मोरङ-६ : शेखरलाई लालबाबुको चुनौती, अन्तर्घातको डर

राजनीति

राजनीतिक ब्यूरो बुधबार, भदौ १, २०७९ २१:३८

विराटनगर– ६ वटा निर्वाचन क्षेत्र भएको मोरङमा धेरैको चासोचाहिं क्षेत्र नम्बर ६ मा रहने गर्छ। कांग्रेस संस्थापनइतर पक्षको नेतृत्व गर्दै आएका शेखर कोइराला २०७४ को निर्वाचनमा त्यहींबाट पराजित भएका थिए। यसपटक पनि उनी नै उम्मेदवार बन्ने पक्कापक्की जस्तै छ। कांग्रेस केन्द्रीय सदस्य डिला संग्रौलाले पनि सोही क्षेत्रबाट उम्मेवार बन्ने चाहना राखेकी छिन्। नेपाल महिला संघकी पूर्वकेन्द्रीय अध्यक्ष समेत रहेकी संग्रौला दुईपटक समानुपातिकतर्फ निर्वाचित भइसकेकी छिन्। पार्टीमा उनी सभापति शेरबहादुर देउवाको निकट मानिन्छिन्।

एमालेबाट लालबाबु पण्डित नै पुन: उम्मेदवार बन्ने एमालेका नेताहरु बताउँछन्। पण्डितले यसअघि कोइरालालाई ६७५ मतान्तरले पराजित गरेका थिए। वाम गठबन्धनका साझा उम्मेदवार पण्डितले ३३ हजार ९४१ मत पाउँदा कोइरालाले भने ३३ हजार २६६ मत मात्रै पाएका थिए। सो निर्वाचन क्षेत्रअन्तर्गतका प्रदेश सभाका दुवै क्षेत्रमा भने कांग्रेसकै उम्मेदवार निर्वाचित भएका थिए। त्यसबेला कोइराला आफ्नै पार्टी पंक्तिबाट अन्तर्घात भएका कारण पराजित भएको बताइन्छ।

सो निर्वाचन क्षेत्रमा सत्ता गठबन्धनका अन्य दलको खासै दाबी छैन। त्यसैले मंसिरमा हुने निर्वाचनमा कोइराला र पण्डितबीच नै प्रतिस्पर्धा हुने आंकलन गरिएको छ।

मोरङ- ६ अन्तर्गत बुढीगंगा गाउँपालिकाका सबै वडा पर्छन्। त्यस्तै, विराटनगर महानगरपालिकाका वडाहरु ४, ५, ६, ७, ९, ११, १२ तथा सुन्दरहरैंचा नगरपालिकाका वडाहरु २, ३, ४, ५, ६ र ७ पर्छन्।

वैशाख ३० मा सम्पन्न स्थानीय तहको निर्वाचनमा मोरङ ६ अन्तर्गत पर्ने विभिन्न पालिकाका २० वटा वडामध्ये कांग्रेसले १२ वटाको अध्यक्षमा जित निकालेको छ। त्यस्तै, एमालेले ५, माओवादी केन्द्रले १, जसपाले १ र स्वतन्त्र १ वडाको अध्यक्ष जितेका छन्। २० वटै वडाका वडाध्यक्षका उम्मेदवारहरुले पाएको एकीकृत मतमा कांग्रेस अगाडि छ। उसले २८ हजार ४२८ मत पाएको देखिन्छ।

त्यस्तै, एमालेले २५ हजार २३६, माओवादी केन्द्रले ५ हजार ३५६, जसपाले ३ हजार ९३९, राप्रपाले ३ हजार ६८९, एकीकृत समाजवादीले २ हजार ३६९ मत पाएका छन्। अन्य पार्टी तथा स्वतन्त्र उम्मेदवारको एकीकृत मत ५ हजार ७४१ छ।

स्थानीय तहको मत हेर्दा सो क्षेत्रमा कांग्रेस ३ हजारभन्दा बढी मतले अगाडि देखिन्छ। सत्तारुढ दलहरुको गठबन्धन बन्दा कांग्रेस उम्मेदवारको रुपमा कोइरालालाई अझै सहज हुनेछ। किनकि त्यतिबेला उनको पक्षमा साढे ११ हजारभन्दा बढी मत थपिनेछ। तर, स्थानीय तहकै अनुसार मत खस्छ वा खस्दैन र तालमेलको स्वीकारोक्ति कुन किसिमले हुन्छ, त्यसले पनि भूमिका खेल्नेछ।

सुशील कोइराला नेतृत्वको सरकारमा मन्त्री रहँदा गरेका केही कामले लालबाबु पण्डितलाई चर्चा दिलाएको थियो। तर, केपी ओली नेतृत्वको पछिल्लो सरकारमा उनले प्रशंसा पाउन सकेनन्। बरु बीचमा मन्त्रीबाट बाहिरिनुपर्‍यो। पार्टीभित्र पनि माधव नेपाल निकट मानिने उनी नेकपा विवाद चर्किँदै गएपछि ओलीतिर लागेका थिए, तर निकट भने मानिँदैनन्। एमालेको दशौं महाधिवेशनमा उनी केन्द्रीय सदस्य समेत बनाइएका थिएनन्। पछि मनोनयनमा परेका थिए। त्यसैले उनले टिकट पाउने र जित्ने सम्भावनामा प्रशस्तै शंका गर्न सकिन्छ।

कांग्रेसको १४औं उम्मेदवारमा शेखर कोइराला सभापतिका प्रत्यासी थिए। पराजित भए पनि उनी प्रभावशाली ठानिन्छन्। सत्ता गठबन्धन आबद्ध दलहरुबीच तालमेल भएमा कोइराला लाभान्वित हुनेछन्। यसअघि पण्डितलाई पुगेको फाइदा यसपटक कोइरालालाई पुग्नेछ।

तर कोइरालाका अप्ठ्यारा पनि छन्। पछिल्ला दिनमा पनि उनले सभापति शेरबहादुर देउवासँग टक्कर लिन खोजिरहेका छन्। तर सफलता पाउन सकेका छैनन्। पार्टीभित्र देउवासँगै संघर्ष गर्ने गरेका कारण निर्वाचनमा शेखरलाई संस्थापन पक्षबाट अन्तर्घात हुनसक्ने डर उनी पक्षका नेताहरुले व्यक्त गर्ने गरेका छन्।
०००
मोरङ- ६
२०७४ को प्रतिनिधि सभा निर्वाचनको मत परिणामः
लाल बाबु पण्डित: ३३९४१
डा शेखर कोइराला: ३३२६६
अन्य: ७६६६
०००
२०७९ वैशाखको स्थानीय तहको निर्वाचनमा मोरङ ६ अन्तर्गतका वडामा वडाध्यक्षका उम्मेदवारले पाएको एकीकृत मतः
कांग्रेस: २८४२८
एमाले: २५२३६
माओवादी केन्द्र: ५३५६
जसपा: ३९३९
राप्रपा: ३६८९
एकीकृत समाजवादी: २३६९
अन्य: ५७४१