गुल्मी– गुल्मीको एक क्याम्पसमा आर्थिक संकटकाल घोषणा गरिएको छ। सदरमुकाम तम्घासमा रहेको जिल्लाकै शैक्षिक धरोहर भनिएको रेसुङ्गा बहुमुखी क्याम्पसलाई हरेक वर्ष १ करोड २९ लाख ऋणको भार थपिँदै जान थालेपछि सञ्चालक समितिको निर्णयबाट यस्तो घोषणा गरिएको हो।
सञ्चालक समितिका अध्यक्ष श्रीप्रसाद भलामीले विद्यार्थीको संख्यामा कमी हुँदा आम्दानीको स्रोत बन्द भएपछि हरेक वर्ष झण्डै डेढ करोड बढी ऋणको भार थपिएको बताए। शिक्षा विज्ञान, शिक्षा, मानविकी र व्यवस्थापन संकायमा स्नातक र स्नातकोत्तर अध्ययन अध्यापन हुने रेसुङ्गा बहुमुखी क्याम्पसमा अहिले ७०७ जना विद्यार्थी रहेका छन्।
क्याम्पसमा प्राध्यापक र कर्मचारी गरेर ४० जना रहेका छन्। विद्यार्थीबाट वार्षिक रुपमा हुने आम्दानीभन्दा प्राध्यापक र कर्मचारीको तलबमा मात्र झण्डै दोब्बर खर्च हुने गरेको क्याम्पस सञ्चालक समितिका अध्यक्ष भलामीले जानकारी दिए। प्राध्यापक र कर्मचारी राजनीतिक बाँडफाँटबाट आवश्यकभन्दा बढी नियुक्त हुँदा पनि समस्या भएको छ।
क्याम्पसमा अहिले आम्दानी कोषतर्फ उपचार र उपदान कोषमा जम्मा २३ लाख ५० हजार, लगानीतर्फ १ करोड १० लाख ५० हजार र क्याम्पस सञ्चालन खातामा मात्र ३० लाख रुपैयाँ रहेको छ। क्याम्पसका विभिन्न कोषमा रहेको रकम र वार्षिक रुपमा थपिने ऋण बाहेक क्याम्पसमा अहिले ५ करोड ८३ लाख रुपैयाँ ऋण रहेको छ।
क्याम्पसलाई आर्थिक रुपमा धरासयी हुनबाट बचाउन आर्थिक संकटकाल घोषणा गरिएको सञ्चालक समिति अध्यक्ष भलामीले जानकारी दिए। संकटकालपछि कानुनी अड्चन हट्ने भएकोले समस्या समाधानको विकल्पका रुपमा आर्थिक संकटकाल भनिएको अध्यक्ष भलामीले बताए। यही महिनाको अन्तिमसम्म क्याम्पसमा प्राध्यापक कटौती र आर्थिक स्रोत जुटाएर संकटकाल फुकुवा हुने भलामीले दाबी गरे।
सञ्चालक समितिको निर्णय कार्यान्वयन गछौँ : क्याम्पस प्रमुख खत्री
क्याम्पस प्रमुख प्राध्यापक हरि खत्रीले सञ्चालक समितिको निर्णय कार्यान्वयनका लागि प्रतिबद्ध रहेको बताएका छन्। आफूहरु कार्यान्वयन गर्ने स्थानमा रहेकोले सञ्चालक समितिको निर्णय गर्नुपर्ने क्याम्पस प्रमुख खत्रीले बताएका हुन्।
‘८ महिनाको मासिक तलब प्राध्यापक तथा कर्मचारीलाई दिलाउन सकिएको छैन’, क्याम्पस प्रमुख खत्रीले भने, ‘जबसम्म यो क्याम्पसलाई राज्यले पूर्ण स्वामित्व हुनेगरी सञ्चालनको जिम्मेवारी लिँदैन तबसम्म स्थानीय सरकार, सञ्चालक समिति, आजीवन सदस्य लगायतले स्थायी स्रोतको व्यवस्था गरिदिनुपर्छ।’
विद्यार्थी चिन्तित
रेसुङ्गा बहुमुखी क्याम्पसमा हाल अध्ययनरत विद्यार्थीहरुले क्याप्पसको आर्थिक संकटकालको निर्णयले क्याम्पस रहने वा नरहनेमा चिन्तित रहेको बताएका छन्।
आन्तारिक रुपमा सल्लाह गरेर समाधान खोजिनुको सट्टा एक्कासी क्याम्पसमा संकटकाल भनिनुले अब विद्यार्थी क्याम्पसमा अध्ययनका लागि आउने सम्भावाना कम रहेको र वास्तविक आर्थिक संकटको अवस्था पुग्ने भन्दै अध्ययनरत विद्यार्थीहरुले चिन्ता व्यक्त गरे।
क्याम्पसमा भर्ना हुनेभन्दा क्याम्पस छाड्ने विद्यार्थी बढिरहेका बेला विद्यार्थीहरुलाई आकर्षित गर्ने कार्यक्रम सञ्चालन गर्नुको साटो संकटकाल घोषणा गर्नु दुःखद् विद्यार्थी करिष्मा विकले गुनासो व्यक्त गरिन्।
नगरपालिकाको ५० लाख सहयोग
रेसुङ्गा नगरपालिकाले नगरपालिकामा शिक्षालाई प्राथमिकतामा राखेको जनाएको छ। नगरपालिकाकाले यसपटक क्याम्पसका लागि ५० लाख बजेट विनियोजन गरेको नगर प्रमुख खिलध्वज पन्थीले बताए।
‘क्याम्पसमा अहिले आर्थिक जटिलता उत्पन्न भएको छ’, नगरप्रमुख पन्थीले भने, ‘हामीले क्याम्पसको समस्यालाई दीर्घकालीन समाधान खोज्न लागेका छौं। तत्कालका लागि क्याम्पसलाई थोरै भएपनि आर्थिक सहयोग गरिएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752324214.png)
-1752043710.jpg)
-1752245592.jpg)
-1749826086.png)
