पोखरा– आसन्न नवौं राष्ट्रिय खेलकुद प्रतियोगिताका लागि गण्डकी प्रदेशबाट ‘फुल कन्ट्र्याक्ट’ कराँतेतर्फ पुरुषतर्फ सात र महिलातर्फ पाँच खेलाडी छनोट भएका छन्।
प्रदेश खेलकुद परिषद् गण्डकीको आयोजनामा पोखराको नयाँबजारस्थित प्रदर्शनी केन्द्रमा यही भदौ १५ देखि सञ्चालन भएर आज सम्पन्न भएको प्रदेशस्तरीय कराँते छनोट प्रतियोगिताबाट राष्ट्रिय खेलकुदका खेलाडी छनोट गरिएको हो।
कराँतेमा छनोट हुन सफल खेलाडीमा पुरूषतर्फ ४० केजी तौल समूहमा कास्कीका अभिषेक तामाङ, ४५ केजीमा बागलुङका नारायण विक र ५० केजीमा कास्कीका अनिष बुढा मगर छन्।
यसैगरी ५५ केजीमा पर्वतका पासाङ तामाङ, ६० केजीमा कास्कीका मोशेस कुमाल र ६५ केजीमा कास्कीका शिव भुजेल र खुला तौल समूहमा कास्कीका रूपक नेपाली छनोटमा पर्न सफल भएका छन्।
महिलातर्फ ४० केजी तौल समूहमा स्याङ्जाका पुष्प कुँवर, ४५ केजीमा कास्कीका मेनुका अधिकारी, ५० केजीमा कास्कीका सरगम कुमाल, ५५ केजीमा तनहुँकी धनी रानामगर र खुला तौल समूहमा कास्कीका मेरिना गुरूङ छनोटमा पर्न सफल भएका छन्।
‘फुल कन्ट्याक्ट’ कराँतेका लागि संयोजकको जिम्मेवारी शिव गुरुङ र प्रशिक्षकको जिम्मेवारी सुवास खड्कालाई दिइएको थियो। छनोट भएका खेलाडी असोज २८ गतेदेखि कात्तिक ३ गतेसम्म पोखरामा आयोजना हुने नवौँ राष्ट्रिय खेलकुद प्रतियोगितामा सहभागी बन्नेछन्। छनोट भएका खेलाडीका लागि केही दिनपछि बन्द प्रशिक्षण सञ्चालन गरिनेछ।
बुद्धिचाल प्रतियोगितामा पूजा र सविन प्रथम
यसैगरी गण्डकी प्रदेशस्तरीय बुद्धिचाल प्रतियोगितामा पुरुषतर्फ लमजुङका सविनचन्द्र घिमिरे र महिलातर्फ कास्कीका पूजा भण्डारी प्रथम हुन सफल भएका छन्।
पुरुषतर्फ कूल पाँच राउण्डमध्ये चार राउण्डमा जीत र एक राउण्डमा बराबरी गर्दै साढे चार अंक साथ घिमिरे पहिलो बन्न सफल भए। मुस्ताङका राजन पहाडी द्वितीय र बागलुङका लेखबहादुर थापाले तृतीय स्थान हासिल गर्न सफल भए। पुरुषतर्फ २३ जना प्रतियोगीले भाग लिएका थिए।
महिलातर्फ कास्कीका भण्डारीले पाँच राउण्ड खेलमा पाँचवटै खेल जित्दै प्रथम हुन सफल हुनुभयो। लमजुङका स्तुति खवास द्वितीय र बागलुङका झरना थापा तृतीय भइन्।
छनोट हुन सफल खेलाडीका लागि बन्द प्रशिक्षण सञ्चालन गरिने प्रदेश खेलकुद परिषद्ले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
