काठमाडौं– सत्तारुढ भारतीय जनता पार्टी (भाजपा) र प्रतिपक्षी भारतीय कांग्रेसबीचको शक्ति संघर्षको असर भारतीय फुटबलमा देखिएको छ।
१३ वर्षदेखि अखिल भारतीय फुटबल संघ (एआईएफएफ) को अध्यक्ष पदमा आसिन कांग्रेस पार्टीका नेता प्रफुल पटेललाई हटाउने निर्णय भएको एक महिनाको समय बित्न नपाउँदै विश्व फुटबल महासंघ (फिफा)ले भारतीय फुटबलमाथि अनिश्चितकालका लागि प्रतिबन्ध लगाएको हो।
फिफाले मंगलबार विज्ञप्ति जारी गर्दै भारतीय फुटबलमा तेस्रो पक्ष (सरकार)को हस्तक्षेप भएको निष्कर्षसहित प्रतिबन्ध लगाउने निर्णय गरेको हो। भारतीय खेलकुदमा कुनै पनि व्यक्ति ३ कार्यकाल (१२ वर्ष)सम्म मात्र बस्न पाउने नियम छ। पटेल सन् २००४ मा मनमोहन सिंह प्रधानमन्त्री हुँदा नागरिक उड्डयन मन्त्री थिए।
पटेलको भारतीय फुटबलको यात्रा सन् २००९ देखि सुरु भएको हो, जब उनी एआईएफएफको अध्यक्ष निर्वाचित भए। उनी अहिले एसियन फुटबल महासंघ(एएफसी)को उपाध्यक्ष छन्। उनी फिफाको आर्थिक समितिको सदस्य पनि हुन्।
एआईएफएफको अध्यक्षमा उनको तेस्रो कार्यकाल २१ जनवरी सन् २०२२ मा पूरा भएको थियो। तर, तेस्रो कार्यकाल पूरा भएर ६ महिना बितिसक्दा समेत नहटेपछि खेलकुद विभागले उनलाई बर्खास्त गरेको थियो। त्यसपछि उनी सरकारी हस्तक्षेप भएको भन्दै सर्वोच्च अदालतमा गुहार माग्न गएका थिए। तर, सर्वोच्चले एआईएफएफलाई कमिटी अफ एडमिनिस्ट्रेसन (सीओए) अन्तर्गत राख्यो। सर्वोच्चले अगस्ट ३ मा सीओएद्वारा प्रस्तावित कार्यतालिका अनुसार छिटो निर्वाचन गराउन एआईएफएफको कार्यकारी समितिलाई निर्देशन दिएको थियो।
त्यसको दुई दिनपछि नै अगस्ट ५ मा फिफाले एआईएफएफलाई निलम्बन गर्ने र महिला यू–१७ विश्वकप आयोजना गर्ने अधिकार खोस्ने धम्की दिएको थियो। एआईएफएफको आगामी निर्वाचनका लागि इलेक्टोरल कलेजमा व्यक्तिगत सदस्यहरू समावेश गरेकोमा पनि फिफाले विरोध जनाएको थियो।
तर, फिफाको चेतावनीका बाबजुद प्रक्रिया अघि बढेपछि फिफाले निलम्बन गर्यो। सर्वोच्च अदालतले बनाएको सीओएले तयार गरेको समय सीमा अनुसार अगष्ट २८ मा निर्वाचन मिति तय गरिएको थियो भने त्यसका लागि अगष्ट १३ मै निर्वाचन प्रक्रिया सुरु भएको थियो।
भारतीय फुटबललाई निलम्बन गर्ने फिफाको निर्णयसँगै ११–३० अक्टोबरसम्म भारतमा आयोजना हुन लागेको यू–१७ महिला विश्व कप प्रतियोगिता पनि ओझलमा परेको छ। यो प्रतियोगिता भुवनेश्वर, गोबा र मुम्बई गरी ३ शहरमा आयोजना हुन लागेको थियो। अब यो प्रतियोगिता भारतबाट सरेर अन्य देशमा पुग्ने सम्भावना प्रबल छ।
यति मात्र होइन भारतको पुरुष र महिला राष्ट्रिय टोलीले पनि अन्तर्राष्ट्रिय प्रतियोगिता वा अन्य राष्ट्रिय टोलीसँग खेल्न पाउने छैन। यस्तै, निलम्बनपछि भारतको फुटबल क्लबहरुले एसियाली पुटबल महासंघ (एएफसी) ले आयोजना गर्ने एएफसी च्याम्पियन्स लिग, एएफसी कप, एएफसी महिला क्लब च्याम्पियनसिप जस्ता प्रतियोगिता खेल्न पाउने छैन।
यद्यपि भारतको घरेलु फुटबल प्रतियोगिता इन्डियन सुपर लिग (आईएसएल) र आई लिग भने यसअघि घोषित तालिका अनुसार नै आयोजना गर्न पाउने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
