निर्वाचन विशेष

मोरङ ४ : माओवादीले जितेको क्षेत्रमा कांग्रेसका ‘हेभिवेट’हरूको दाबी

राजनीतिक ब्यूरो शनिबार, भदौ १८, २०७९ २१:३६

विराटनगर– आउँदो मंसिर ४ गते हुने प्रतिनिधि सभा र प्रदेश सभाको चुनावका लागि सत्तारुढ दलहरुले क्षेत्रगत रुपमा सिट बाँडफाँटको विवाद टुंगो लगाएका छैनन्। तर, नेताहरूले आ-आफ्नो हिसाबले टिकटका लागि दौडधुप चर्को पारेका छन्। कोही टिकटका लागि शीर्ष नेतालाई भेटिरहेका छन् भने कोही आफ्नो निर्वाचन क्षेत्र केन्द्रित गतिविधिमा सक्रिय हुन थालेका छन्।

यसैमध्येको एक क्षेत्र हो मोरङ–४। यहाँ २०७४ को निर्वाचनमा प्रतिनिधि सभामा वाम गठबन्धनका तर्फबाट माओवादीका अमनलाल मोदी निर्वाचित भएका थिए। अघिल्लो चुनावका प्रतिस्पर्धी कांग्रेसका र माओवादी अहिले एकै ठाउँ छन्। उनीहरूले आउँदो निर्वाचनमा गठबन्धन गरेर जाने सहमति गरिसकेका छन्।

यससँगै उक्त क्षेत्रमा कांग्रेस र माओवादीबीच कसले सिट लिने भन्ने विवाद सुरु भएको छ। तत्कालीन निर्वाचनमा मोदीले नेपाली कांग्रेसका उम्मेदवार महेश आचार्यलाई पराजित गरेका थिए। त्यसैका आधारमा माओवादी केन्द्रले यो क्षेत्रमा आफ्नो दाबी गर्दै आएको छ।

यता, कांग्रेसका नेताहरुले भने वाम गठबन्धन टुटेपछि त्यहाँ माओवादी निकै कमजोर भएको दाबी गर्दै सो क्षेत्र कांग्रेसको भागमा पार्न केन्द्रीय नेतृत्वलाई दबाब दिँदै आएका छन्। यसअघि यो क्षेत्रबाट नेपाली कांग्रेसका आचार्यले लगातार चुनाव जित्दै आएका थिए। २०७४ को निर्वाचनमा मोदीले ३३ हजार ५२९ मत ल्याएर निर्वाचित हुँदा आचार्यले २६ हजार ८०० मत पाएका थिए।

मोरङ क्षेत्र नम्बर ४ मा कटहरी गाउँपालिका, ग्रामथान गाउँपालिका र विराटनगर महानगरपालिकाको १, २, ३, ८ र १० नम्बर वडा पर्दछन्। त्यस्तै, बेलवारी नगरपालिकाका वडा नम्बर ५, ६ र ७ पनि यो क्षेत्रमा पदर्छन्।

गत वैशाखमा सम्पन्न स्थानीय तहको निर्वाचनमा यो क्षेत्रका २२ वटा वडामध्ये १७ वडामा एमालेले जितेको छ। नेपाली कांग्रेसले ३, माओवादी केन्द्र र जसपाले एक/एक वटा वडामा जितेका छन्। यो क्षेत्रमा एमालेका वडाध्यक्ष उम्मेदवारले करिब २५ हजार मत पाएका छन्। त्यस्तै, नेपाली कांग्रेसका वडाध्यक्ष उम्मेद्वारले २२ हजार, माओवादीका उम्मेद्वारले १० हजार र जसपाका उम्मेद्वारले ३ हजार र एकीकृत समाजवादीकाले १ हजारको हाराहारीमा मत पाएका छन्।

एमालेभन्दा गठबन्धन अगाडि
दलहरूले प्राप्त मत विश्लेषण गर्दा स्थानीय चुनावमा गठबन्धनका वडाध्यक्ष उम्मेदवारले पाएको मत एमालेको भन्दा करिब १० हजार बढी देखिन्छ। जसका कारण गठबन्धनका उम्मेदवारलाई जित निकाल्न सजिलो हुने देखिएको छ।

यो क्षेत्रमा मताधारमा गठबन्धन जति बलियो देखिन्छ उम्मेदवारको टुंगो लाग्न भने त्यति नै जटिल देखिन्छ। खासगरी माओवादीले जितेको क्षेत्र भएर उसैलाई छोड्न कांग्रेसलाई दबाब छ भने कांग्रेसले नै पाएपनि पार्टीभित्रै कसलाई अगाडि सार्ने भन्ने विषय पेचिलो छ।

जसकाकारण सिट बाडँफाँटको टुंगो नलागेपनि कांग्रेसका ‘हेभिवेट’ नेताहरूले यो क्षेत्रमा आफू बलियो उम्मेदवार हुने दावी गर्दै चुनाव केन्द्रित गतिविधि गर्न भने थालिसकेका छन्। कांग्रेसका ‘हेभिवेट’मा यही क्षेत्रबाट पटक–पटक चुनाव जितेका नेता महेश आचार्य, नेता गुरुराज घिमिरे, केन्द्रीय सदस्य भीम पराजुली र पूर्वराज्यमन्त्री दिलिप गच्छदार लगायत रहेका छन्।

आचार्य पार्टीको १४औं महाधिवेशनमा उपसभापतिमा पराजित भएका थिए। नेविसघंका केन्द्रीय अध्यक्ष भइसकेका घिमिरे पनि पार्टीको प्रदेश सभापतिमा पराजित भएका थिए। उनी शेखर कोइराला निकट हुन्। पराजुली विराटनगर महानगरपालिकाका पूर्वमेयर हुन्।

विगतमा डा शेखर कोइराला समूहमा रहेका पराजुली पार्टीको १४औं महाधिवेशनमा समूह परिवर्तन गरि शेरबहादुर देउवा समूहमा लागेका थिए। गच्छदार भने कृष्ण प्रसाद सिटौला निकट मानिन्छन्।

गठबन्धनकाे विपक्षमा रहेका नेता शेखर कोइरालाको गृह जिल्ला भएकोले यो क्षेत्रमा कोइराला पक्षका घिमिरेले बाजी मार्न सक्छन्। तर, त्यसअघि माओवादीले उक्त क्षेत्र छोड्न राजी हुनुपर्ने हुन्छ। उता, प्रमुख प्रतिपक्षी नेकपा एमालेले भने पूर्वजिल्ला अध्यक्ष विनोद ढकाललाई अघि सार्ने तयारी गरेको छ।