विचार

प्रकाशकीय : नेपाल लाइभ छैटौँ वर्षमा

अनिल न्यौपाने बिहीबार, भदौ १६, २०७९ १३:२८

नेपाल लाइभ डटकमले बिहीबारदेखि आफ्नो यात्राको पाँचौँ वर्ष पूरा गरेर छैटौँ वर्षमा प्रवेश गरेको छ। हाम्रा प्रिय पाठक, दर्शक र स्रोतासँग यो उत्साह साट्न चाहन्छौँ। बितेका पाँच वर्षमा तपाईंहरूबाट प्राप्त माया, हौसला, विश्वास र खबरदारी हाम्रा लागि अत्यन्तै प्रिय र अनुकरणीय थिए। आगामी दिनमा पनि निरन्तरताको अपेक्षा गर्दछौँ।

नेपाल लाइभको प्रकाशन सुरु गर्दा हामीले निरपेक्ष निष्पक्षताको परम्परागत मान्यता नपछ्याउने प्रतिबद्धता व्यक्त गरेका थियौँ। खासगरी लोकतन्त्र, मानव अधिकार, विधिको शासन, मौलिक हक, अभिव्यक्ति स्वतन्त्रता, सुशासन, सीमान्तकृतहरूका सरोकार, समावेशी शासन र न्यायपूर्ण समाजको पक्षधरको रुपमा उभिने र चिनाउने हाम्रो प्रतिबद्धता थियो। आज पनि हाम्रो पक्षधरतामा हामी स्पष्ट छौँ। यसका लागि प्रयत्नशील पनि छौँ।

पत्रकारिताले सधैंभर जिम्मेवारीबोध र परिपक्वताको सवालमा खरो उत्रिनुपर्छ नै। डिजिटल पत्रकारितामा यो सवाल अझ चर्को छ। हुन त यो निरन्तरको प्रयत्न र अभ्यासको उपज पनि हो। तर, हामी सुरुवातदेखि नै यसप्रति सचेत छौँ। हाम्रो ग्राफ कति सकारात्मक दिशातिर छन्, पाठकहरूबाट गरिने मूल्यांकन अपेक्षित छन्। हामीबाट कुनै मानवीय कमजोरी भएकै छैनन् भन्न त सक्दैनौँ तर, नियतवश बाटो बिराएका छैनौँ भनेर दाबी गर्न चाहिँ सक्छौँ। यो दाबीको एउटै आधार हामीप्रति शुभेच्छा राख्ने र कमजोरी औंल्याइदिने पाठकहरूको प्रतिक्रिया नै हो।

हामीले हाम्रो सामग्री प्रकाशन/प्रशारणको दायरा अझै फराकिलो बनाउने प्रयत्न गरेको पाठक र दर्शकहरूलाई अवगत भएकै विषय हुन्। हाम्रा कैयौँ सामग्रीहरू मल्टिमिडियाका विभिन्न माध्यमबाट पाठकसमक्ष पुर्‍याइरहेका छौँ। जसमा हामीले नियमित समाचार, अन्तर्वार्ता, समाचार विश्लेषण, ब्रिफिङ तथा विभिन्न अवसरमा शृंखलाकै रुपमा मौलिक सामग्री उत्पादन गरिरहेका छौँ। जसले पाठक तथा दर्शकबाट पनि यथेष्ट माया पाएका छन्। त्यसप्रति हामी आभारी छौँ। उत्साहित छौँ।

एकातिर नेपालको अत्यन्त प्रतिस्पर्धात्मक मिडिया बजारमा आर्थिक रुपले बाँच्नु मात्रै पनि निकै चुनौतीपूर्ण छ भने अर्कोतिर वातावरणीय समस्या, जलवायु परिवर्तनका असर जस्ता विषयहरूलाई उठाउन दक्ष जनशक्तिको खाँचो छ। त्यसैगरी, संसारभरि फैलिएका प्रवासी नेपालीहरूका उपलब्धि र संघर्षहरूको कथा भन्न पनि बाँकी नै छ। सुशासनयुक्त, भ्रष्टाचारमुक्त, सभ्य, समुन्नत र उदार समाजको निर्माण होस् भन्ने हाम्रा पाठकहरूको चाहना हाम्रा समाचार, विचार र अन्तर्क्रियामार्फत् प्रस्फुटित होऊन् भन्नेतर्फ हामी सचेत रहने छौं।

जुनसुकै माध्यमबाट गरिने पत्रकारिता होस्; त्यो मूलतः भूइँमान्छे र राज्यबीचको सेतु हो। राज्यमाथिको प्रश्नकर्ता हो। प्रतिपक्ष हो। सूचनाको हुलाकी हो। राज्य संरचनाका नेतृत्वकर्ताहरू फेरिए पनि नेपाल लाइभले आफ्नो दायित्व भुलेको छैन। विगतमा प्रकाशित हाम्रा सामग्रीहरू प्रमाण र सन्दर्भका रुपमा सधैं रहनेछन्।

छैटौँ वर्ष प्रवेश गरेको यो सुखद् समयमा नेपाल लाइभलाई अझै विविधतापूर्ण बनाउने वाचा गर्छौं। यसलाई अझै पूर्ण र सम्पूर्ण पत्रकारिताको केन्द्र बनाउने प्रयत्न गर्छौं। आफूले आफैंलाई कहाँ सुधार गर्नुपर्छ र अरुलाई कहाँ प्रश्न उठाउनुपर्छ भनेर सधैं आत्ममूल्यांकन पनि गर्छौं। हाम्रा सबै प्रयत्नको मुख्य ध्येय जिम्मेवार र जवाफदेही पत्रकारिताको अठोट नै हुनेछ।

ताजा, सत्यतथ्य, खोजमूलक र विश्लेषणात्मक समाचार पस्कने उद्देश्य हामीले राखेका छौँ। पाठक र दर्शकसँगको अन्तर्क्रियाले नै त्यो उद्देश्य थप ठोस बन्दै जानेछ। यसक्रममा हाम्रा सम्पूर्ण पाठक, दर्शक, लेखक, विज्ञापनदाता लगायतसँग आगामी दिनमा पनि अन्तर्क्रिया र सहयोगको अपेक्षा राख्दछौँ।