गुल्मी– पूर्वमन्त्री तथा नेकपा एकीकृत समाजवादीकी सचिव रामकुमारी झाँक्री गृहजिल्ला गुल्मीमा छन्। पार्टीको प्रशिक्षण कार्यक्रममा पुगेकी उनले आगामी निर्वाचनमा उम्मेदवारी दिने सम्भावित क्षेत्र गुल्मी २ हो।
गठबन्धनका तर्फबाट उम्मेदवार बन्ने भएपनि निर्वाचन क्षेत्र तय नभएको झाँक्रीको भनाइ छ। गुल्मी २ बाट एमालेका सचिव गोकर्ण विष्ट २०५६ देखि निरन्तर उम्मेदवार छन्। २०६४ को निर्वाचन झिनो मतान्तरले हार बेहोरेका विष्ट त्यपछिका २ वटा निर्वाचनमा भने विजयी भए।
२०७० र २०७४ को निर्वाचन जितेका विष्ट एमालेबाट मंसिर ४ को निर्वाचनमा उम्मेदवार बन्ने निश्चित जस्तै देखिन्छ। गठबन्धनका तर्फबाट भने अझै कसले चुनौती दिन्छ भन्ने तय भइसकेको छैन।
गोकर्णलाई कसले दिन्छ चुनौती?
गुल्मी २ मा झाँक्री एक सम्भावित उम्मेदवार हुन्। उनका साथै नेपाली कांग्रेस र माओवादी केन्द्रले समेत दाबी गरिरहेका छन्।
कांग्रेसबाट यसअघि दुईपल्ट विष्टसँगै पराजित पूर्व जिल्ला सभापति त्रैलोक्यप्रताप सेन स्वभाविक दाबेदार हुन्। त्यसैगरी २०७४ सालमा विष्टसँग चन्द्र बहादुर केसी पराजित भएका थिए। गठबन्धनका कारण जित्ने सम्भावना बढेको समयमा उनले दाबी छाड्ने अवस्था हुँदैन।
त्यसैगरी कांग्रेसका पूर्व क्षेत्रीय सभापति, महाधिवेशन प्रतिनिधि, महासमिति सदस्य र लुम्बिनी योजना आयोगका सदस्य दामोदर भुसाले पनि यसपल्ट प्रतिनिधि सभा ताकेका छन्।
माओवादी केन्द्रबाट राजनीति गर्नेगरी पूर्वमुख्य सचिव लिलामणि पौडेल पनि गृहजिल्लामा सक्रिय छन्। १ वर्ष अघि उनले सार्वजनिक रुपमा माओवादी केन्द्रसँगको निकटता प्रस्तुत गरेका थिए। उनले पहिलेपटक राजनीतिक टिप्पणी गर्दै वर्तमान व्यवस्था ल्याउने शक्ति माओवादी भएको बताएका थिए। २०७८ असोज ७ गते पार्टीको कार्यक्रममा उनले भनेका थिए, ‘यो व्यवस्था कसले ल्याएको हो? यसको वकालत गर्ने को हो? त्यो माओवादी केन्द्र हो। पछाडि परेको वर्ग र जातिलाई राज्यको मूलप्रवाहमा स्थापित गर्न लड्यो।’
यसैगरी उनले एमालेको तुलना माओवादी केन्द्रसँग हुन नसक्ने दाबी गरेका थिए। प्रतिवादमा उत्रिन कार्यकर्तालाई अपिल गरेकका थिए। गत स्थानीय तहको निर्वाचनमा पनि पौडेल माओवादी केन्द्रका उम्मेदवारलाई विजयी गराउन सक्रिय भएर लागेका थिए।
मताधार कस्तो?
स्थानीय निर्वाचन २०७९ को वडाध्यक्षको मतका आधारमा गुल्मी २ मा एमाले सबैभन्दा ठूलो पार्टी हो। तर, नतिजा भने यसपल्ट निराशाजनक रह्यो। गुल्मी २ मा पर्ने एउटा मात्रै नगरपालिकामा एमाले विजयी भयो। अर्को एउटामा माओवादी केन्द्रलाई जिताउन सघायो।
२०७४ को निर्वाचनमा विष्टले ३४ हजार ६ सय १८ मत प्राप्त गरेका थिए। कांग्रेसका केसीले २० हजार १ सय ५९ मत पाएका थिए।
यसपल्टको स्थानीय तह निर्वाचनमा वडाध्यक्षको मत केलाउँदा एमालेले ३१ हजार २ सय ५३ मत पाएको छ। कांग्रेसले २९ हजार ८२१ र माओवादी केन्द्रको १ हजार ८ सय ४१ मत छ। एकीकृत समाजवादीले भने जम्मा ६ सय ५८ मत पाएको छ।
स्थानीय तहको निर्वाचनमा एकीकृत समाजवादीले जम्मा ३ वटा वडामा उम्मेदवारी दिएको थियो। एउटामा कांग्रेस र माओवादीको समेत साथ पाउँदा ६२५ प्राप्त गर्यो भने अरु दुईमा एक्लै लड्दा २२ र ११ मत पाएको देखिन्छ।
एक्लाएक्लै लड्दा एमाले बलियो देखिएपनि गठबन्धनसँग भने पछि छ। गठबन्धनको ३२ हजार ३ सय २० मत छ भने एमालेको ३१ हजार ५ सय २३ मत छ। अन्तर ७ सय ९७ को रहेको छ। प्रतिनिधि सभाको निर्वाचनमा यो क्षेत्रको कसको पोल्टामा पर्छ भन्ने स्पष्ट चित्र यो मतान्तरले देखाउँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
