पाँचौं वर्ष प्रवेश र थपिएको जिम्मेवारी

विचार

प्रकाशकीयपाँचौं वर्ष प्रवेश र थपिएको जिम्मेवारी

अनिल न्यौपाने बुधबार, भदौ १६, २०७८ ०८:३७

डिजिटल माध्यममा विश्वसनीय पत्रकारिता गर्ने लक्ष्यसहित सुरु भएको नेपाल लाइभ आजदेखि पाँचौं वर्षमा प्रवेश गरेको छ। यस अवसरमा हामी हाम्रा प्रिय पाठक, दर्शक र स्रोतासँग खुसी साट्न चाहन्छौं। विश्वसनीय डिजिटल पत्रिका बन्ने उद्देश्यमा हामी निरन्तर अघि बढिरहेका छौं र धेरै हदसम्म त्यसलाई हासिल गर्न सफल पनि भएका छौं।

अत्यन्त प्रतिस्पर्धात्मक बन्न पुगेको आजको डिजिटल पत्रकारिताको दुनियाँमा विश्वसनीयता आर्जन गर्नु स्वयंमा चुनौतीपूर्ण कार्य थियो, र छ। तपाईंहरुको माया, विश्वास र निरन्तरको खबरदारीले हामीलाई त्यसतर्फ डोर्‍याउन मद्दत पुर्‍याएको छ।

यसबीचमा हामीले आर्जन गरेको सबैभन्दा ठूलो सम्पत्ति नै तपाईंहरुको यही माया, विश्वास र निरन्तर खबरदारी हो। यसले नै हामीलाई थप जिम्मेवारीबोध गर्न र लक्ष्यमा अघि बढ्न अहं भूमिका खेलेको छ। हामी तपाईंहरुबाट सधैँ यस्तै सद्‍भाव र खबरदारीको अपेक्षा गर्दछौं।

समय सहज छैन। एकातिर दुनियाँभर जनस्वास्थ्यदेखि अर्थतन्त्रसम्मको मुख्य संकट बनेको कोरोना महामारीको कहर छ। अर्कोतर्फ हामीले चाहेको राजनीतिक स्थिरता र त्यसमार्फत् सुनिश्चित हुने आर्थिक विकासको सपना अलमलिएको छ। प्रत्येक नेपालीले देख्न खोजेको परिवार, समाज र देशको समृद्धिको सपनामाथि प्रहार बढ्दो छ।

हामीले यात्रा सुरु गर्दा संविधानसभाबाट भर्खरै संविधान जारी भएको थियो। त्यो संविधानलाई फक्रिने वातावरण चाहिएको थियो। संविधानको पूर्ण कार्यान्वयनका लागि आवश्यक कैयौं पूर्वाधार तयार पार्नु थियो। चार वर्षपछि आइपुग्दा देश संविधान कार्यान्वयनको बाटोमा त अघि बढ्यो, तर राजनीतिक नेतृत्वको सनक, अकर्मण्यता र निहित स्वार्थले संविधान नै आक्रमणको तारो बन्यो। अब संविधानको रक्षा र यसमार्फत् लोकतान्त्रिक ‘स्पेस’को जगेर्ना गर्नु हामी सबैको जिम्मेवारी बन्न पुगेको छ।

हामी आफ्ना प्रतिबद्धतामा प्रस्ट छौं। हामीले सुरुआतमै भनेका थियौं- लोकतन्त्र, मानव अधिकार, विधिको शासन, मौलिक हक, अभिव्यक्ति स्वतन्त्रता, सुशासन, सीमान्तकृतहरुका सरोकार, समावेशी शासन, खुला बजार अर्थनीति र न्यायपूर्ण समाजको पक्षधरका रुपमा आफूलाई उभ्याउनेछौं। त्यसका निम्ति हामी स्पष्ट पक्षधरता लिनेछौं। त्यो प्रतिबद्धता पुनः दोहोर्‍याउन चाहन्छौं।

हामीले सुरुआतमै भनेका थियौं- लोकतन्त्र, मानव अधिकार, विधिको शासन, मौलिक हक, अभिव्यक्ति स्वतन्त्रता, सुशासन, सीमान्तकृतहरुका सरोकार, समावेशी शासन, खुला बजार अर्थनीति र न्यायपूर्ण समाजको पक्षधरका रुपमा आफूलाई उभ्याउनेछौं। त्यसका निम्ति हामी स्पष्ट पक्षधरता लिनेछौं। त्यो प्रतिबद्धता पुनः दोहोर्‍याउन चाहन्छौं।

यसबीचमा हामीले शासकीय महत्त्वाकांक्षाको चरम रुप देख्यौं। नागरिकको सबैभन्दा उच्च प्रतिनिधिमूलक संस्थाको दुई-दुई पटक अवसान गराउने प्रयत्न देख्यौं। जनअपेक्षाविपरीत शासन सञ्चालनको अभ्यास देख्यौं। अध्यादेश-राजका आडमा शासन चलाउने अराजकता देख्यौं, देखिरहेछौं। नागरिकले निकै लामो संघर्षपछि संविधानमा लिपिबद्ध गरेका अधिकार र मौलिक हकलाई खोस्ने अभीष्ट राखिएका कैयौं कानुन ल्याउने जिरह देख्यौं। यी र यस्ता प्रयत्नहरुमाथि हामीले प्रश्न गरिरह्यौं। सबल न्यायपालिका, सचेत जनमत र प्रश्न गर्ने नागरिकदेखि सञ्चार जगतसम्मको प्रयत्नबाट ती अभीष्ट पराजित भएको पनि हेर्‍यौं।

हामीलाई थाहा छ, यस्ता प्रयत्न फेरि पनि हुनसक्छन्। संविधान, लोकतन्त्र र जनमतमाथि हुने यस्ता प्रहारविरुद्ध हामी निरन्तर खबरदारी गरिरहनेछौं।

सारा दुनियासँगै हामी पनि कोरोना महामारीसँग जुध्न थालेको डेढ वर्ष नाघिसक्यो। यसबीचमा खोपको उपलब्धता र आपूर्ति बढिरहेको छ। तर, यो कहर हाम्रो जनस्वास्थ्य र अर्थतन्त्रले कहिलेसम्म ब्यहोर्नुपर्छ भन्ने टुंगो छैन। यसको मारमा अर्थतन्त्रका सबै अवयव परेका छन्, सञ्चार जगत परेको छ र हामी पनि परेका छौं।

एक दिन यो संकटको अन्त्य अवश्यंभावी छ, अनि राम्रा दिनको सुरुआत पनि अवश्यंभावी छ। यही आशाले हामीलाई जस्तोसुकै कठिन परिस्थितिसँग जुध्ने साहस दिएको छ। त्यसैले हामी यो विघ्न प्रतिकूलतासँग जुध्दै आफ्नो लक्ष्यमा अघि बढिरहेका छौं। र, अनेक प्रतिकूलताकै बीच सम्भावनाहरुको खोजी गरिरहेका छौं। नेपाल लाइभका पाठक, दर्शक र स्रोतासँगै हाम्रा विज्ञापनदाताहरुप्रति पनि हामी उत्तिकै आभारी छौं, जसले हामीलाई जस्तोसुकै प्रतिकूल समयमा पनि अगाडि बढ्ने आँट दिनुभएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।