काठमाडौं– नेपाली राष्ट्रिय टोलीका मुख्य प्रशिक्षक अब्दुल्लाह अल्मुताइरीले नेपाली खेलकुदको भविष्य जोगाउन सरकारसँग अनुरोध गरेका छन्। पछिल्लो समय नेपाली फुटबल खेलाडीहरू विदेश पलायन भइरहेको समयलाई इंगित गर्दै उनले उक्त आग्रह गरेका हुन्।
‘आफ्नो भविष्य राम्रो बनाउन नेपाल छाडेर विदेश गएका खेलाडीहरूलाई म दोष दिन सक्दिनँ। नेपाली खेलकुदको भविष्य जोगाउन केही गर्न सरकारलाई विनम्र अनुरोध गर्दछु,’ अल्मुताइरीले सामाजिक सञ्जालमा लेखेका छन्।
उनले खेलकुदको भविष्य जोगाउन सरोकारवाला निकायहरूले ५ देखि ७ जनाको टोली नै बनाएर समस्या समाधानको विषयमा सोच्नु पर्ने बताए। ‘नेपाली खेलकुदको भविष्य जोगाउनको लागि ५ देखि ७ जनासम्मको टोली तुरून्तै रोडम्याप बनाउन खेलकुदमन्त्री, खेलकुद परिषद्, नेपाल ओलम्पिक कमिटी र महासंघलाई विनम्र अनुरोध गर्दछु,’ उनले लेखेका छन्।
पछिल्लो दुई महिनामा नेपाली राष्ट्रिय टोलीबाट प्रतिनिधित्व गरिसकेका ७ जना खेलाडी अस्ट्रेलिया पुगिसकेका छन्। शनिबार मात्रै एन्फा एकेडेमीको उत्पादन मिडफिल्डर हेमन्त थापा मगर अस्ट्रेलिया पुगेका छन्।
गत सिजन उनले सहिद स्मारक ‘ए’ डिभिजन लिगमा थ्री स्टार क्लबबाट खेलेका थिए। त्यसअघि उनले च्यासल युथ क्लबबाट शीर्ष डिभिजनको लिग खेलेका थिए।
हेमन्तले सन् २०१६ जुन ६ मा भारतसँगको मैत्रीपूर्ण खेलबाट सिनियर टोलीमा डेब्यू गरेका थिए। त्यसयता उनी राष्ट्रिय टोलीको बन्द प्रशिक्षणमा रहे पनि टोलीमा स्थान बनाउन संघर्ष गरिरहेको थिए।
हेमन्तले नेपालको उमेर समूहबाट साफ यू–१९ च्याम्पियनसिप जितेका छन्। हेमन्तले थ्री स्टारसँगै च्यासल, मनाङ मर्स्याङ्दीलगायत विभिन्न क्लबबाट मोफसलका प्रतियोगिताहरू खेलेका छन्।
शुक्रबार मात्रै नेपाली राष्ट्रिय टोलीबाट प्रतिनिधित्व गरिसकेका फरवार्ड विमल राना अस्ट्रेलिया पुगेका थिए। विमलले २०१९ मार्च २१ मा कुवेतविरूद्धको मैत्रीपूर्ण खेलमा राष्ट्रिय टोलीबाट डेब्यू गरेका थिए। उनले मनाङ मर्स्याङ्दी क्लबबाट खेल्दै आएका छन्। उनी टोलीको उपकप्तानसमेत रहेका थिए।
विमल र हेमन्तले अस्ट्रेलिस्थित सिड्नीमा रहेको गोर्खा नेप्लिज लिग (जीएनसी) लिग क्लब फेवा क्लबबाट खेल्नेछन्। उनीहरूले फेवा क्लबको आयोजनामा १४ अगस्टमा हुने ताल बाराही कप खेल्ने छन्। त्यसपछि उनीहरूले यसै फेवा क्लबबाट त्यहाँको लिग खेल्नेछन्।
अस्ट्रेलिमा हुने फुटबल लिग खेल्न नेपाली राष्ट्रिय टोलीका सदस्यहरू यसअघि नै अस्ट्रेलिया पुगिसकेका छन्। यसअघि राष्ट्रिय टोलीकै सदस्य सुमन लामा, आशिष लामा, सन्तोष तामाङ, दर्शन गुरूङ, नविन गुरूङ र विमल अस्ट्रेलिया पुगिसकेका छन्।
मिडफिल्डर हेमन गुरूङ, गोलरक्षक एलन न्यौपाने र जगजित श्रेष्ठसँगै राष्ट्रिय टोलीबाट खेलिसकेका विमल बस्नेत पनि दुई वर्षयता अस्ट्रेलियामै रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
