काठमाडौं- क्याटलान क्लब बार्सिलोनाले यस समरमा आर्थिक समस्याका बीच अनुबन्ध गरेका ५ खेलाडीमध्ये दुई खेलाडी दर्ता हुन समस्या देखिएको छ। ‘फाइनान्सियल फेयर प्ले’को कडाइको कारण ला लिगाले बार्सिलोनामा आवद्द ५ खेलाडीमध्ये दुई खेलाडी दर्ता गर्न आनकानी गरेको हो।
स्पेनिस समाचारमाध्यमका अनुसार बार्सिलोनाले सबै नयाँ खेलाडीलाई दर्ता गर्ने प्रयास गरिरहेको छ। तर, ला लिगाले भने सबै खेलाडी अनुबन्ध गर्न अस्वीकार गरिरहेको छ।
बार्सिलोनाले नयाँ खेलाडीमध्ये डिफेन्डरद्वय जुल्स कुन्डे, आन्द्रेस क्रिस्टेन्सेन र मिडफिल्डर फ्रान्क केस्सीमध्ये एक जनामात्रै दर्ता गर्न पाउने व्यवस्था रहेको छ। तर, रोबर्ट लेवान्डोस्की र राफिन्हा दर्तामा समस्या नहुने देखिएको छ। पोलिस फरवार्ड लेवान्डोस्कीमा पनि चेल्सीले इच्छा देखाएको थियो। तर, लेवान्डोस्कीले व्यक्तिगत रुपमा नै बायर्न म्युनिखलाई बार्सिलोनाबाहेक अन्यत्र नसुन्न भनेपछि क्लबले उनको आग्रह स्वीकार गरेको थियो।
बार्सिलोनाले लेवान्डोस्कीलाई ४ वर्षको लागि ५० मिलियन युरो (४२.६ मिलियन पाउन्ड) खर्चिएको छ। बायर्नमा अझै १ वर्ष सम्झौता अवधि बाँकी रहँदै ३३ वर्षीय लेवान्डोस्कीले क्लब छाड्ने निर्णय गरेका थिए।
यता, लन्डन क्लब चेल्सीमा आवद्द हुने तरखरमा रहेका ब्राजिलियन विंगर राफिन्हो अन्तिम समयमा बार्सिलोना भित्रिएका थिए। प्रिमियर लिग क्लब लिड्स युनाइटेडका पूर्वखेलाडी राफिन्होलाई बार्सिलोनाले ६० मिलियन युरोको प्रारम्भिक प्रस्ताव पेस गरेको थियो। २५ वर्षीय राफिन्हाले बार्सिलोनाबाट खेल्ने आफ्नो सपना रहेको बताएपछि लिड्सले उनको आग्रह स्वीकार गरेको थियो।
लिड्सले प्रिमियर लिग क्लबभन्दा बाहिर पठाउँदा उचित हुने देखेपछि बार्सिलोना पठाएको थियो। आर्थिक समस्याले ग्रस्त बार्सिलोनाले धेरै किस्तामा ट्रान्सफर रकम तिर्ने भनेपछि लिड्सले सुरुआतमा असहमति जनाएको थियो।
राफिन्हा फ्रान्सको रेन्नेसबाट लिड्स पुगेका थिए। उनले गत सिजन प्रभावशाली प्रदर्शन गर्दै लिड्सलाई प्रिमियर लिगमा राख्न सफल भएका थिए।
बार्सिलोनाले केस्सीलाई इटालियन क्लब एसी मिलान र क्रिस्टेन्सेनलाई प्रिमियर लिग चेल्सीबाट फ्रि–ट्रान्सफरमा आवद्ध गरेको थियो। केस्सी सन् २०१७ देखि एसी मिलानमा रहेका थिए। गत सिजन मिलानले १० वर्षपछि सिरी ‘ए’ को उपाधि जित्दा उनी टोलीका महत्त्वपूर्ण सदस्य रहेका थिए। यता, डिफेन्डर क्रिस्टेनसेनलाई बार्सिलोनाले चेल्सीबाट फ्रि–ट्रान्सफरमा अनुबन्ध गरेको थियो। क्रिस्टेनसेनले बार्सिलोनासँग ४ वर्षको सम्झौता गरेका छन्।
कुन्डे भने सेभियाबाट महँगो मूल्यमा आवद्ध गरेका खेलाडी हुन्। क्लबले २५ वर्षीय मिडफिल्डरलाई ४ वर्षका लागि अनुबन्ध गरेको पुष्टि गरेको छ। उनी सन् २०२६ सम्म नोउ क्याम्पमा रहनेछन्। उनको रिलिज क्लज ५ सय मिलियन युरो राखिएको छ।
बार्सिलोनाले लेवान्डोस्की र राफिन्हालाई ला लिगामा दर्तामा समस्या नदेखिने भएको छ। यी ५ खेलाडी अनुबन्धसँगै बार्सिलोनाले सम्झौता सकिएका विंगर औसमाने डेम्वेलेलाई पनि ला लिगामा दर्ता गर्न सकेको छैन।
डेम्वेले र राफिन्हामध्ये एक खेलाडी नलिएको भए बार्सिलोनालाई समस्या आउने थिएन। राफिन्हाको ५८ मिलियन युरो सरुवा मूल्य र डेम्वेलेसँग महँगो सम्झौता नवीकरणपछि समस्या बढेको हो ।
हालकै स्थिति रहे यी दुई खेलाडीले फ्रि–ट्रान्सफरमा क्लब छाड्न पाउनेछन्। अब बार्सिलोनाले दर्ता गर्न बाँकी रहेका तीन खेलाडीलाई क्लबमै राख्नका लागि आफ्ना खेलाडी बेचेर र केही खेलाडीको तलबमा भारी कटौती गर्दै ला लिगामा प्रमाणित गर्नुपर्छ। यो समरमा बार्सिलोनाले नयाँ खेलाडीका लागि १४० मिलियन युरो गुमाइसकेको छ। यो एकै समरमा ठूलै खर्च हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
