काठमाडौं– युरोप भ्रमणमा रहेको नेपाली क्रिकेट टिम दोस्रो अभ्यास खेलमा पराजित भएको छ। सोमबार भएको दोस्रो अभ्यास खेलमा नेपाललाई इंग्ल्यान्डको सेन्ट क्रस क्लबले १९ रनले पराजित गरेको हो।
टस जितेर पहिले ब्याटिङ गरेको सेन्टले निर्धारित २० ओभरमा ६ विकेट गुमाएर १ सय ६८ रन जोड्यो। उसका लागि जिमी एडम्सले ७२ रन जोडे। उनले ४८ बलमा ९ चौका र २ छक्का प्रहार गरे। बलिङमा नेपालका सोमपाल कामी र बसन्त रेग्मीले २–२ विकेट लिए। सन्दीप लामिछानेले १ विकेट हात पारे।
१ सय ६९ रनको लक्ष्य पछ्याएको नेपालले निर्धारित २० ओभरमा ८ विकेट गुमाएर १ सय ४९ रन मात्र जोड्न सक्यो। नेपालका लागि ओपनिङमा आएका अनिल मन्डलले ५६ रन जोडे। त्यसअघि सुवास खकुरेलले १० रन जोड्दा कप्तानको भूमिका निर्वाह गरेका ज्ञानेन्द्र मल्ल १८ रनमै आउट भए। शरद भेषावकर ० रन, दीपेन्द्रसिंह ऐरी ३ रन र रोहितकुमार पौडेल १ रनमा आउट भए। आरिफ शेखले ३४ र सोमपाल कामीले १६ रन जोडे पनि जितका लागि पर्याप्त हुन सकेन। बलिङमा क्रसका फ्लेक्स ओर्गानले ३ विकेट लिए।
यसअघि शनिबार भएको पहिलो अभ्यास खेलमा नेपालले हाम्पस्रिन हग्सलाई २ सय ४३ रन पराजित गरेको थियो।
इंग्ल्यान्डको लर्ड्समा हुने टी–२० सिरिज र नेदरल्यान्ड्समा हुने एकदिवसीय सिरिज खेल्न नेपाली टिम युरोप भ्रमणमा छ।
नेपालले आगामी असार १३ नेदरल्यान्ड्स र एमसिसीसँग त्रिकोणात्मक टी–२० सिरिज खेल्नेछ। त्यसपछि नेपाली टिम नेदरल्यान्ड्स प्रस्थान गर्नेछ। साउद १६ र १८ मा नेपालले २ खेलको एकदिवसीय सिरिज खेलेर एकदिवसीय खेलमा डेब्यू गर्नेछ। त्यसअघि नेपालले इंग्ल्यान्डमा ४ अभ्यास खेल खेल्नेछ।
नेपालको युरोप भ्रमणको खेल तालिका
अभ्यास खेल
तेस्रो अभ्यास खेल – ९ साउन – नेपाल भर्सेस इस्ट लन्डन ११ (५० ओभर)
चौथो अभ्यास खेल – १० साउन – नेपाल भर्सेस इस्ट लन्डन सार्कस् (टी–२०)
त्रिकोणात्मक सिरिज
नेपाल, एमसिसी र नेदरल्यान्ड्स – १३ साउन– लर्ड्स मैदान, लन्डन
एकदिवसीय सिरिज
पहिलो एकदिवसीय – १६ साउन– नेपाल भर्सेस नेदरल्यान्ड्स – आम्स्टर्डम
दोस्रो एकदिवसीय – १८ साउन– नेपाल भर्सेस नेदरल्यान्ड्स – आम्स्टर्डम
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768288990.png)
