काठमाडौं– तनावग्रस्त बनेको साफ यू-२० च्याम्पियनसिप फुटबल अन्तर्गत लिग चरणको अन्तिम खेलमा नेपाल बराबरीमा रोकिएको छ।
भुवनेश्वरस्थित कालिंगा स्टेडियममा मंगलबार सम्पन्न दिन पहिलो खेलमा नेपालले बंगलादेशसँग १-१ गोलको बराबरी खेलेको हो।
निकै प्रतिस्पर्धात्मक खेलको पहिलो हाफ गोलरहित बराबरीमा सकिएको थियो।
दोस्रो हाफको सुरुआतमै दुई टोलीका खेलाडीबीच झगडा हुँदा रेफ्रीले मैदानमा रहेका दुई र बेन्चका एक गरी कुल तीन खेलाडीलाई रातो कार्ड देखाएका थिए।
बंगलादेशका साहिदुल इस्लामले दोस्रो पहेंलो कार्डसँगै रातो कार्ड पाए। यता, नेपालका दीपेश गुरुङ सिधै रातो कार्ड पाउँदै बाहिरिए। मैदानभित्र पसेर झगडा गरेका वैकल्पिक खेलाडी रोहित सुब्बाले पनि रातो कार्ड पाए।
खेलको ४८औं मिनेटमा बंगलादेशका कप्तान तनवीरले सहायक रेफ्रीसँग आक्रोशित रुपमा प्रस्तुत भएपछि नेपालका कप्तान आयुष घलानले उनलाई सम्झाउन पुगेका थिए।
त्यसपछि होहल्ला बढ्यो। र, बेन्चमा रहेका खेलाडी पनि केहीबेर मैदान उत्रिए। तनावकै बीच हातपातको अवस्था पनि सिर्जना भयो। केहीबेरमा नै दुवै टोलीका बेन्चका खेलाडी पनि मैदान प्रवेश गरेर झगडा गर्न थाले। दुवै टोलीका बेन्चमा रहेका प्रशिक्षक र अफिसियलले झगडा साम्य पारेका थिए।
झगडाका दौरान नेपालका कृतिश रत्न छुन्जु र बंगलादेशका एक खेलाडी लड्न पुगेका थिए। रेफ्रीले सहायक रेफ्रीद्वय र फोर्थ अफिसियलको सहयोगमा बंगलादेशका कप्तानलाई पहेंलो कार्ड तथा अन्य तीन खेलाडीलाई रातो कार्ड दिए।
६३औं मिनेटमा बंगलादेशले खेलमा अग्रता लियो। मोहमद रफिकुल इस्लामको क्रसमा मोहमद पियास अहमद नोभाले गोल गर्दै बंगलादेशलाई अघि बढाए।
त्यसको ५ मिनेटपछि नै नेपाल खेलमा फर्कियो। वैकल्पिक खेलाडी निरञ्जन मल्लले पेनाल्टी क्षेत्र बाहिरबाट गरेको शक्तिशाली प्रहार गोलरक्षक मोहमद आसिफले बचाउने कुनै मौका पाएनन्।
त्यसपछि दुवै टोलीले केही अवसर पाए पनि गोलमा परिणत गर्न सकेनन्। बराबरी खेलेसँगै नेपालले अंक तालिकामा हाललाई एक खेल कम खेलेको भारतलाई उछिनेको छ।
नेपालको फाइनल पुग्ने सम्भावना अब भारत र माल्दिभ्सको खेलमा निर्भर छ। माल्दिभ्सले भारतलाई हराएको खण्डमा नेपाल फाइनल पुग्नेछ। भारतको बराबरी वा जितले भने नेपालको यात्रा समूह चरणमा सकिनेछ।
बंगलादेश ४ खेलमा १० अंकसाथ अपराजित रहँदै लिगको शीर्षस्थानमा रहेर फाइनल प्रवेश गर्न सफल भएको छ। नेपाल ४ खेलमा ७ अंक जोड्दै अंक तालिकाको दोस्रो स्थानमा उक्लिएको छ।
भारत ३ खेलमा ६ अंकसाथ तेस्रो स्थानमा छ। समान १-१ अंक जोडेका माल्दिभ्स चौथो र श्रीलंका पुछारमा रहँदै प्रतियोगिताबाट बाहिरिसकेको छ। आज भारत र माल्दिभ्सले साँझ ७:१५ बजे अन्तिम लिग खेल खेल्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
