निर्वाचन विशेष

सप्तरी- २ : उपेन्द्र, महन्थ र सीके राउतको दाबी, मतमा को छ हाबी?

राजनीतिक ब्यूरो बिहीबार, भदौ २३, २०७९ १३:२९

काठमाडौं- सप्तरी- २ बाट मधेस केन्द्रित तीनवटै दलका शीर्ष नेताहरु सिफारिस भएका छन्। २०७४ सालमा जनता समाजवादी पार्टीका अध्यक्ष उपेन्द्र यादवले जितेको उक्त क्षेत्रमा उनीसहित लोकतान्त्रिक समाजवादी पार्टीका अध्यक्ष महन्थ ठाकुर र जनमत पार्टीका अध्यक्ष डा सीके राउत समेत प्रतिनिधि सभा उम्मेदवारमा सिफारिस भएका छन्।

गत साउन २० गते नै डा राउतले उक्त क्षेत्रबाट चुनाव लड्ने घोषणा गर्दै निर्वाचन अभियान थालेका थिए। मंगलबार मात्रै लोसपाका अध्यक्ष महन्थ ठाकुर सिफारिस भएका छन्। जिल्ला समन्वय समिति सप्तरीको सभाहलमा सम्पन्न क्षेत्रीय भेलाले उनीसँगै जयप्रकाश ठाकुरको नाम पनि सिफारिस गरिएको छ।

उक्त क्षेत्रबाट निर्वाचित जसपा अध्यक्ष उपेन्द्र पनि केही दिनअघि नै सर्वसम्मत सिफारिस भएका छन्। तीनै जना पार्टी अध्यक्ष भएको हुनाले उनीहरुले चाहेमा त्यहीँबाट प्रतिस्पर्धामा उत्रिन पार्टीभित्र समस्या पर्नेछैन।

सप्तरी- २ अन्तर्गत महादेवा गाउँपालिका, तिलाठी कोइलाडी गाउँपालिका, राजविराज नगरपालिका र छिन्नमस्ता गाउँपालिका पर्छन्।

स्थानीय तह निर्वाचनमा यी ४ पालिकामध्ये २ वटामा लोसपाले प्रमुख जितेको छ। त्यस्तै, नेपाली कांग्रेस र जसपाले एउटा/एउटा पालिका जितेका छन्। पालिकाको नतिजाकै कारण लोसपाले गठबन्धन हुँदा पनि दाबी गर्न अध्यक्ष महन्थलाई नै अघि सारेको हो। तर, २०७४ मा उपेन्द्रसँग स्वतन्त्र उम्मेदवारका रुपमा प्रतिस्पर्धा गरेका जयप्रकाश लोसपाबाट टिकट लिने दाउमा छन्।

गत स्थानीय तहको निर्वाचनमा सप्तरी-२ अन्तर्गत पर्ने वडाहरुमा वडाध्यक्षका उम्मेदवारहरुले पाएको मतमा जसपा अगाडि छ। जसपाको १३ हजार १९७, कांग्रेसले ९ हजार ६६४, माओवादीले ८ हजार ९९० मत पाएका थिए। त्यसैले हालको सत्ता गठबन्धनको मत मात्रै ३१ हजार ८५१ मत पुग्छ। त्यस्तै, लोसपाले १० हजार १३२, एमालेले ४ हजार ८३७ र डा राउत नेतृत्वको जनमत पार्टीले ३ हजार ८७७ मत पाएको थियो।

