिन्छ' उनले भने, 'समाजवादी क्रान्तिको तयारीमा लाग्ने वैचारिक प्रतिवद्धतासहित पार्टी एकताको तयारीमा जुटेका छौं।'
'यो हामी सबैका लागि महान् बहस हो, समाजवादी क्रान्तिका लागि महान् बहसमा जुटौं, फराकिलो छाति बनाएर कम्युनिष्टहरुको एउटै केन्द्र निर्माण गरौं ।’, उनले थपे।
‘पार्टी एकता कसैले कसैलाई निल्ने विषय होइन, यो त समान उद्धेश्यका लागि वैचारिक एकतासहित नयाँ उचाईमा पुग्ने प्रक्रिया हो’, प्रशिक्षणमा अध्यक्ष प्रचण्डले भने। ‘हाम्रा आ–आफ्नै मान्यता र दृष्टिकोण छन्, त्यसमा अडिएर एकता हुँदैन, उनले भने, 'एमाले–माओवादी दुवैले महान् बहसको प्रक्रियाद्वारा नेपाली क्रान्तिको सिद्धान्तलाई विकसित गर्ने प्रतिवद्धता व्यक्त गरेका छौं।'
प्रचण्डले आफूले नै एकताको प्रस्ताव गरेको पनि बताए। भने, ‘हाम्रै प्रस्तावमा एकता प्रक्रिया आरम्भ भएको हो।'
'यो फस्ने, फसाउने विषय होइन, हामी इमान्दार भएर अन्तिमसम्म एकताकै प्रक्रियामा जान्छौं, उनले थपे, 'कसैलाई फसाउने हाम्रो सोच छैन र फसिने सवाल पनि होइन।'
उनले चुनावी समीकरण र पार्टी एकता प्रयास कसैका विरुद्ध नभएको बताए। ‘एमाले–माओवादी एकताले देशमा तत्कालै साम्यवादी शासन आउने होइन, अधिनायकवाद जन्मने पनि होइन, उनले भने, 'संविधानले समाजवादउन्मूख राज्यको दिशानिर्देश गरेको छ, हामी शान्तिपूर्ण र राजनीतिक प्रतिस्पर्धाकै माध्यमबाट समाजवादमा जान्छौं, यसबारे कसैले भ्रम पाल्न जरुरी छैन ।’
प्रशिक्षणमा माओवादी केन्द्रका नेता नारायणकाजी श्रेष्ठ ‘प्रकाश’ले कम्युनिष्ट क्रान्तिकारी र वामपन्थीहरुको एकता राष्ट्रको हितमा भएको बताए। ‘स–साना समूहमा रहेर समाजवादको कार्यभार पुरा गर्न सकिँदैन' श्रेष्ठले भने, 'समाजवादका पक्षधर सम्पूर्ण शक्तिहरु एकतावद्ध भएर अघि बढ्नुको बिकल्प छैन।'
'हाम्रो एकता र सहकार्यको प्रयास राष्ट्रको हितमा छ,' उनले थपे, 'यो प्रयासलाई खुट्टा नकमाइकन एकतामै लागे संकल्प गर्नुपर्छ।’
नेता रामबहादुर थापा ‘बादल’ले पार्टी एकता एमालेको माओवादीकरण र माओवादीको एमालेकरण नभएको बताए। भने, ‘बजारमा माओवादीको एमालेकरण वा एमालेको माओवादीकरण जस्ता प्रायोजित विषय उठाइएको छ। माओवादी एमालेमा विलय हुने होइन, एमाले माओवादीमा बिलय हुने कुरा पनि होइन।'
आजै बिहान माओवादी केन्द्रको संसदीय दलको बैठकमा बोल्दै प्रचण्डले आफ्नो पार्टी सरकार सरकार ढाल्ने पक्षमा नभएको बताए।
'हामीले एमालेसँग पार्टी एकता र चुनावी तालमेलको निर्णय गरेका छौं, यो हाम्रो नेपालमा एउटै कम्युनिष्ट केन्द्र बनाउने अभियान हो, उनले भने, 'यसले सरकारलाई कुनै असर गर्दैन, हामी सरकार ढालेर निर्वाचन प्रभावित गर्न चाहँदैनौं।'
तर, प्रधानमन्त्री र नेपाली कांग्रेसले सरकार छोड्नुपर्छ भन्छन् भने छोड्न तयार रहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
