काठमाडौं– अखिल नेपाल फुटबल संघ(एन्फा) को अन्तर्राष्ट्रिय सम्बन्ध प्रमुख नविन पाण्डेको बर्खास्तीको माग गर्दै कार्यसमिति सदस्य रमेश व्यञ्जनकारले निवेदन दिएका छन्।
व्यञ्जनकारले शुक्रबार जर्मन नागरिक पाण्डेलाई बर्खास्त गर्न माग गर्दै एन्फा अध्यक्ष पंकजविक्रम नेम्वाङलाई सम्बोधन गर्दै पत्र बुझाएका हुन्।
पाण्डेको बर्खास्तीको माग गर्ने एन्फाको १९ सदस्यीय कार्यसमितिमा १३ जना पुगेका छन्। यसअघि वरिष्ठ उपाध्यक्ष वीरबहादुर खड्का र दुई उपाध्यक्ष विराटजंग शाही र दीपक खतिवडासहित १२ जनाले पाण्डेको नियुक्ती विधानसम्मत नभएको भन्दै विरोध जनाएका थिए।
पाण्डेको बर्खास्ती माग गर्ने सदस्यहरुमा भोजराज शाही, अनिल मल्ल, रविन्द्र चन्द, महेन्द्र क्षेत्री, विकासनारायण श्रेष्ठ, पुरुशोत्तम थापा, सरिना श्रेष्ठ, भरत बुढ थापा र टीकाराम लामा थपिएका छन्।
असार ६ गते कर्माछिरिङ शेर्पालाई हराउँदै अध्यक्षमा निर्वाचित भएर आएको कार्यसमितिको पहिलो बैठकले महासचिवमा किरण राई, अन्तर्राष्ट्रिय सम्बन्ध प्रमुखमा पाण्डे र कोषाध्यक्षमा रविन्द्र जोशीलाई नियुक्त गरेको थियो।
तर, प्रक्रिया पूरा नगरी नियुक्त गरिएको भन्दै त्यसको विरोध हुँदै आएको थियो। गत बिहीबारका लागि तय भएको बैठक अजेन्डामा प्रवेश नै नगरी स्थगित भएको थियो।
तत्कालीन अध्यक्ष शेर्पा समूहका उपाध्यक्ष दीर्घबहादुर केसी तथा सदस्यहरु मनिश जोशी, मणिराज विष्ट र पेमा डोल्मा शेर्पाले भने अहिलेसम्म पाण्डेको बर्खास्तीको माग गरेका छैनन्। यता, अध्यक्ष नेम्वाङको पक्षमा उपाध्यक्ष दावा लामाले पनि पाण्डेको बर्खास्तीको माग गरेका छैनन्।
असार ६ गतेको निर्वाचनमा एन्फा कार्यसमितीका २१ मध्ये १९ सदस्य निर्वाचित भएका थिए। अन्य दुई सदस्यका लागि भने विशेष साधरणसभामा निर्वाचन हुनेछ। सदस्य पदका चार उम्मेदवारको बराबर मत भएका कारण पुनः साधारणसभाबाट ती चारमध्ये दुईलाई चुन्नुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
