काठमाडौं– घरेलु मैदानमा आयोजना हुने महिला साफ च्याम्पियनसिप फुटबलका लागि नेपाली राष्ट्रिय फुटबल टोलीको घोषणा गरिएको छ। मुख्य प्रशिक्षक कुमार थापाले च्याम्पियनसिपका लागि २३ सदस्यीय राष्ट्रिय महिला टोलीको घोषणा गरेका हुन्।
नेपालले घोषणा गरेको टोलीमा नियमित कप्तान तथा मिडफिल्डर रेनुका नगरकोटी र डिफेन्डर पूजा राना छैनन्। उनीहरुले प्रशिक्षणको दौरान चोट बोकेका थिए। दुवै खेलाडीले त्रिपुरेश्वरस्थित दशरथ रंगशालामा भदौ २१ देखि असोज ३ गतेसम्म आयोजना हुने च्याम्पियनसिप गुमाउने भएका छन्।
रेनुकाले सातदोबाटोस्थित एन्फा कम्प्लेक्समा असार २० गते प्रशिक्षणको क्रममा चोट बोकेकी थिइन्। त्यसलगत्तै ग्वार्कोस्थित बी एन्ड बी अस्पतालमा पुर्याइएको रेनुकाको शल्यक्रिया गरिएको थियो। उनको घाँटीमुनिको बायाँ हड्डी फ्याक्चर भएको थियो। विभागीय टोली सशस्त्र प्रहरी बलको एपीएफ क्लबकी कप्तान रेनुका सन् २०१० देखि राष्ट्रिय टोलीको नियमित सदस्य थिइन्। उनले १३औं दक्षिण एसियाली खेलकुद (साग), साफ च्याम्पियनसिप र ओलम्पिक छनोट खेलेकी छन्।
यता, पुजाले पनि प्रशिक्षण दौरान खुट्टाको चोट बोकेकी थिइन्। पुजाले बायाँ खुट्टामा गम्भीर चोट बोकेकी हुन्। पुजाले सन् २०१९ मा विराटनगरमा अयोअना भएको साफ च्याम्पियनसिपबाट राष्ट्रिय टोलीमा डेब्यू गरेकी थिइन्। नेपालले उद्घाटन खेलमा भुटानको सामना गर्नेछ। समूह ‘बी’मा रहेको नेपालले भदौ २१ गते भुटानसँग प्रतिस्पर्धा गर्नेछ।
यस्तै, दोस्रो तथा समूह चरणको अन्तिम खेलमा भदौ २८ गते श्रीलंकासँग खेल्नेछ। साफले सहभागी ७ टोलीलाई दुई समूहमा विभाजन गरेको छ। नेपाल सहज मानिएको ‘बी’ रहेको छ। नेपालको समूहमा श्रीलंका र भुटान रहेको छ।
यस्तै, समूह ‘ए’मा साविक विजेता भारत, माल्दिभ्स, बंगलादेश र पाकिस्तान रहेको छ। समूह चरणको खेलपछि समूहको शीर्ष दुई टोलीले सेमिफाइनलमा स्थान बनाउने छन्।
नेपाली टोली -
गोलकिपरः अन्जिला तुम्बापो सुब्बा, अञ्जना राना मगर, उषा नाथ
डिफेन्डरः हिरा कुमारी भुजेल, अमृता जैशी, गीता राना, पुनम जर्घा मगर, निशा थोकर, समीक्षा घिमिरे, विमला विक
मिडफिल्डरः विमला चौधरी, मञ्जली कुमारी योञ्जन, प्रीति राई, सरु लिम्बु, दीपा राई, दीपा शाही, इन्दिरा राई, अनिता बस्नेत, अनिता केसी
फरवार्डः अमिषा कार्की, रेखा पौडेल, सावित्रा भण्डारी, रश्मी कुमारी घिसिङ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
