काठमाडौं- स्पेनिस ला लिगा फुटबलले क्याटलान क्लब बार्सिलोनाका हालै अनुबन्धित नयाँ खेलाडी दर्ता गर्न अस्वीकार गरेको छ।
‘फाइनान्सियल फेयर प्ले’को कडाइको कारण ला लिगाले बार्सिलोनामा आबद्द ५ नयाँ खेलाडी दर्ता गर्न अस्वीकार गरेको हो।
गम्भीर आर्थिक समस्याको बाबजुत बार्सिलोनाले रोबर्ट लेवान्डोस्की, राफिन्हा, जुल्स कुन्डे, फ्रान्क केस्सी र एन्ड्रियस क्रिस्टेनसेन अनुबन्ध गरेको थियो। यस्तै, औसमाने डेम्वेले र सर्जि रोवर्टोसँग बार्सिलोनाले सम्झौता नवीकरण गरेको थियो।
आर्थिक समस्या हुँदासमेत खेलाडी अनुबन्धमा आक्रामक देखिएपछि ला लिगाले बार्सिलोनामाथि अनुसन्धान गर्ने छ। यता, बार्सिलोनाका अध्यक्ष जोन लापोर्टाले आवश्यक कागजात जुटाउने तयारी गरिरहेको बताएका छन्।
‘हामीले सबै कुरा पालना गरेका छौं। हामी सबै आवश्यकताहरू पूरा गर्छौं,’ लापोर्टाले भने,‘कागजातहरू पहिले नै पठाइएको छ, हामी लिगबाट प्रतिक्रियाको लागि पर्खिरहेका छौं। त्यहाँ केही समस्या देखा परेका छन्, त्यसबारे बुझ्ने कोशिस गरिरहेका छौं।’
लन्डन क्लब चेल्सीमा आवद्द हुने तरखरमा रहेका ब्राजिलियन विंगर राफिन्हो अन्तिम समयमा बार्सिलोना भित्रिएका थिए। प्रिमियर लिग क्लब लिड्स युनाइटेडका पूर्वखेलाडी राफिन्होलाई बार्सिलोनाले ६० मिलियन युरोको प्रारम्भिक प्रस्ताव पेस गरेको थियो। २५ वर्षीय राफिन्हाले बार्सिलोनाबाट खेल्ने आफ्नो सपना रहेको बताएपछि लिड्सले उनको आग्रह स्वीकार गरेको थियो।
लिड्सले प्रिमियर लिग क्लबभन्दा बाहिर पठाउँदा उचित हुने देखेपछि बार्सिलोना पठाएको थियो। आर्थिक समस्याले ग्रस्त बार्सिलोनाले धेरै किस्तामा ट्रान्सफर रकम तिर्ने भनेपछि लिड्सले सुरुआतमा असहमति जनाएको थियो।
राफिन्हा फ्रान्सको रेन्नेसबाट लिड्स पुगेका थिए। उनले गत सिजन प्रभावशाली प्रदर्शन गर्दै लिड्सलाई प्रिमियर लिगमा राख्न सफल भएका थिए।
यता, पोलिस फरवार्ड लेवान्डोस्कीमा पनि चेल्सीले इच्छा देखाएको थियो। तर, लेवान्डोस्कीले व्यक्तिगत रुपमा नै बायर्न म्युनिखलाई बार्सिलोनाबाहेक अन्यत्र नसुन्न भनेपछि क्लबले उनको आग्रह स्वीकार गरेको थियो।
बार्सिलोनाले लेवान्डोस्कीलाई ४ वर्षको लागि ५० मिलियन युरो (४२.६ मिलियन पाउन्ड) खर्चिएको छ। बायर्नमा अझै १ वर्ष सम्झौता अवधि बाँकी रहँदै ३३ वर्षीय लेवान्डोस्कीले क्लब छाड्ने निर्णय गरेका थिए।
यता, बार्सिलोनाले फ्रान्सेली सेन्टर ब्याक कुन्डेलाई ४ वर्षको लागि ५० मिलियन युरो र १० मिलियन युरो थप गरि २०२७ सम्मको लागि अनुबन्ध गर्न गरेको थियो।
२३ वर्षीय कुन्डे अनुबन्धमा बार्सिलोनाले इंग्लिस क्लब चेल्सीलाई पछि पारेको थियो। यता, बार्सिलोनाले आइभोरी कोस्टका मिडफिल्डर केस्सीलाई फ्रि- ट्रान्सफरमार्फत् इटालियन च्याम्पियन एसी मिलानबाट अनुबन्ध गरेको थियो।
क्लबले २५ वर्षीय मिडफिल्डरलाई ४ वर्षका लागि अनुबन्ध गरेको पुष्टि गरेको छ। उनी सन् २०२६ सम्म नोउ क्याम्पमा रहनेछन्। उनको रिलिज क्लज ५ सय मिलियन युरो राखिएको छ।
केस्सी सन् २०१७ देखि एसी मिलानमा रहेका थिए। गत सिजन मिलानले १० वर्षपछि सिरी ‘ए’ को उपाधि जित्दा उनी टोलीका महत्त्वपूर्ण सदस्य रहेका थिए। यता, डिफेन्डर क्रिस्टेनसेनलाई बार्सिलोनाले चेल्सीबाट फ्रि–ट्रान्सफरमा अनुबन्ध गरेको थियो। क्रिस्टेनसेनले बार्सिलोनासँग ४ वर्षको सम्झौता गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770630850.jpg)
-1764146706.png)
-1770562345.jpg)
