काठमाडाैं-आयोजक भारत साफ यू-२० च्याम्पियनसिप फुटबलको फाइनलमा पुगेको छ। भुवनेश्वरस्थित कालिंगा स्टेडियममा मंगलबार साँझ सम्पन्न दिनको खेलमा प्रतियोगिताबाट बाहिरिइसकेको माल्दिभ्सलाई १-० गोलले हराउँदै भारत उपाधिनजिक पुगेको हो।
पहिलो हाफ गोलरहित बराबरीमा सकिएको खेलको दोस्रो हाफमा भारत गोल गर्न सफल रह्यो।
उसका लागि फरवार्ड गुर्किरत सिंहले खेलको ९०औं मिनेटमा गोल गर्दै जित दिलाए। उनले पेनाल्टी क्षेत्रभित्र माल्दिभ्सका डिफेन्सले क्लियर गर्न नसकेको बललाई टप कर्नरमा प्रहार गरेका थिए।
खेलको इन्ज्युरी समयमा भारत १० खेलाडीमा समेटियो। पार्थिवसुन्दर गोगोइले थ्रो इन गर्न ढिलाइ गरेपछि नेपाली रेफ्री प्रज्वल क्षेत्रीले उनलाई पहेंलो कार्ड दिएका थिए। त्यसपछि खेल सुरु भए पनि रेफ्रीविरुद्ध बहस गरेपछि उनलाई सिधै रातो कार्ड दिएका थिए।
लिग चरणको अन्त्यमा बंगलादेश ४ खेलमा १० अंक जोड्दै शीर्षस्थानमा रह्यो। भारतले ४ खेलमा ९ अंक जोड्दै दोस्रो स्थानमा रहेर फाइनलमा स्थान बनायो।
यता, नेपाल भने ४ खेलमा ७ अंकसहित तालिकाको तेस्रो स्थानमा रह्यो। माल्दिभ्स ४ खेलमा २ अंकसहित चौथो तथा १ अंक जोडेको श्रीलंका पुछारमा रह्यो। अब शुक्रबार हुने फाइनलमा बंगलादेश र भारत खेल्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