डा राउतको पार्टीले सप्तरी जिल्लाकै दुई पालिका जितेको छ तर सप्तरी- २ अन्तर्गत पर्दैनन्। गृह पालिकामा एउटा वडाध्यक्ष जितेका डा राउत आफैं मैदानमा आउँदा फरक माहोल बन्ने अपेक्षा सो पार्टीको छ। राउत उपेन्द्र तथा उनी नेतृत्वको जसपाले हाँकिरहेको मधेस सरकारको तीव्र आलोचक पनि हुन्। त्यसैले उनले रणनीतिक रुपमै आफ्नो प्रतिस्पर्धी छनोट गर्न खोजे जस्तो देखिन्छ। त्यस्तै, डा राउतको छवि अध्ययनशील छ। उनले एउटा समूहमा आफूलाई लोकप्रिय पनि बनाएका छन्। सप्तरीको सदरमुकाम राजविराज पनि सप्तरी-२ अन्तर्गत नै पर्ने भएकाले सहरी क्षेत्रको मत तान्न सहज हुने आकलन उनको हुनसक्छ।

राउत नयाँ उम्मेदवार भएकाले पुराना उम्मेदवारलाई उनको लोकप्रियता आकलन गर्न कठिन हुन्छ। सम्भवतः यादवलाई पनि त्यही भइरहेको छ। स्थानीय तहको निर्वाचनमा सप्तरी-२ मा जसपा बलियो देखिएता पनि राउतको लोकप्रियताको आकलन गर्न कठिन भएकै कारण उपेन्द्र यसपटक सो क्षेत्रबाट उम्मेदवार बन्नेमा शंका छ।

अन्य कैयौँ ठाउँबाट पनि उम्मेदवार सिफारिस गरिएका कारण उनलाई अन्यत्रबाट प्रतिस्पर्धामा उत्रिने बहाना बन्न सक्छ। त्यसो त, निर्वाचन क्षेत्र फेरिरहने यादवको विशेषता जस्तै बन्न थालेको छ। त्यसैले यसपटक पनि क्षेत्र फेरिएमा अनौठो हुनेछैन।

२०७४ को निर्वाचनमा महन्थ महोत्तरी-३ बाट निर्वाचित भएका थिए। उनलाई समर्थन गर्दै कांग्रेसले आफ्नो उम्मेदवार बजरंग नेपालीको उम्मेदवारी फिर्ता गराएका थियो। त्यसैले उनले वाम गठबन्धनका उम्मेदवार विजयकुमार चौधरीलाई सहजै पराजित गरेका थिए। महन्थले २६ हजार ८४५ मत पाउँदा चौधरीले ८ हजार ६७६ मत मात्रै पाएका थिए।

उपेन्द्रले सप्तरी-२ छाड्ने र सत्ता गठबन्धनले पनि सघाउने अवस्थामा महन्थ यही क्षेत्रबाट प्रतिस्पर्धी बन्न सक्छन्। तर, स्वयं यसअघि निर्वाचित भएको र स्थानीय तहको निर्वाचनमा पनि राम्रो मत पाएकाले उपेन्द्रले नछाडेको अवस्थामा महन्थलाई प्रतिस्पर्धामा उत्रिनु चुनौतीपूर्ण हुने निश्चित छ।

यस क्षेत्रमा माओवादी केन्द्र र कांग्रेसको मत समेत कमजोर नभएका कारण उनीहरुको पनि स्वाभाविक दाबी रहने देखिन्छ। २०७४ को निर्वाचनमा सप्तरी-२ मा यादवका निकटतम प्रतिस्पर्धी माओवादी केन्द्रका उमेशकुमार यादव थिए। तर, यसपटक उनको खासै चर्चा छैन। सत्ता गठबन्धन उम्मेदवारबीच तालमेल हुँदा उनले टिकट पाउने सम्भावना झनै कमजोर छ।

वडाध्यक्षको मत परिणामअनुसार एमाले कमजोर देखिन्छ। त्यसकारण कुनै दलसँग तालमेल हुँदा यो क्षेत्र छाड्ने सम्भावना देखिन्छ। स्थानीय नेताहरुका अनुसार डा राउतलाई एमालेले सघाउने सक्ने सम्भावना रहन्छ। तर, राउतका लागि दलीय सहयोगभन्दा पनि आफ्नो लोकप्रियताको अनुमोदनको बढी अपेक्षित छ।